މެރިކަލްޗާ ސަރަޙައްދުތައް ހުޅުވައިލުމަށް ބޭނުންވާ ޤަވާއިދުތައް އޮކްޓޫބަރުގައި ނިންމާނެ ކަމަށް ވަޒީރު ވިދާޅުވެއްޖެ

ފަޅުރަށްރަށާ ބެހޭ އައު ޤާނޫނުގެ ދަށުން އެކުލަވައިލަންޖެހޭ ޤަވާއިދުތައް އަންނަ އޮކްޓޫބަރު މަހުގެ ފުރަތަމަ ހަފުތާގެ ތެރޭގައި ނިންމައި، މެރިކަލްޗާއަށް ކަނޑައަޅާފައިވާ ސަރަޙައްދުތައް ހުޅުވައިލެވޭނެ ކަމަށް މަސްވެރިކަމާ ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.

ސަރުކާރުގެ "އަހާ" ފޯރަމުގައި ވާހަކަދައްކަވަމުން ވަޒީރު ވިދާޅުވީ ރާއްޖޭގައި އުފެއްދެން ހުރި ބާވަތްތައް ބޭރުން އެތެރެކުރާ މިންވަރު މަދުކޮށް، ކާބޯތަކެތީގެ ރައްކާތެރިކަން ޔަޤީންކުރުމަކީ ސަރުކާރުން އެންމެ ބޮޑު އިސްކަމެއް ދޭ އެއް ސިޔާސަތު ކަމަށެވެ. އެ ލަނޑުދަނޑި ހާސިލުކުރުމަށް ދަނޑުވެރިކަމާއި މެރިކަލްޗާގެ ދާއިރާއަށް ބޮޑެތި އިންވެސްޓްމަންޓްތައް ބޭނުންވާ ކަމަށާއި، ދާދި ފަހުން ތަސްދީޤުކުރެވުނު ފަޅުރަށްތަކާ ބެހޭ އައު ޤާނޫނުން އެ ކަމަށް ޙައްލު ހޯދައިދީފައިވާ ކަމަށް ވެސް ވަޒީރު ވިދާޅުވިއެވެ.

"އައު ޤާނޫނާއިއެކު އެކަމަށް ވާނެ އެޑްރެސްކޮށްފައި. ހާއްސަކޮށް އިމްޕޯޓް ރިޕްލޭސް ކުރަން ބޭނުންނަމަ، އިންޕޯޓް ކުރާ މިންވަރު ދަށް ކުރަން ބޭނުންނަމަ އިންވެސްޓމެންޓްތަކަށް ޖާގަަ ދޭންޖެހޭ. އަދި ދިވެހިރާޢްޖެއިން ބޭރުވާ ބޭރުފައިސާ އެބަހިފެހެއްޓޭ. ބޮޑެތި އިންވެސްޓްމެންޓްތައް އެބައާދޭ. އެހެންވެ ލުއިތައް ދީގެން އިންވެސްޓްމެންޓްތައް ގިނަ ކުރުމަށް އަޅުގަނޑުމެން މަސައްކަތް ކުރަނީ. " ޝިޔާމް ވިދާޅުވިއެވެ.

ވަޒީރުންގެ މަޖިލީހުން މެރިކަލްޗާ ތަރައްޤީކުރުމަށް 13 ސަރަޙައްދެއް ކަނޑައަޅާފައިވާއިރު، އެ ތަންތަނުގައި މަޝްރޫޢުތައް ހިންގުމުގެ ޝައުޤުވެރިކަން ފާޅުކޮށް ގިނަ ޢަދަދެއްގެ ޕްރޮޕޯސަލް އެ ވުޒާރާއަށް ލިބިފައިވާ ކަމަށް ވަޒީރު ހާމަކުރެއްވިއެވެ. އެހެންނަމަވެސް އެ ޕްރޮޕޯސަލްތައް އިވެލުއޭޓް ކުރެވޭނީ ޤާނޫނުގެ ދަށުން ހަދަންޖެހޭ ޤަވާއިދުތައް ފުރިހަމަވުމުން ކަމަށް ވިދާޅުވިއެވެ.

"ޤާނޫނަށް ޢަމަލުކުރަން ފެށި ޤަވާއިދުތައް ނިމޭއިރު އެ ސަރަޙައްދުތައް ވެސް ހުޅުވާލެވޭނެ. މީގެ ކުރިން އަޅުގަނޑުމެންނަށް ލިބިފައި ހުރި ޕްރޮޕޯސަލްތަކުގެ އިވެލުއޭޝަން ފެށެން އޮތީވެސް ޤަވާއިދު ނިމިގެން. އަޅުގަނޑުމެން އަމާޒު ހިފަނީ އޮކްޓޯބަރު މަހުގެ ފުރަތަމަ ހަފްތާގެ ތެރޭގައި ޤަވާއިދުތައް ނިންމައި ލިބިފައި ހުރި އަދި އަލަށް ލިބޭ ޕްރޮޕޯސަލްތަކާއެކު ކުރިއަށްދާން،" ވަޒީރު ވިދާޅުވިއެވެ.

މީގެ އިތުރުން ދަނޑުވެރިކަމުގެ ދާއިރާ ކުރިއެރުވުމަށް މީހުން ދިރިއުޅޭ 10 ރަށަކާ ގުޅިގެން ޚާއްޞަ މަސައްކަތްތަކެއް ފެށިފައިވާ ކަމަށް ވެސް ވަޒީރު ވިދާޅުވިއެވެ.