ބޮޑުތަކުރުފާނު މަގުގެ ސުނާމީ ބިނާއިން އެމްޕީއެލްއާ ދެމެދު ތަރައްޤީގެ މަސައްކަތް ފަށަނީ

މާލޭ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން ސުނާމީ ބިނާއިން ފެށިގެން އެމްޕީއެލްއާ ދެމެދުގެ ސަރަޙައްދުގައި ޢަމަލީ މަސައްކަތް ފެށުމަށް އިންފްރާސްޓްރަކްޗާ ވުޒާރާއިން ތައްޔާރަށް ތިބި ކަން އިޢުލާނުކޮށްފިއެވެ.

އެ މަސައްކަތް ފެށުމާ ގުޅިގެން، ސުނާމީ ބިނާ ސަރަޙައްދުގައި އަޅާފައިވާ އުޅަނދުތަކާއި މަގުމަތީގައި ބަހައްޓާފައިވާ ތަކެތި ތިނެއް އޮކްޓޫބަރު 2026 ވާ ހޮނިހިރު ދުވަހުގެ ރޭގަނޑު 11:00 ގެ ކުރިން ނެގުމަށް އެ ވުޒާރާއިން އަންގާފައިވެއެވެ. ކަނޑައެޅި ސުންގަޑިއަށް ނުނަގައި ހުންނަ ތަކެއްޗާއި އުޅަނދުތައް އެ ވުޒާރާގެ ފަރާތުން ނަގާނެ ކަމަށް ވެސް އެ އެންގުމުގައި ބުނެފައިވެއެވެ.

މި މަޝްރޫޢަކީ މިނިސްޓްރީ އޮފް އިންފްރާސްޓްރަކްޗާ ހައުސިން އެންޑް އާބަން ޑިވެލޮޕްމަންޓުން ކުރިއަށް ގެންދާ މަޝްރޫޢެކެވެ. މި މަޝްރޫޢުގެ ދަށުން ބޮޑުތަކުރުފާނު މަގުގެ ބޮޑު އިންސައްތައެއް މިހާރު ޒަމާނީ ފެންވަރަށް ތަރައްޤީކޮށް ޢާންމުންނަށް ހުޅުވާލާފައިވެއެވެ. މި ބައިގެ މަސައްކަތް ނިމުމުން އެ ސަރަޙައްދުން ދަތުރުފަތުރުކުރާ ފަރާތްތަކަށް ބޮޑު ލުޔެއް ލިބިގެންދާނެ ކަމަށް އެ ވުޒާރާއިން ބުނެފައިވެއެވެ.