ޗައިނާއިން ޕެސިފިކް ކަނޑަށް ނިއުކްލިއާ ސަބްމެރީނަކުން މިސައިލެއް ޓެސްޓުކޮށްފި

ޗައިނާ ސިފައިންގެ ނިއުކްލިއާ ސަބްމެރީނަކުން ޕެސިފިކް ކަނޑުގެ ބައިނަލްއަޤުވާމީ ސަރަޙައްދަށް މިސައިލެއް ޓެސްޓުކޮށް ފޮނުވައިލައިފައިވާ ކަމަށް ޗައިނާގެ ރަސްމީ ޝިންހުއާ ނޫސް އެޖެންސީން ރިޕޯޓުކޮށްފިއެވެ. މި ޓެސްޓާ ގުޅިގެން ޖަޕާނާއި އޮސްޓްރޭލިއާ އަދި ނިއުޒީލެންޑުން ވަނީ ކަންބޮޑުވުން ފާޅުކޮށްފައެވެ.

ޕީޕަލްސް ލިބަރޭޝަން އާމީ ނޭވީގެ ނިއުކްލިއާ ސަބްމެރީނުން ޑަމީ ވޯހެޑެއް އެޅި މިސައިލް ފޮނުވައިލީ މެންދުރުގައި ކަމަށާއި މިސައިލް ވެއްޓުނީ ކަނޑައެޅި ސަރަޙައްދަށް ކަމަށް ޝިންހުއާއިން ބުނެފައިވެއެވެ. ނަމަވެސް ސީދާ ވެއްޓުނު ތަނުގެ ތަފްސީލެއް ހާމަކޮށްފައެއް ނުވެއެވެ. ޝިންހުއާއިން ސިފަކުރި ގޮތުގައި މިއީ ޗައިނާ ސިފައިންގެ އަހަރީ ތަމްރީނުގެ ބައެއް ކަމަށާއި ވަކި ޤައުމަކަށް ނުވަތަ ވަކި އަމާޒަކަށް އެ ޓެސްޓު އަމާޒުކޮށްފައި ނުވާ ކަމަށެވެ.

އޮސްޓްރޭލިއާގެ ޚާރިޖީ ވަޒީރު ޕެނީ ވޮންގް ވިދާޅުވީ ޗައިނާއިން ޓެސްޓުގެ މަޢުލޫމާތު ކުރިން އޮސްޓްރޭލިއާ ސަރުކާރަށް އެންގި ކަމަށާއި ނަމަވެސް މި ޓެސްޓަކީ ސަރަޙައްދު "ހަލަބޮލިކުރާ" ކަމެއް ކަމަށެވެ.

"މި ޓެސްޓު ހުށަހެޅިފައި މި ވަނީ ޗައިނާއިން ހަލުވިކަމާ އެކު އަސްކަރީ ބާރު ގަދަކުރަމުންދާ ދަނޑިވަޅެއްގައި އެ ކަމުގެ މަޤުޞަދާ މެދު ސަރަޙައްދުން އެދޭ ހާމަކަމެއް ނެތި" ކަމަށް ވޮންގް ފީޖީގެ ވެރިރަށް ސޫވާގައި ބޭއްވި ނޫސް ކޮންފަރެންސެއްގައި ވިދާޅުވިއެވެ.

ޖަޕާނުން ބުނީ މިސައިލް ޓެސްޓުގެ މައުލޫމާތު ލިބިފައިވާ ކަމަށާއި އެ ޤައުމުން ޗައިނާއަށް އެ ކަން އަލުން ވިސްނައިލުމަށް ގޮވައިލާ ކަމަށެވެ.

"ޗައިނާ ސިފައިންގެ ހަރަކާތްތައް އިތުރުވުމާ މެދު ބޮޑު ކަންބޮޑުވުމެއް ފާޅުކޮށްފައިވާ" ކަމަށް ޖަޕާނުން ބުނެފައިވެއެވެ. ކިޔޯޑޯ ނޫސް އެޖެންސީން ޖަޕާން ސަރުކާރުގެ މަސްދަރަކާ ހަވާލާދީ ރިޕޯޓުކުރި ގޮތުގައި މިސައިލް ވެއްޓުނީ ޖަޕާނުގެ ޚާއްޞަ އިޤުތިޞާދީ ސަރަޙައްދުން ބޭރަށެވެ.

ނިއުޒީލެންޑުގެ ޚާރިޖީ ވަޒީރު ވިންސްޓަން ޕީޓާސް ނެރުއްވި ބަޔާނެއްގައި ވިދާޅުވީ މި ޓެސްޓާ މެދު ނިއުޒީލެންޑުން ވަރަށް ބޮޑަށް ކަންބޮޑުވާ ކަމަށެވެ.

"ނިއުޒީލެންޑުން ދެކެނީ މިއީ ބޭނުންނުވާ އަދި ކަންބޮޑުވާ ކުރިއެރުމެއް ކަމަށް. ޕެސިފިކް ސަރަޙައްދުގެ އެހެން ޤައުމުތަކެކޭ އެއްފަދައިން މިސައިލް ޤާބިލުކަން ޓެސްޓުކުރާ ތަނެއްގެ ގޮތުގައި ސައުތު ޕެސިފިކް ބޭނުންކުރުމަކީ އަޅުގަނޑުމެން ބޭނުންވާ ކަމެއް ނޫން" ކަމަށް ޕީޓާސް ވިދާޅުވިއެވެ.

ޗައިނާއިން އެންމެ ފަހުން ބައްރުތައް ހުރަސްކުރާ ބެލިސްޓިކް މިސައިލެއް (އިންޓަކޮންޓިނެންޓަލް ބެލިސްޓިކް މިސައިލް) ޓެސްޓުކޮށްފައި ވަނީ 2024 ވަނަ އަހަރުގައެވެ.