ގިރާވަރުފަޅު ހިއްކައި ނިންމުމަށްފަހު ގޯތި ހަވާލުކުރުން އަވަސްކުރާނެ ކަމަށް ސަރުކާރުން ބުނެފި

މާލޭ ރައްޔިތުންނަށް ގޯތި ދޫކުރުމަށް ހިއްކަމުން އަންނަ ގިރާވަރުފަޅުގެ ބިން ހިއްކުމުގެ މަސައްކަތް ކުރިއަށް އޮތް ތިން ހަފުތާ ތެރޭގައި ނިންމައި ގޯތި ހަވާލުކުރުމުގެ މަސައްކަތް ފެށުމަކީ އަމާޒު ކަމަށް ހައުސިން މިނިސްޓަރު ޑރ. ޢަބްދުﷲ މުއްތަލިބު މިއަދު ވިދާޅުވެއްޖެއެވެ.

ޖުމްލަ 167.15 ހެކްޓަރުގެ ބިން ހިއްކުމަށް ރާވާފައިވާ ގިރާވަރުފަޅުގައި ފުރަތަމަ ފިޔަވަހީގެ ދަށުން މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑް (އެމްއެފްއެމްސީ)ގެ ބެލުމުގެ ދަށުން 70 ހެކްޓަރު ކުރިން ވަނީ ހިއްކައިފައެވެ. ނުހިއްކައި ބާކީ އޮތް 97.15 ހެކްޓަރުގެ މަސައްކަތް މިދިޔަ ޖެނުއަރީ މަހު ފެށީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ހަވާލުކޮށްގެންނެވެ. މިހާތަނަށް އެ ކުންފުނިން 35 ހެކްޓަރުގެ ބިން ހިއްކައި ނިންމާފައިވާއިރު ދެ ފިޔަވައްސެއް އެއްކޮށް ބަލާނަމަ 105 ހެކްޓަރު މިހާރު ވަނީ ހިއްކައިފައެވެ.

ރައީސް ޑރ. މުޙައްމަދު މުޢިއްޒު މިއަދު ގިރާވަރުފަޅަށް ވަޑައިގެން މަސައްކަތް ހިނގަމުންދާ ގޮތް ބައްލަވައިލެއްވިއެވެ. އެމަނިކުފާނުގެ އަރިހުގައި ކެބިނެޓް މިނިސްޓަރުންނާއި ކުންފުނިތަކުގެ އިސް ބޭފުޅުން ބައިވެރިވެވަޑައިގެންނެވިއެވެ. އެ ދަތުރުފުޅަށްފަހު ނޫސްވެރިންނާ ވާހަކަ ދައްކަވަމުން މިނިސްޓަރު މުއްތަލިބު ވިދާޅުވީ މިހާރު އޮތް ލޭންޑް ޔޫސް ޕްލޭނަކީ އެންމެ ބޭނުންވާ ގޮތަށް ފަރުމާކޮށްފައި އޮތް ޕްލޭނެއް ނޫން ނަމަވެސް ކުރީ ސަރުކާރުން ގޯއްޗެއް ލިބޭނެ ކަމުގެ އެއްބަސްވުން ހެދި ފަރާތްތަކަށް ވެސް ގޯތި ދޫކުރައްވާނެ ކަމަށެވެ. ޢާންމު ބޭނުންތަކަށް ބިން ހަމަޖެއްސުމުގައި ބައެއް ގޮންޖެހުންތައް ހުރި ކަން ވެސް މިނިސްޓަރު ފާހަގަކުރެއްވިއެވެ.

"އަޅުގަނޑުމެންގެ އުއްމީދަކީ ވީހާ ވެސް އަވަހަކަށް ތިން ހަފުތާ ތެރޭ ބިން ހިއްކާ ނިމުމުން ސާވޭކޮށް ވީހާ ވެސް އަވަހަކަށް ގޯތިތައް ހަވާލުކުރުމުގެ މަސައްކަތް ފެށުން. އެއީ ސަރުކާރުގެ ވިސްނުމަކީ" މުއްތަލިބް ވިދާޅުވިއެވެ.

