މަސްތުވާތަކެތީގެ 17 ކެފޭއެއް ބަންދުކޮށް، ނޮވެންބަރަށް މާލޭގެ ހުރިހާ ތަނެއް ބަންދުކުރުމަށް އަމާޒު ހިފައިފި

މަސްތުވާތަކެތީގެ ވިޔަފާރިކުރާ ކެފޭތަކުގެ ގޮތުގައި ބޭނުންކުރަމުން ދިޔަ 17 ތަނެއް ފާއިތުވި ތިން ހަތަރު މަސް ތެރޭގައި ބަންދުކޮށްފައިވާ ކަމަށާއި، މި އަހަރުގެ ނޮވެންބަރު މަހާ ހަމައަށް މާލެ ސަރަހައްދުގައި އެ ބާވަތުގެ ހުރިހާ ތަނެއް ބަންދުކުރުމަކީ ސަރުކާރުގެ އަމާޒު ކަމުގައި ހޯމް މިނިސްޓަރު ޢަލީ އިހްސާން ރޭ ވިދާޅުވެއްޖެއެވެ.

ވަޒީރުންގެ "އަހާ" ފޯރަމްގައި ވާހަކަދައްކަވަމުން އިހްސާން ވިދާޅުވީ، މަސްތުވާތަކެތީގެ މައްސަލައަށް ހައްލު ހޯދުމުގައި ދިމާވާ ބޮޑު ގޮންޖެހުމަކީ ރެއިޑްކޮށް ބަންދުކުރުމުން ވެސް އެ ތަންތަނުގައި ތަކުރާރުކޮށް ވިޔަފާރި ހިންގުން ކަމަށެވެ. އެގޮތުން ފާއިތުވި ދެ އަހަރާ ބައިގެ ތެރޭގައި އެއް ގެއެއް 140 އަށް ވުރެ ގިނަ ފަހަރު ރެއިޑްކޮށްފައިވާ ކަމަށް އެ މަނިކުފާނު ވިދާޅުވިއެވެ.

ބަންދުކުރި 17 ތަނުގެ ތެރޭގައި ހިމެނެނީ މާލޭގެ 12 ތަނާއި، އައްޑު އަތޮޅުގެ ހަތަރު ތަނާއި، ފުވައްމުލަކުގެ އެއް ތަނެވެ. ކޯޓު އަމުރެއްގެ ދަށުން ބަންދުކުރުމުން ވެސް އެ ކަން ކުރާ ނަމަ އެ ތަންތަން ދައުލަތަށް ނެގޭ ގޮތަށް ޤާނޫނަށް ބަދަލު ގެނެސްފައިވާ ކަމަށް ވެސް އިހްސާން ވިދާޅުވިއެވެ.

މީގެ އިތުރުން ފާއިތުވި ގާތްގަނޑަކަށް ދެ އަހަރާ ބައިގެ ތެރޭގައި 1.3 ޓަނުގެ މަސްތުވާތަކެތި ރާއްޖޭގެ މަގުތަކުން ނެގިފައިވާ ކަން އިހްސާން ފާހަގަކުރެއްވިއެވެ.

"އެއީ ދިވެހި ރުފިޔާއިން ކިޔާ ނަމަ، އޭގެ މަގުމަތީ އަގަކީ 1.5 ބިލިއަން ދިވެހި ރުފިޔާ. މިއީ މި ފާއިތުވި ތިން އަހަރަށް ބަލާއިރު، އޭގެ ކުރީގެ ހުރިހާ ސަރުކާރެއްގެ ފުރަތަމަ ތިން އަހަރާ ބަލާއިރު ރެކޯޑް އަދަދެއް." އިހްސާން ވިދާޅުވިއެވެ.

މަސްތުވާތަކެއްޗާ ބެހޭ ޤާނޫނަށް ގެނައި އިޞްލާޙުތައް 7 މާރިޗު 2026 އިން ފެށިގެން ޢަމަލުކުރަން ފެށިފައިވާ އިރު، އެ އިޞްލާޙުގެ ދަށުން ޝައްކުކުރެވޭ ތަންތަން 24 ގަޑިއިރަށް ބަންދުކުރުމުގެ ނޯޓިސް ދިނުމުގެ ބާރު ފުލުހުންނަށް ލިބެއެވެ. އަދި ކޯޓު އަމުރަކުން ތިން މަސް ދުވަހަށް ބަންދުކޮށްފައި ބެހެއްޓެއެވެ. މަސްތުވާތަކެތި ބޭނުންކުރުމަށް ތަނެއް ދެއްކުމާއި އެ ޚިދުމަތް ފޯރުކޮށްދިނުމަކީ ޖިނާއީ ބޮޑު ކުށެއް ކަމުގައި ޤާނޫނުގައި ކަނޑައަޅާފައިވާ އިރު، އެ ކުށް ސާބިތުވެއްޖެ ނަމަ ފަސް އަހަރުގެ ޖަލު ޙުކުމެއް އައުމާ އެކު 100,000 ރުފިޔާއާ ހަމައަށް ޖޫރިމަނާ ކުރެވެއެވެ. ހަމައެހެންމެ، އެ ތަނެއްގައި މަސްތުވާތަކެތި ބޭނުންކުރާ ކަން އެނގިހުރެ ހުއްޓުވުމަށް މަސައްކަތް ނުކުރާ ވެރިފަރާތާއި ކުއްޔަށް ހިފާ ފަރާތް އަދި ބެލެހެއްޓުމާ ހަވާލުވެ ހުރި ފަރާތް ވެސް ކުށްވެރިވާ ގޮތަށް ވަނީ ހަމަޖައްސައިފައެވެ.