މި އަހަރުގެ ނުވަ މަސް ތެރޭ މުދަލު ޒަކާތުގެ ގޮތުގައި 109 މިލިއަން ރުފިޔާ ލިބިއްޖެ

މި އަހަރުގެ ސެޕްޓެމްބަރު މަހުގެ ނިޔަލަށް މުދަލު ޒަކާތުގެ ގޮތުގައި 109.26 މިލިއަން ރުފިޔާ ބަލައިގެންފައިވާއިރު، އެ ޢަދަދަކީ މިދިޔަ އަހަރު މުޅި ޖުމުލަ ލިބުނު ޢަދަދަށްވުރެ ވެސް އިތުރު ޢަދަދެއް ކަމަށް ތަފާސް ހިސާބުތަކުން ދައްކައިފިއެވެ.

2026 ވަނަ އަހަރުގެ ޖެނުއަރީ އެކަކުން ފެށިގެން ސެޕްޓެމްބަރު 30 ގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109,262,025.69 ރުފިޔާ ލިބިފައިވެއެވެ. 2025 ވަނަ އަހަރު މުޅި އަހަރު ދުވަހު ލިބިފައި ވަނީ 106,456,071.00 ރުފިޔާ ކަމަށްވާތީ، މި އަހަރުގެ ނުވަ މަސް ދުވަހުގެ ޢަދަދު ވަނީ އެއަށްވުރެ 2,805,954.69 ރުފިޔާ އިތުރުވެފައެވެ. މިއީ ގާތްގަނޑަކަށް %2.64 ގެ ކުރިއެރުމެކެވެ.

ދިވެހި ރުފިޔާއިން ޖުމުލަ 108,739,116.62 ރުފިޔާ ލިބިފައިވާއިރު، 34,021.41 ޔޫ.އެސް ޑޮލަރު ވެސް މުދަލު ޒަކާތުގެ ގޮތުގައި ލިބިފައިވެއެވެ.

މިދިޔަ އަހަރުގެ ޖުމުލަ ޢަދަދު ފަހަނައަޅައި ގޮސްފައި މި ވަނީ މި އަހަރު ނިމެން އަދި ތިން މަސް ދުވަސް ބާކީ އޮއްވައެވެ. އެހެންކަމުން އޮކްޓޫބަރުން ފެށިގެން ޑިސެމްބަރުގެ ނިޔަލަށް ލިބޭ ފައިސާއާ އެކު މި އަހަރުގެ ޖުމުލަ ޢަދަދު އިތުރަށް މައްޗަށް ދާނެއެވެ.