ކުޑަކުދިންގެ ރައްކާތެރިކަމާ ގުޅޭ ބައިނަލްއަޤުވާމީ ގަރާރެއްގައި ރާއްޖެއިން ސޮއިކޮށްފި

ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވައި އެ ކުދިންގެ ޙައްޤުތައް ޙިމާޔަތްކުރުމުގެ ނިޒާމު ހަރުދަނާކުރުމަށް ގޮވައިލާ "ބޮގޯޓާ ކޯލް ޓު އެކްޝަން" ގަރާރުގައި ދިވެހިރާއްޖެއިން މިއަދު ސޮއިކޮށްފިއެވެ.

ރާއްޖޭގެ ފަރާތުން އެ ގަރާރުގައި ސޮއިކުރެއްވީ ޞިއްޙީ ވުޒާރާގެ ވަޒީރު ގީލާ ޢަލީއެވެ. މި ގަރާރަކީ 2024 ވަނަ އަހަރުގެ ނޮވެމްބަރުގައި ކޮލަމްބިއާގެ ބޮގޯޓާގައި ބޭއްވި ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަޤުވާމީ މަހާސިންތާގައި ބައިވެރިވި ޤައުމުތަކުން އިސްނަގައިގެން އިފްތިތާޙުކުރި ގަރާރެކެވެ. އެ ގަރާރުގެ މައިގަނޑު އަމާޒަކީ ކުޑަކުދިންނަށް ކުރާ އަނިޔާއާ ދެކޮޅަށް ފިޔަވަޅު އެޅުމުގެ މަސައްކަތްތައް ބައިނަލްއަޤުވާމީ ފެންވަރުގައި ވަރުގަދަކޮށް، ކުޑަކުދިން ރައްކާތެރިކުރުމުގެ ނިޒާމު އިތުރަށް ފުރިހަމަކުރުމެވެ.

ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ވަޒީރު ގީލާ ވިދާޅުވީ "ކުޑަކުދިންނަށް ކުރާ އަނިޔާ ހުއްޓުވުމުގައި މާނަހުރި ކުރިއެރުމެއް ހޯދުމަށް ދެމެހެއްޓެނިވި މަސައްކަތްތަކެއް ބޭނުންވާ" ކަމަށެވެ. ދައުލަތުގެ މުއައްސަސާތަކާއި އާއިލާތަކާއި މަދަނީ ޖަމުޢިއްޔާތަކާއި ތަރައްޤީގެ ބައިވެރިންގެ އިތުރުން ކުޑަކުދިން ވެސް ޝާމިލުވާ ފުރިހަމަ ނިޒާމެއް ބިނާކުރުމުގެ މުހިންމުކަން އެ ކަމަނާ ފާހަގަކުރެއްވިއެވެ.

ޞިއްޙީ ވުޒާރާއިން ބުނީ އެ ގަރާރުގައި މައިގަނޑު ގޮތެއްގައި އަލިއަޅުވައިލާފައި ވަނީ ހޯދުންތަކާއި ހެކިތަކުގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުމަށާއި، ޤާނޫނީ އަދި ސިޔާސަތުގެ އޮނިގަނޑުތައް ހަރުދަނާކުރުމާއި، ކުޑަކުދިން ޙިމާޔަތްކުރުމުގެ ނިޒާމުތައް ވަރުގަދަކުރުމުގެ މައްޗަށް ކަމަށެވެ. އޭގެ އިތުރުން ޑިޖިޓަލް މާޙައުލުތަކުގައި ކުޑަކުދިންގެ ރައްކާތެރިކަން ކަށަވަރުކޮށްދިނުމާއި، އެ ކުދިންގެ ލާބައާ ގުޅުން ހުރި ނިންމުންތަކުގައި ކުދިންގެ ބައިވެރިވުން މާނަހުރި ގޮތެއްގައި ހިމެނުމަށް ވެސް ގަރާރުގައި ބާރު އަޅާ ކަމަށް އެ ވުޒާރާއިން ބުނެފައިވެއެވެ.

މި ގަރާރުގައި ހިމެނޭ ކަންކަމަކީ ކުޑަކުދިންނަށް ކުރާ އަނިޔާ ހުއްޓުވައި އެފަދަ ކަންކަމަށް އިޖާބަ ދިނުމަށް ރާއްޖެއިން 2024 ވަނަ އަހަރު އެކުލަވައިލި ޤައުމީ ޢަމަލީ ޕްލޭނާ ގުޅިލާމެހިފައިވާ ކަންކަމެވެ.