ޑޮލަރު އާމްދަނީގެ 40 އިންސައްތަ މާރުކުރުވުމުން އިންވެސްޓަރުންގެ އިތުބާރު ގެއްލޭނެ ކަމަށް ނަޝީދު ވިދާޅުވެއްޖެ

ރިސޯޓުތަކުން ހޯދާ ޑޮލަރު އާމްދަނީގެ 40 އިންސައްތަ އެމްއެމްއޭ މެދުވެރިކޮށް މާރުކުރަން ލާޒިމުކުރާ ސިޔާސަތަކީ ފަތުރުވެރިކަމުގެ ސިނާއަތަށް ދިގު މުއްދަތެއްގައި ގެއްލުންވާނެ ކަމެއް ކަމަށް ވިދާޅުވެ ކުރީގެ ރައީސް މުޙައްމަދު ނަޝީދު ކަންބޮޑުވުން ފާޅުކުރައްވައިފިއެވެ.

އެކްސްގައި ކުރެއްވި ޕޯސްޓެއް މެދުވެރިކޮށް ނަޝީދު ވިދާޅުވީ ގިނަ ރިސޯޓުތަކަކީ ޑޮލަރުން އަދާކުރަން ޖެހޭ ބޮޑެތި ދަރަނި ހުރި ތަންތަން ކަމަށެވެ. އެ ވިޔަފާރިތަކުގެ ބޮޑު ބައެއް ބޭންކު ލޯނު ނަގައިގެން ފައިނޭންސްކޮށްފައިވާ ބޭރުގެ އިންވެސްޓްމަންޓުތައް ކަމުން ޑޮލަރު އާމްދަނީގެ މިހާ ބޮޑު ނިސްބަތެއް މާރުކުރުވައިފިނަމަ އެ ފަރާތްތަކަށް ލިބޭ ފައިދާ ކުޑަވެ ރާއްޖެއާ މެދު ޝައުގުވެރިކަން ދަށްވެދާނެ ކަމަށް ވެސް އެމަނިކުފާނު ވިދާޅުވިއެވެ.

"ރިސޯޓްތަކަށް ލިބޭ ޔޫއެސް ޑޮލަރުގެ އާމްދަނީގެ 40 އިންސައްތަ އެމްއެމްއޭ އަށް މާރުކުރަން މަޖުބޫރުކުރުމަކީ އިގުތިސާދީ ގޮތުން ނޭދެވޭ ބޮޑެތި ނަތީޖާތަކެއް ނުކުމެދާނެ ސިޔާސަތެއް. ގިނަ ރިސޯޓްތަކަކީ ޑޮލަރުން އަދާކުރަންޖެހޭ ބޮޑެތި ދަރަނިތަކެއް އޮތް ތަންތަން," ނަޝީދު ވިދާޅުވެފައިވެއެވެ.

"ބޭރުގެ އިންވެސްޓަރުން ރާއްޖެއަށް ޝައުގުވެރިވި މައިގަނޑު ސަބަބަކީ ވާދަވެރި ރަނގަޅު ފައިދާއެއް ލިބޭތީ. އެ ހިތްވަރު ގެއްލުވައިލުމަކީ އިންވެސްޓަރުންގެ އިތުބާރަށާއި ފަތުރުވެރިކަމުގެ ދާއިރާގެ ދިގު މުއްދަތުގެ ހަމަޖެހުމަށް އޮތް ނުރައްކަލެއް," ނަޝީދު ވިދާޅުވެފައިވެއެވެ.

ނަޝީދު މި ވާހަކަ ދައްކަވާފައި ވަނީ ރިސޯޓުތަކުން ޑޮލަރު މާރުކުރަން ޖެހޭ ނިސްބަތް 20 އިންސައްތައިން 40 އިންސައްތައަށް ބޮޑުކުރުމަށް ބޭރު ފައިސާގެ ޤާނޫނަށް އިސްލާހު ހުށަހެޅުމަށް ނިންމާފައިވާ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު އިއްޔެ ވިދާޅުވެފައި ވަނިކޮށެވެ. ގަވަރުނަރު ފާހަގަކުރެއްވި ގޮތުގައި ކޮންމެ ތިން މަހަކުން ޑޮލަރު މާރުކުރާ ގޮތަށް އޮތް އޮތުން ކޮންމެ މަހަކު މާރުކުރަން ޖެހޭ ގޮތަށް ބަދަލުކުރުމަށް ވެސް ހުށަހެޅުއްވުމަށް ވަނީ ނިންމައިފައެވެ. ހަމައެހެންމެ ޑޮލަރުގެ އަގު މިހާ ބޮޑަށް މައްޗަށް ދާން ޖެހޭ ސަބަބެއް ނެތް ކަމަށާއި ފަހަތުގައި ވަނީ ސްޕެކިއުލޭޝަން ކަމަށް ގަވަރުނަރު ވިދާޅުވެފައިވެއެވެ.

މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ވެސް ވަނީ މި ކަމާ މެދު ކަންބޮޑުވުން ފާޅުކޮށް ބަޔާނެއް ނެރެފައެވެ. މަޓީން ބުނި ގޮތުގައި ފައިސާ މާރުކުރުމުގެ ޝަރުތުތަކާ ގުޅޭ ގޮތުން މި މަހުގެ ކުރީކޮޅު ގަވަރުނަރާ ބައްދަލުކުރި އިރު އެމްއެމްއޭއިން ހުށަހެޅީ ކެޓަގަރީ އޭގެ ހުރިހާ ތަނަކުން 20 އިންސައްތަ މާރުކުރާ ގޮތަށް ބަދަލުކުރުމަށެވެ. ނަމަވެސް އެ ބައްދަލުވުމާ ޖެހިގެން މާ ގިނަ ދުވަހެއް ނުވެ ނިސްބަތް 40 އިންސައްތައަށް ބޮޑުކުރުމަށް ހުށަހެޅުމަކީ ރިސޯޓުތަކަށް ތަހައްމަލުކުރެވޭނެ ބުރައެއް ނޫން ކަމަށް އެ ޖަމިއްޔާއިން ބުނެފައިވެއެވެ.