ސެޕްޓެމްބަރުގައި މިފްކޯއަށް ކިރުވި މަހާއި ދެއްކި ފައިސާ ދަށަށް ގޮސްފި

މިފްކޯއިން ސެޕްޓެމްބަރު މަހު ގަތް މަހުގެ މިންވަރާއި މަސްވެރިންނަށް ދޫކުރި ފައިސާ އޮގަސްޓު މަހާ އަޅައިބަލާއިރު މަދުވެފައިވާކަން އެ ކުންފުނީގެ ތަފާސްހިސާބުތަކުން ހާމަވެއްޖެއެވެ.

އެ ކުންފުނީގެ ހިސާބުތައް ދައްކާ ގޮތުން ސެޕްޓެމްބަރު މަހު 451 ދޯންޏަކުން ޖުމުލަ 1288.42 ޓަނުގެ މަސް ކިރުވައިފައިވެއެވެ. އޭގެ ތެރެއިން 1284.1 ޓަނަކީ ކަޅުބިލަމަހެވެ. 10 ކިލޯއިން މަތީ ކަންނެލީގެ 0.5 ޓަނާއި 15 ކިލޯއިން މަތީ ކަންނެލީގެ 3.8 ޓަނު ހިމެނިފައިވެއެވެ. އެ މަހު މަސްވެރިންނަށް ދޫކޮށްފައިވަނީ 27.32 މިލިއަން ރުފިޔާއެވެ. އޮގަސްޓު މަހު 535 ދޯންޏަކުން 1488.30 ޓަނު ކިރުވައި 29.99 މިލިއަން ރުފިޔާ ދޫކޮށްފައިވާތީ ދެ މަހުގެ ދެމެދުގައި 2.67 މިލިއަން ރުފިޔާގެ ފަރަގެއް އެބަ އޮތެވެ.

ކަޅުބިލަމަހުގެ އަގަށް ބަލާއިރު އޮގަސްޓު މަސް ނިމުނުއިރު ކިލޯއެއް ގަންނަ އަގު 21 ރުފިޔާގައި ހުރި ނަމަވެސް ސެޕްޓެމްބަރު ނިމެންވާއިރަށް އެ އަގު ވަނީ 22 ރުފިޔާއަށް އުފުލައިފައެވެ. ދެ މަހުގައި ވެސް 10 ކިލޯއާއި 15 ކިލޯއާ ދެމެދުގެ ބޮޑުކަންނެލި ކިލޯއެއްގެ އަގު 20 ރުފިޔާގައި އަދި 15 ކިލޯއިން މަތީ ބޮޑުކަންނެލީގެ އަގު 25 ރުފިޔާގައި ހިފެހެއްޓިފައިވެއެވެ.

މި އަހަރު އެންމެ ރަނގަޅު ނަތީޖާ ފެނިފައިވަނީ އެޕްރީލް މަހުންނެވެ. އެ މަހު 4.41 ޓަނުގެ މަސް ކިރުވައި މަސްވެރިންނަށް 78.78 މިލިއަން ރުފިޔާ ދޫކޮށްފައިވެއެވެ. އެއާ ޚިލާފަށް އެންމެ ދަށް މަހަކީ ޖޫން މަހެވެ. އެ މަހު ކިރުވީ 568 ޓަނުގެ މަހެވެ. މަސްވެރިންނަށް ލިބިފައިވަނީ 11.33 މިލިއަން ރުފިޔާއެވެ.