ކޭބަލަށް ގެއްލުންދޭ ފަރާތްތަކުގެ އަތުން މަރާމާތުގެ ޚަރަދު ނަގަން ސްޓެލްކޯއިން ނިންމައިފި

މަގު ކޮނުމުގެ މަސައްކަތުގެ ތެރޭގައި ކަރަންޓު ކޭބަލްތަކަށް ގެއްލުންދީ ޚިދުމަތް މެދުކެނޑޭ ހާދިސާތައް ގިނަވަމުންދާތީ، އެފަދަ ގެއްލުމެއް ދިން ފަރާތެއްގެ އަތުން މަރާމާތުގެ ޚަރަދު ހޯދުމަށް ސްޓެލްކޯއިން ނިންމައިފިއެވެ.

އެ ކުންފުނިން ބުނީ ކަރަންޓު ވިއުގައިގައި ހިމެނޭ ކޭބަލްތަކަށް މަގު ކޮނުމުގައި ހަރަކާތްތެރިވާ ފަރާތްތަކުގެ އިހުމާލުން ލިބޭ ގެއްލުމުގެ ސަބަބުން ކަރަންޓު ކެނޑޭ ހާލަތްތައް ދުވަހެއް ދުވަހަކަށް އިތުރުވެ، ރައްޔިތުންނަށް ބޮޑެތި ތަކުލީފުތަކާ ކުރިމަތިލާން ޖެހެމުންދާ ކަމަށެވެ. އެހެންވެ، ކޭބަލަކަށް ގެއްލުން ލިބިއްޖެ ހާލަތެއްގައި އެ ކޭބަލް މަރާމާތުކޮށް އަލުން ޚިދުމަތް ފެށުމަށް ހިނގާ ޚަރަދު، އިހުމާލުވީ ފަރާތުގެ އަތުން ހޯދުމަށް ނިންމީ ކަމަށް ސްޓެލްކޯއިން ބުނެފައިވެއެވެ.

މި ފިޔަވަޅު އެޅީ ކަރަންޓު ކެނޑުމުން ޢާންމު ރައްޔިތުންނަށް ލިބޭ ދަތިތައް ކުޑަކޮށް، ދެމެހެއްޓެނިވި ގޮތެއްގައި ޚިދުމަތުގެ ފެންވަރު ހިފެހެއްޓުމުގެ މަޤުޞަދުގައި ކަމަށް ވެސް އެ ކުންފުނިން ބުނެފައިވެއެވެ. އެއާ އެކު މަގު ކޮނުމުގެ މަސައްކަތް ކުރާ ހުރިހާ ފަރާތްތަކުން ވެސް ކަރަންޓު ވިއުގައަށް ގެއްލުން ނުލިބޭނެ ގޮތަށް ޒިންމާދާރުކަމާ އެކު މަސައްކަތް ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.

މިދިޔަ ހަފުތާގެ ބުރާސްފަތި ދުވަހާއި ހޮނިހިރު ދުވަހު ވެސް މަގު ކޮނުމުގެ ތެރޭގައި ކޭބަލަށް ގެއްލުންވެ ހުޅުމާލެއިން ކަރަންޓު ކެނޑިފައިވެއެވެ.