މިނިސްޓަރު އިތުރަށް ވިދާޅުވީ ބިން ހިއްކައި ނިމުމުގެ ކުރިން ރަޖިސްޓްރީގެ މަސައްކަތް ފައްޓަވާނެ ކަމަށާއި ރަޖިސްޓްރީ ދޫކުރެވޭ ވަރަކުން ސާވޭ ކޮށް ބިން ހަވާލުކުރުން ކުރިއަށް ގެންދަވާނެ ކަމަށެވެ. ހަމައެއާއެކު ފެނާއި ނަރުދަމާ އަދި ކަރަންޓުގެ ވިއުގަ ޤާއިމުކުރުމުގެ މަސައްކަތް ވެސް އެންމެ އަވަހަކަށް ފައްޓަވާނެ ކަމަށް ވިދާޅުވިއެވެ. ނަމަވެސް އެންމެ ބޮޑު އިސްކަމެއް ދެއްވާނީ ގޯތި ލިބިފައިވާ ފަރާތްތަކަށް ކަޑަ ޖެހުމަށެވެ.

އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުޙައްމަދު ވިދާޅުވީ ގިރާވަރުފަޅު ހިއްކުމުގެ މަސައްކަތް ލަސްވާ މައިގަނޑު ސަބަބަކީ ފަޅުގެ ފުންމިން ކަމަށެވެ. ޢާންމުކޮށް ރާއްޖޭގައި ހިއްކަނީ ދެ ނުވަތަ ތިން މީޓަރު ފުން ތަންތަން ކަމަށާއި އެ ފުންމިނުގައި ނަމަ ގާތްގަނޑަކަށް ދެ މަސް ދުވަހުން ނިންމައިލެވުނީސް ކަމަށް ވެސް ވިދާޅުވިއެވެ. ޝަރީފް ވިދާޅުވި ގޮތުގައި މިހާރު ފެނުގެ ދަށުން 3.5 މިލިއަން ކިއުބިކް މީޓަރުގެ ވެލި އެޅިފައިވާއިރު އިތުރު ގާތްގަނޑަކަށް ދެ މިލިއަން ކިއުބިކް މީޓަރުގެ ވެލި އެޅުމުން ބިން ފެނުން މައްޗަށް އަރާނެއެވެ.

"އެމްއޭސީއެލުން މި ހިއްކަނީ 97 ހެކްޓަރު ފެނުން މައްޗަށް އަރާފަ މިހާރު މި ހުރީ 35 ހެކްޓަރު. ފެނުން މައްޗަށް ނޭރި ނަމަވެސް ހިކެމުން އެބަދޭ އެއަށްވުރެ މާ ބޮޑު ތަނެއް. ދެ ހަފްތާ ތިން ހަފްތާ ތެރޭ ބޮޑު ބައެއް ހިކިގެން ފެނުން މައްޗަށް އަރާ ތަން ފެންނާނެ" ޝަރީފް ވިދާޅުވިއެވެ.

މި މަޝްރޫޢު އަވަސްކުރުމަށް އެމްއޭސީއެލުން ބޭނުންކުރަމުން އަންނަނީ ދުނިޔޭގައި މިވަގުތު އޮތް އެންމެ ބޮޑެތި ޑްރެޖަރުތަކުގެ ތެރޭގައި ހިމެނޭ ކުއީން އޮފް ނެދަލޭންޑްސް އާއި އޮރެންޖް ޑްރެޖަރެވެ. ކުއީން އޮފް ނެދަލޭންޑްސް އަކީ 35,500 ކިއުބިކް މީޓަރުގެ ވެލި އުފުލުމުގެ ޤާބިލުކަން ލިބިފައިވާ ޑްރެޖަރެއް ކަމަށްވާއިރު އޮރެންޖް ޑްރެޖަރުގެ ހޮޕަ ކެޕޭސިޓީ އަކީ 22,000 ކިއުބިކް މީޓަރެވެ. ލޭންޑް ޔޫސް ޕްލޭނަށް ބަދަލު ގެނެސް ގިރާވަރުފަޅުން 4,072 ގޯތި ދޫކުރުމަށް ނިންމާފައިވާއިރު ގޯތި ހަވާލުކުރުމުގެ މަސައްކަތް އަންނަ ޖޫން މަހު ފައްޓަވާނެ ކަމަށް ރައީސް ވަނީ މިދިޔަ ހަފުތާގައި ވިދާޅުވެފައެވެ.