ވިތުހޯލްޑިންގ ޓެކްސް %10 އަށް ބަދަލުކުރުމުން ދިވެހި ކޮންޓްރެކްޓަރުންނަށް އިންސާފު ލިބޭނެ ކަމަށް ވަޒީރު ވިދާޅުވެއްޖެ

ރާއްޖޭގައި ވަޒަންވެރިނުވާ ބޭރުގެ ކޮންޓްރެކްޓަރުންގެ އަތުން ނަގާ ވިތުހޯލްޑިންގ ޓެކްސް %5 އިން %10 އަށް ބޮޑުކުރުމަށް ހުށަހެޅި އިސްލާޙާ ގުޅޭ ގޮތުން ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބް ތާއީދު ފާޅުކުރައްވައިފިއެވެ.

އެކްސްގައި ޙިއްޞާކުރެއްވި ޕޯސްޓެއްގައި ވަޒީރު ވިދާޅުވީ 2021 ވަނަ އަހަރުގެ ޖުލައި 20 ގައި ކުރީގެ ރައީސް އިބްރާހީމް މުޙައްމަދު ޞާލިޙު އެ ރޭޓު %10 އިން %5 އަށް ތިރިކުރައްވައި ޤާނޫނު އިސްލާޙު ތަޞްދީޤުކުރެއްވި ކަމަށެވެ. އެ ބަދަލުގެ ސަބަބުން ރާއްޖޭން ބޭރުގެ ކޮންޓްރެކްޓަރުން މީރާއަށް ދައްކަންޖެހޭ މިންވަރު ދިވެހި ކޮންޓްރެކްޓަރުންނާ އަޅައިބަލާއިރު ކުޑަވެ ޓެކްސްގެ ގޮތުން ބޮޑު ލުޔެއް ބޭރު ފަރާތްތަކަށް ލިބިގެންދިޔަ ކަމަށް ވަޒީރު ފާހަގަކުރެއްވިއެވެ.

ވަޒީރު މުއްޠަލިބް ސިފަކުރެއްވި ގޮތުގައި މި ރޭޓު އަނެއްކާވެސް %10 އަށް ރުޖޫޢަކުރުމަކީ ދިވެހި ކޮންޓްރެކްޓަރުންނާ ބޭރުގެ ކޮންޓްރެކްޓަރުންނާ ދެމެދު ގެއްލިފައި އޮތް ހަމަހަމަކަން އިޢާދަކުރުމަށް އެޅޭ މުހިންމު ފިޔަވަޅެކެވެ. އެ ބަދަލާ އެކު ދިވެހި ވިޔަފާރިވެރިންނަށް އާމްދަނީ ހޯދުމުގެ ހަމަހަމަ މާޙައުލެއް ޤާއިމުވާނެ ކަމަށް ވިދާޅުވިއެވެ.

ޤާނޫނަށް ހުށަހެޅި އިސްލާޙުގައި ބަޔާންކޮށްފައިވާ ގޮތުން ރާއްޖޭގައި ވިޔަފާރިކުރާ ފަރާތަކުން ރާއްޖޭގައި ވަޒަންވެރިނުވާ ކޮންޓްރެކްޓަރަކަށް ދައްކާ ފައިސާގެ %10 ވިތުހޯލްޑިންގ ޓެކްސްގެ ގޮތުގައި ދައްކަން ލާޒިމުވާނެއެވެ. މި ބަދަލާ ގުޅިގެން ދައުލަތުގެ އާމްދަނީއަށް އަހަރަކު އެވެރެޖުކޮށް 251 މިލިއަން ރުފިޔާ އިތުރުވާނެ ކަމަށް މީރާއިން ލަފާކޮށްފައިވެއެވެ.

"އާމްދަނީން ޓެކްސް ނެގުމުގެ ޤާނޫނު" އިސްލާޙުކުރުމުގެ ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ މަތިވެރި ދާއިރާގެ މެންބަރު ޙަސަން ޒަރީރެވެ.