އެއްގަމު ދަތުރުފަތުރުގެ އައު ޤާނޫނަށް މިއަދު ޢަމަލުކުރަން ފަށައިފި

ޤަވާޢިދާ ޚިލާފަށް ޕާކުކުރާ ކޮންމެ ފަހަރަކު 500 ރުފިޔާއިން ޖޫރިމަނާކުރެވޭ ގޮތަށާއި ނުރައްކާތެރިކޮށް ދުއްވައިގެން ބޮޑެތި ޢަދަދުތަކުން ޖޫރިމަނާ ކުރެވޭ ގޮތަށް ތައްޔާރުކޮށްފައިވާ އެއްގަމު ދަތުރުފަތުރުގެ އައު ޤާނޫނަށް މިއަދު ޢަމަލުކުރަން ފަށައިފިއެވެ.

މިދިޔަ މަހުގެ އެއްވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޞްދީޤުކުރެއްވި މި ޤާނޫނުގެ މައިގަނޑު ބޭނުމަކީ އެއްގަމު އުޅަނދު ދުއްވާ ފަރާތްތަކާއި އުޅަނދުތަކުގައި ދަތުރުކުރާ މީހުންނާއި މަގުމަތި ބޭނުންކުރާ އެންމެހައި ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމެވެ. އެއާ އެކު، އެއްގަމު ދަތުރުފަތުރާ ގުޅޭ ކަންކަން ޒަމާނީ ޤާނޫނީ އޮނިގަނޑެއްގެ ތެރެއިން ރާވައި ހިންގައި ބެލެހެއްޓުމަކީ ވެސް މި ޤާނޫނުގެ މަޤްޞަދެކެވެ.

މި ޤާނޫނުގެ ދަށުން ޤަވާޢިދާ ޚިލާފަށް ޕާކުކުރާ ކޮންމެ ފަހަރަކު 500 ރުފިޔާ ދައްކަންޖެހޭ އިރު، އެ މީހެއްގެ ލައިސަންސުން ޑީމެރިޓް ޕޮއިންޓް ވެސް އުނިކުރެވޭނެއެވެ. ގޯޅި ނުވަތަ މަގެއްގެ ކަންމައްޗާއި ސްކޫލްތައް ކައިރީގައި ޕާކުކުރަން ކަނޑައެޅިފައިވާ ޒޯންތައް ފިޔަވައި އެހެން ސަރަޙައްދުތަކާއި ބަސް ހުއްޓުމަށް ކަނޑައެޅިފައިވާ ޒޯންތަކުގައި ޕާކުކޮށްފި ނަމަ ޖޫރިމަނާ 1,500 ރުފިޔާއަށް އިތުރުވެއެވެ.

ފަރުވާކުޑަކޮށް ނުވަތަ ނުރައްކާތެރިކޮށް އުޅަނދު ދުއްވައިފި ނަމަ ކުށުގެ ބޮޑުކުޑަމިނަށް ބަލައި 25,000 ރުފިޔާއާއި 100,000 ރުފިޔާއާ ދެމެދުގެ ޢަދަދަކުން ޖޫރިމަނާ ކުރެވޭނެއެވެ. އެ ޢަމަލެއްގެ ސަބަބުން މީހަކަށް އަނިޔާއެއް ލިބިއްޖެ ނަމަ ޖޫރިމަނާ 100,000 ރުފިޔާއާއި 500,000 ރުފިޔާއާ ދެމެދުގެ މިންވަރަކަށް ބޮޑުވެއެވެ. މީހަކަށް އަނިޔާވެ ނުވަތަ މީހަކު މަރުވެއްޖެ ހާލަތެއްގައި ޤާނޫނުލްޢުޤޫބާތުގެ ދަށުން ޖިނާއީ ދަޢުވާ އުފުލުމަށް މި ޤާނޫނުން ހުރަސް ނާޅާ ކަމަށް ވެސް ބަޔާންކޮށްފައިވެއެވެ. އެފަދަ ކުށެއް ސާބިތުވެއްޖެ ނަމަ ފަސް އަހަރާއި ދިހަ އަހަރާ ދެމެދުގެ މުއްދަތަކަށް ލައިސަންސް ބާޠިލުކުރެވޭ އިރު، ލައިސަންސް ނެތް މީހެއް ނަމަ އެ މުއްދަތުގައި ލައިސަންސް ހޯދުމުގެ ޙައްޤު ގެއްލޭނެއެވެ. އަލުން ލައިސަންސް ލިބޭނީ ޚާއްޞަ ތަމްރީނު ޕްރޮގްރާމެއް ފުރިހަމަކޮށް ފާސްވުމުންނެވެ.

ޤާނޫނުގެ 103 ވަނަ މާއްދާ ބަޔާންކުރާ ގޮތުގައި ދުއްވަމުންދާ އުޅަނދެއްގެ ކޮންޓްރޯލް ކުޑަކުއްޖަކާ ނުވަތަ ލައިސަންސް ނެތް މީހަކާ ހަވާލުކުރުމާއި ހުންގާނު ފަސިންޖަރު ސީޓުގައި އިންނަ މީހަކާ ހަވާލުކުރުމަކީ ކުށެކެވެ. އެ ކުށަށް 25,000 ރުފިޔާއާއި 50,000 ރުފިޔާއާ ދެމެދުގެ ޖޫރިމަނާއެއް ކަނޑައެޅިފައިވާ އިރު، މީހަކަށް އަނިޔާވެއްޖެ ނަމަ 50,000 ރުފިޔާއާއި 100,000 ރުފިޔާއާ ދެމެދުގެ ޢަދަދަކުން ޖޫރިމަނާ ކުރެވޭނެއެވެ. ކުޑަކުއްޖަކާ ކޮންޓްރޯލް ހަވާލުކުރި ނަމަ އެންމެ ބޮޑު ޖޫރިމަނާ ކަމަށްވާ 50,000 ރުފިޔާ، އަނިޔާއެއް ލިބިއްޖެ ހާލަތެއްގައި 100,000 ރުފިޔާ ދައްކަން ޖެހޭނެއެވެ. މި ކުށާ ގުޅިގެން ދެ އަހަރާއި ފަސް އަހަރާ ދެމެދުގެ މުއްދަތަކަށް ލައިސަންސް ބާޠިލުކުރެވޭނެ ކަމަށް ވެސް ޤާނޫނުގައި ބަޔާންކޮށްފައިވެއެވެ.

ލައިސަންސް ނެތި ނުވަތަ މުއްދަތު ހަމަވެފައި ވަނިކޮށް ނުވަތަ ހިފަހައްޓާފައި ވަނިކޮށް އުޅަނދު ދުއްވައިފި ނަމަ ފުރަތަމަ ފަހަރު 1,000 ރުފިޔާ، ދެވަނަ ފަހަރު 1,500 ރުފިޔާ، ތިންވަނަ ފަހަރު 2,000 ރުފިޔާ އަދި އޭގެ ފަހުން ކޮންމެ ފަހަރަކު ކުރީ ޖޫރިމަނާގެ ދެ ގުނަ ދައްކަން ޖެހެއެވެ. ލައިސަންސް ނެތި ދުއްވި އުޅަނދު ގިނަވެގެން 30 ދުވަހަށް ހިފެހެއްޓުމުގެ ބާރު ވެސް ޤާނޫނުން ލިބިދޭ އިރު، އެ އުޅަނދެއްގެ ވެރިފަރާތް 2,000 ރުފިޔާއިން ޖޫރިމަނާ ކުރެވޭނެއެވެ.