ގޯއްޗާއި ފުލެޓް ފޯމުތަކުގައި މައްސަލަ ހުރިނަމަ ލިޔެކިޔުން ހުށަހެޅުމަށް ހަތް ދުވަސް ލިބޭނެ

ބޯހިޔާވަހިކަން އެންމެންނަށް ސިޔާސަތުގެ ދަށުން މާލޭ ސަރަޙައްދުން ގޯއްޗާއި ފުލެޓަށް އެދި ހުށަހެޅި އެޕްލިކޭޝަންތައް ވެރިފައިކުރުމުގެ ތެރޭގައި ފާހަގަވާ މައްސަލަތަކާ ގުޅިގެން އިތުރު ލިޔެކިޔުން ހުށަހެޅުމަށް ކަލަންޑަރު ހަތް ދުވަހުގެ ފުރުޞަތެއް ދޭނެ ކަމަށް ހައުސިން ވުޒާރާއިން މިއަދު ބުނެފިއެވެ.

އެ ވުޒާރާއިން ނެރުނު އިޢުލާނުގައި ބަޔާންކޮށްފައިވާ ގޮތުގައި ފޯމުތަކުގެ ވެރިފިކޭޝަން މަރުޙަލާ މިހާރު ކުރިއަށް ދެއެވެ. އެ މަސައްކަތުގައި ފޯމުގައި ހިމެނޭ މަޢުލޫމާތާއި ސަރުކާރުގެ ކަމާ ގުޅޭ އިދާރާތަކާއި ކައުންސިލުތަކުން ލިބިފައިވާ މަޢުލޫމާތާ ދެމެދު ފުށުއެރުމެއް ފެނިއްޖެނަމަ "ބޯހިޔާވަހިކަން" ޕޯޓަލް މެދުވެރިކޮށް ފޯމު ހުށަހެޅި ފަރާތަށް އެކަން އަންގައެވެ. ޕޯޓަލްގައި އެޕްލިކޭޝަނަށް އަންނަ ބަދަލެއް ވާނަމަ ފޯމު ފުރިއިރު ދީފައިވާ މޮބައިލް ނަންބަރަށް އެސްއެމްއެސް ވެސް ފޮނުވާނެ ކަމަށް އެ އިޢުލާނުގައިވެއެވެ.

ވުޒާރާއިން ފޮނުވާ ނޯޓިސްގައިވާ މަޢުލޫމާތު ސައްޙަ ނޫން ކަމަށް ޤަބޫލުކުރެވޭނަމަ ނުވަތަ އެ ނިންމުމަށް އިޢުތިރާޒުކުރާނަމަ ހަތް ދުވަހުގެ ތެރޭގައި ގުޅުން ހުރި ލިޔެކިޔުންތައް ޕޯޓަލް މެދުވެރިކޮށް ހުށަހެޅުމަށް ވުޒާރާއިން ވަނީ އެދިފައެވެ. ކަނޑައެޅި މުއްދަތުގައި ޖަވާބެއް ނުދީފިނަމަ އެ އެޕްލިކޭޝަނަކީ ޝަރުޠު ހަމަނުވާ ނުވަތަ ފުރިހަމަ ނޫން ފޯމެއްގެ ގޮތުގައި ބެލެވޭނެ ކަމަށް ވެސް ވުޒާރާއިން ވަނީ ހާމަކޮށްފައެވެ. ހަމައެއާއެކު ޖަވާބު ހުށަހެޅުމުގައި ބޭނުންކުރެވޭނީ ހަމައެކަނި ބޯހިޔާވަހިކަން ޕޯޓަލް ކަމަށާއި އީމެއިލް ނުވަތަ ސިޓީ ފަދަ އެހެން ވަސީލަތެއް މެދުވެރިކޮށް ހުށަހަޅާ ޖަވާބެއް ޤަބޫލުނުކުރާނެ ކަމަށް އެ ވުޒާރާއިން ވަނީ އަންގައިފައެވެ.

ފޯމުތަކުގެ ކްރޮސް ވެރިފިކޭޝަންގެ މަސައްކަތް ހައުސިން ވުޒާރާއިން ފެށީ ޖޫން 22 ގައެވެ. ފޯމު ހުށަހެޅުމުގެ މުއްދަތު ހަމަވިއިރު ޖުމްލަ 58,505 ފޯމު ލިބިފައިވާ ކަމަށް އެ ވުޒާރާއިން ހާމަކޮށްފައިވެއެވެ. އޭގެ ތެރެއިން 35,930 ފޯމަކީ ފުލެޓަށް އެދި ހުށަހެޅި ފޯމެވެ. އަދި 22,575 ފޯމު ހުށަހަޅާފައި ވަނީ ގޯއްޗަށް އެދިއެވެ.

މި ސްކީމުގެ ދަށުން 7,900 ފުލެޓާއި 1,250 އަކަފޫޓުގެ 15,000 ގޯތި ދޫކުރުމަށް ސަރުކާރުން ނިންމާފައިވާއިރު ފުލެޓް ލިބޭ ފަރާތްތައް މި އަހަރުގެ ތެރޭގައި ކަނޑައަޅައި އެކަން އިޢުލާނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިން ވިދާޅުވެފައިވެއެވެ.