ސީރިއަލް ޕެކެޓުގައި 3.9 މިލިއަން ރުފިޔާގެ ފައިސާ ބޭރުކުރަން އުޅުނު ހަ މީހަކު 30 ދުވަހަށް ބަންދުކޮށްފި

ވެލާނާ އިންޓަރނޭޝަނަލް އެއާޕޯޓުން ސީރިއަލް ޕެކެޓުތަކެއްގެ ތެރޭގައި ފޮރުވައިގެން 3.9 މިލިއަން ރުފިޔާގެ ބޭރު ފައިސާ ރާއްޖެއިން ބޭރުކުރަން މަސައްކަތްކުރި ބަންގްލަދޭޝްގެ ހަ މީހެއްގެ ބަންދު މުއްދަތު ކޯޓުން 30 ދުވަހަށް އިތުރުކޮށްފިއެވެ.

މަނީ ލޯންޑަރިންގެ ތުހުމަތުގައި މި ހަ މީހުން ފުރަތަމަ ހައްޔަރުކުރީ ސެޕްޓެމްބަރު 18 ވަނަ ދުވަހުއެވެ. ބޭރު ފައިސާ ގަވާއިދާ ޚިލާފަށް ގަނެވިއްކުމުގެ މައްސަލަތައް ބެލުމަށް ޚާއްޞަ ޓާސްކްފޯހަކަށް ލިބުނު މަޢުލޫމާތެއްގެ މައްޗަށް ހިންގި އޮޕަރޭޝަނެއްގައި ހިފެހެއްޓި ފައިސާގެ ތެރޭގައި 174,161 ޔޫއެސް ޑޮލަރާއި 56,760 ޔޫރޯ އާއި 1,815 ސްޓާލިންގ ޕައުންޑް ހިމެނޭ ގޮތަށް 18 ޤައުމެއްގެ ފައިސާ ހިމެނެއެވެ.

ބަންދު އަމުރުން އެނގޭ ގޮތުގައި މި ކަމުގައި އެންމެ އިސް ދައުރެއް އަދާކުރި ކަމަށް ބެލެވެނީ އުމުރުން 37 އަހަރުގެ އަޖްގަރު މިރިދާއެވެ. އޭނާ ބުނެފައިވާ ގޮތުގައި އޭނާއަކީ އަތޮޅުތެރޭ ރަށެއްގައި ހަތް ހާސް ރުފިޔާގެ މުސާރައަކަށް މޭސަނެއްގެ ގޮތުގައި މަސައްކަތްކުރާ މީހެކެވެ. ބަންގްލަދޭޝަށް ނުގޮސް ދެތިން އަހަރު ފާއިތުވެފައިވާ ކަމަށް ވެސް އޭނާ ބުނެފައިވެއެވެ. ނަމަވެސް އެއާޕޯޓުން 31 އަހަރުގެ ރަޖީބް ކިޔާ މީހަކާ ދިމާވެ، ލަގެޖު ބަރުދަން އިތުރުވާތީ އެހީތެރިވެދިނުމަށް އެދުނީ ކަމަށާއި ރަޖީބަކީ ކުރިން ދަންނަ މީހެއް ނޫން ކަމަށް އަޖްގަރު ބުނެފައިވެއެވެ. އެ ތަނުގައި ތިއްބައި އިތުރު ބަންގްލަދޭޝް މީހަކު ވެސް އައިސް މުދާތަކެއް ގެންގޮސްދިނުމަށް އެދުނު ކަމަށާއި ފައިސާ ފެނުނީ އެ ލަގެޖުން ކަމަށް ވެސް އޭނާ ބުނެފައިވެއެވެ.

ހައްޔަރުކުރި އެހެން މީހުންގެ ތެރެއިން 35 އަހަރުގެ މުހައްމަދު މައިނުއްދީން ސަލާހު ބުނީ ރަސެލް ކިޔާ މީހަކު ފުރުވަން ދިޔައީ ކަމަށެވެ. އުމުރުން 38 އަހަރުގެ މުހައްމަދު އަބްދުﷲ ބުނީ ބަންގްލަދޭޝުން އައި މީހަކު ބަލާ ދިޔައީ ކަމަށެވެ. އަދި 28 އަހަރުގެ އެމްޑީ މޮހިއްދީން ޗޯދުރީ ބުނެފައިވަނީ ރައްޓެއްސަކު ފުރުވަން ދިޔައީ ކަމަށެވެ.

މި ހަ މީހުންގެ މައްޗަށް ކުރެވޭ މަނީ ލޯންޑަރިންގެ ތުހުމަތާ ގުޅިގެން ކޯޓުން ވަނީ 30 ދުވަހުގެ ބަންދު މުއްދަތެއް ކަނޑައަޅައިފައެވެ.