އެޗްޑީސީއަށް 2024 ވަނަ އަހަރު ސާފު ފައިދާގެ ގޮތުގައި ދެ ބިލިއަން ރުފިޔާ ލިބިއްޖެ

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ 2024 ވަނަ އަހަރުގެ އޮޑިޓް ރިޕޯޓުން ދައްކާ ގޮތުގައި އިދާރީ ޚަރަދުތައް %12.2 ކުޑަކޮށް އެ ކުންފުންޏަށް ސާފު ފައިދާގެ ގޮތުގައި 2.01 ބިލިއަން ރުފިޔާ ހޯދައިފިއެވެ.

އޮޑިޓާ ޖެނެރަލްގެ އޮފީހުން މިދިޔަ މަހު ޝާއިޢުކުރި މި ރިޕޯޓުގައި އެޗްޑީސީގެ މާލީ ހިސާބުތަކަށް ދީފައި ވަނީ "ކްލީން އޮޕީނިއަން" އެކެވެ. އެއީ ބައިނަލްއަޤުވާމީ މިންގަނޑުތަކާ އެއްގޮތަށް އެ ހިސާބުތައް ތައްޔާރުކޮށްފައިވާ ކަމުގެ ހެއްކެކެވެ.

ނަމަވެސް 2023 ވަނަ އަހަރާ އަޅައިބަލާއިރު އާމްދަނީ ވަނީ %45.8 ދަށަށް ގޮސްފައެވެ. 2023 ގައި 6.53 ބިލިއަން ރުފިޔާ ލިބުނު ނަމަވެސް 2024 ގައި އެ ޢަދަދު ހުރީ 3.54 ބިލިއަން ރުފިޔާގައެވެ. އާމްދަނީ ދަށްވި ނަމަވެސް އެ ކުންފުނީގެ އިންވެސްޓްމަންޓް ޕްރޮޕަޓީތަކުގެ އަގު މައްޗަށް ދިއުމުން ލިބުނު 1.36 ބިލިއަން ރުފިޔާގެ ސަބަބުން ސާފު ފައިދާ ދެ ބިލިއަނަށް ވުރެ މައްޗަށް އެރީއެވެ.

ރިޕޯޓުން ފާހަގަވާ ގޮތުގައި ކުރީ ސަރުކާރުގެ ބިންވެރިޔާ ސްކީމުގެ ދަށުން ދޫކުރި ބިންތަކާ ގުޅިގެން ފިނޭންސް މިނިސްޓްރީން އެޗްޑީސީއަށް ދައްކަންޖެހޭ 2.20 ބިލިއަން ރުފިޔާ ހިމެނޭހެން ސަރުކާރު އިދާރާތަކުން ބޮޑެތި ޢަދަދުތަކެއް 2024 ނިމުނު އިރުވެސް ނުލިބި ހުއްޓެވެ.

އެ ކުންފުނީގެ ޖުމުލަ އެސެޓުގެ އަގު 2024 ނިމުނު އިރު 45.15 ބިލިއަން ރުފިޔާއަށް އެރިއިރު ރައުސްމާލު ވަނީ 30.44 ބިލިއަން ރުފިޔާއަށް އިތުރުވެފައެވެ. މި ޢަދަދުތަކުން ދައްކައިދެނީ މާލީ ގޮތުން އެޗްޑީސީ ވަރުގަދަ ކުންފުންޏެއްގެ ގޮތުގައި ދެމެހެއްޓެމުންދާ ކަމެވެ.