ބްރެޒިލްގެ ކާލޮސް އިސްލާމްދީން ޤަބޫލުކުރި ކަމުގެ ޚަބަރު ފެތުރިއްޖެ

ބްރެޒިލާއި ރެއާލް މެޑްރިޑުގެ ކުރީގެ ތަރި ރޮބާޓޯ ކާލޮސް މީގެ ހަތަރު ހަފުތާ ކުރިން ބްރެޒިލްގައި ޝަހާދަތް ކިޔައި އިސްލާމްދީން ޤަބޫލުކުރި ކަމުގެ ވާހަކަ ފެތުރި ދުނިޔޭގެ މީޑިއާގެ ސަމާލުކަން ރޭ ހޯދައިފިއެވެ.

މި ވާހަކަ ހާމަކޮށްފައިވަނީ ތުރުކީގެ ޤާނޫނު ހަދާ މަޖިލީހުގެ މެންބަރެއް ކަމަށްވާ އަލީ ޝާހިންއެވެ. ޝާހިން ބުނާ ގޮތުގައި ކާލޮސްއަށް ޝަހާދަތް ލައިދިނީ ބްރެޒިލްގެ މުސްލިމް ޖަމާޢަތުގެ އިސް ބޭކަލެއް ކަމުގައިވާ ޝައިޚް ޖިހާދް ހަމަދާއެވެ. އިސްލާމްދީނަށް ވަނުމުގެ ކުރިން އެކި ފަހަރުމަތިން ކާލޮސް ވަނީ ޝައިޚް ޖިހާދާ ބައްދަލުކޮށްފައި ކަމަށާއި ތުރުކީގައި އޭނާއާ ވެސް ކާލޮސްއާ ދިމާވި ކަމަށް ޝާހިން ބުނެފައިވެއެވެ.

މީގެ ކުރިން ކްރިސްޓިއަން ދީނުގައި ހުރި ޢުމުރުން 53 އަހަރުގެ ކާލޮސް ދީން ބަދަލުކުރި ކަމުގެ ވާހަކައަށް ބާރު ލިބެނީ ދާދި ފަހުން މޮރޮކޯގެ އަންހެން ފުޓްބޯޅަ އެޖެންޓެއް ކަމަށްވާ ސުހައިލާ އެތަހިރީއާ ކައިވެނިކުރުމާ ގުޅިގެންނެވެ.

ސްޕެއިންގައި ދިރިއުޅޭ ސުހައިލާއާ ބެހޭ ގޮތުން ކާލޮސް ބުނީ "މިއީ ޕްރޮފެޝަނަލް ގުޅުމެއްގެ ތެރެއިން އުފެދުނު ލޯތްބެއް" ކަމަށެވެ. ކާލޮސްއަކީ ހަތް ބަނޑަށް 11 ކުދިންގެ ބައްޕައެކެވެ.

ދުނިޔެ ދުށް އެންމެ މޮޅު އެއް ވާތު ބެކް ކަމުގައިވާ ކާލޮސް ވަނީ 2002 ވަނަ އަހަރުގެ ވޯލްޑް ކަޕް ބްރެޒިލަށް ކާމިޔާބުކޮށްދިނުމުގައި މުހިންމު ދައުރެއް އަދާކޮށް ޤައުމީ ޓީމަށް 125 މެޗުން 10 ގޯލު ޖަހައިފައެވެ. ރެއާލް މެޑްރިޑުގައި 370 މެޗު ކުޅެ 47 ގޯލު ކާމިޔާބުކުރި އިރު އިޓަލީގެ އިންޓަ މިލާނާއި ތުރުކީގެ ފެނަބާޗޭއަށް ވެސް ކުޅެފައިވާ ކާލޮސް މިހާރު ހުރީ ރެއާލް މެޑްރިޑުގެ އެމްބެސެޑަރެއްގެ ގޮތުގައެވެ.