ކުންފުނިތަކުން ވަކިކުރާ މީހުންނަށް ވިޔަފާރި ފެށުމަށް 600 މިލިޔަން ރުފިޔާގެ ފަންޑެއް ޤާއިމުކޮށްފި

ސަރުކާރު ހިއްސާވާ ކުންފުނިތައް ކުޑަކުރުމުގެ މަސައްކަތުގެ ތެރެއިން ވަޒީފާ ގެއްލޭ މުވައްޒަފުންނަށް އަމިއްލަ ވިޔަފާރިއެއް ފެށުމުގެ މަގު ތަނަވަސްކޮށްދިނުމަށް "ކުމެވި" ގެ ނަމުގައި 600 މިލިޔަން ރުފިޔާގެ ފަންޑެއް ޤާއިމުކޮށްފައިވާ ކަމަށް މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ޙަސަން ޒަރީރު ވިދާޅުވެއްޖެއެވެ.

ރައްޔިތުންގެ މަޖިލީހުގައި ވާހަކަފުޅު ދައްކަވަމުން ވަޒީރު ވިދާޅުވީ ދައުލަތުގެ ކުންފުނިތައް މާލީ ގޮތުން ހަރުދަނާކުރުމަށް ރީސްޓްރަކްޗަރ ކުރާ މަރުހަލާގައި ވަޒީފާއިން ވަކިކުރެވޭ ފަރާތްތަކަށާއި އަމިއްލައަށް ވަކިވާ ފަރާތްތަކަށް އެހީތެރިވުމުގެ ޕްލޭނެއް ރާވާފައިވާ ކަމަށެވެ. ކުންފުނިތަކުން މީހުން ވަކިކުރުމުގެ ކުރިން އެ މީހުންނަށް އެހެން ގޮތްތައް ހޯދައިދީފައިވާ ކަމަށް ވެސް ވަޒީރު ވިދާޅުވިއެވެ.

އެސްއެމްއީ ޑިޖިޓަލް މެދުވެރިކޮށް ހިންގާ މި ފަންޑުން ފައިސާ ލިބޭނީ ޕްރޮޕޯސަލް ހުށަހެޅުމުން އެ ޕްރޮޕޯސަލް ބެލުމަށްފަހު ކަމަށް ވަޒީރު ވިދާޅުވިއެވެ. ލޯނަށް ބޭނުންވާ ޕްރޮޕޯސަލް ތައްޔާރުކުރުމުގެ މަސައްކަތް ބީސީސީ މެދުވެރިކޮށް ކޮށްދެވޭނެ ކަމަށް ވެސް އެ މަނިކުފާނު ފާހަގަކުރެއްވިއެވެ. މި ފަންޑުގައި ހިމެނޭ ފައިސާއަކީ އެސްއެމްއީ ޑިޖިޓަލްގައި ކުރިން ވެސް ހުރި ފައިސާ ކަމަށް ވަޒީރު ވިދާޅުވިއެވެ.

"600 މިލިއަން ރުފިޔާގެ ފަންޑެއް ގޤާއިމްކުރެވިފައިވާ ވާހަކަ އަޅުގަނޑު ދެންނެވީ އެއީ ކުދި ވިޔަފާރިތަކަށް އަދި އަލަށް ވިޔަފާރި ފަށަން ބޭނުންވާ ފަރާތްތަކަށް ފެސިލިޓޭޓް ކޮށްދިނުމަށް. އެހެންވީމާ ކޮންމެ ބޭފުޅަކުވެސް އެ ބޭފުޅަކު އަމިއްލަ މަސައްކަތެއް ކުރައްވަން ބޭނުންފުޅުވާނަމަ އެކަމަށް ޕްރޮޕޯސަލް ހުށަހެޅީމާ [ލިބޭ ގޮތަށް] އަޅުގަނޑުމެން އެސްއެމްއީ ޑިޖިޓަލް މެދުވެރިކޮށް މި ފެސިލިޓީ މި ތައާރަފްކުރީ." ޒަރީރު ވިދާޅުވިއެވެ.

ވަޒީރު ވިދާޅުވި ގޮތުގައި މި ސިޔާސަތުގެ ބޭނުމަކީ ސަރުކާރުގެ އިދާރާތަކާއި ކުންފުނިތަކުގެ ވަޒީފާއަށް ބަރޯސާވުން ކުޑަކޮށް ޒުވާނުންނަށް އަމިއްލަ ވިޔަފާރީގެ ޒަރީއާއިން އާމްދަނީ ހޯދުމުގެ ފުރުސަތު ފުޅާކޮށްދިނުން ކަމަށެވެ.