އެމްޑީޕީގެ ޕްރައިމަރީގައި ވާދަކުރައްވާނެކަން އިއުލާންކުރައްވައި ޝާހިދު ޕާޓީގެ ރައީސްކަމުން އިސްތިއުފާ ދެއްވައިފި

2028 ވަނަ އަހަރުގެ ރިޔާސީ އިންތިޚާބަށް އެމްޑީޕީން ނެރޭ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރައްވާނެކަން އެ ޕާޓީގެ ރައީސް ޢަބްދުﷲ ޝާހިދު މިރޭ އައްޑޫ ހިތަދޫގައި ބޭއްވި ޚާއްޞަ ޖަލްސާގައި އިއުލާންކުރައްވައި ޕާޓީގެ ރައީސްކަމުން އިސްތިއުފާ ދެއްވައިފިއެވެ.

ރައްޔިތުންގެ މަޖިލީހުގެ ކުރީގެ ރައީސް އަދި އދ. ގެ ޢާންމު މަޖިލީހުގެ ރައީސްކަން ކުރައްވާފައިވާ ޝާހިދު އެ ޖަލްސާގައި ވިދާޅުވީ އިޤުތިޞާދީ އަދި އިޖުތިމާޢީ ގިނަ މައްސަލަތަކެއް ކުރިމަތިވެ ރައްޔިތުން ތިބީ ވަރަށް ދަތި ޙާލެއްގައި ކަމަށާއި އެ މައްސަލަތައް ޙައްލުކުރެވޭނީ އެމްޑީޕީއަށް ކަމަށެވެ. ރައްޔިތުން ބޭނުންވި ކޮންމެ ބަދަލެއް ގެނައުމުގެ މޭސްތިރިންނަކީ އެމްޑީޕީގެ މެންބަރުން ކަމަށް ވެސް އެ މަނިކުފާނު ވިދާޅުވިއެވެ.

ޕްރައިމަރީގައި ވާދަކުރައްވަން ނިންމެވީ 2028 ގެ ރިޔާސީ އިންތިޚާބު އެމްޑީޕީއަށް ކާމިޔާބުކޮށްދެއްވުމުގެ އަޒުމުގައި ކަމަށް ޝާހިދު ވިދާޅުވިއެވެ. ޕާޓީގެ ތެރޭގައި ހުރިހާ ފިކުރެއްގެ މެންބަރުން ގޮވައިގެން މަސައްކަތް ކުރެއްވޭނެ ކަމުގެ ޔަޤީންކަން ވެސް އެ މަނިކުފާނު ދެއްވިއެވެ. ރިޔާސީ ޓިކެޓް ލިބިވަޑައިގެންފި ނަމަ ޕާޓީގެ ޢާންމު ހުރިހާ މެންބަރުންނާ ގުޅިގެން މަސައްކަތް ކުރައްވާނެ ކަމަށާއި ނަތީޖާ ނެރެދެއްވޭނެ ބޭފުޅަކަށް ވެވަޑައިގަންނަވާނެ ކަމަށް ވެސް ވިދާޅުވިއެވެ.

"މިއަދު ދިވެހިރާއްޖެ މި އޮތް ހާލަތު ބަދަލުކުރުމަށްޓަކައި ދިވެހި ރައްޔިތުންނާއި އެމްޑީޕީގެ އާއްމު މެންބަރުންނާ އެކު އެއް ޖޯޝެއްގައި އެއް ރޫހެއްގައި އިތުރު ހިތްވަރަކާ އެކު މަސައްކަތް ކުރަން މި ވަނީ ޖެހިފައި. އެހެންކަމުން 2028 ވަނަ އަހަރުގެ ރިޔާސީ އިންތިހާބު އެމްޑީޕީ އަށް ކާމިޔާބު ކުރުމުގެ އަޒުމުގައި މާތް ﷲގެ ހަޒުރަތުން ވާގި އެދި ހުރެ އެމްޑީޕީގެ ރިޔާސީ ޕްރައިމަރީގައި ވާދަކުރަން އަޅުގަނޑު ނިންމައި އެކަން އިއުލާނުކުރަން" ޝާހިދު ވިދާޅުވިއެވެ.

ޕާޓީގެ ރައީސްކަމުން އިސްތިއުފާ ދެއްވި ސަބަބާ ގުޅޭ ގޮތުން ޝާހިދު ވިދާޅުވީ އެމްޑީޕީއަކީ ޑިމޮކްރަސީގެ ރީތި އުޞޫލުތައް ދެމެހެއްޓުމުގެ ޕާޓީ ކަމަށާއި ޕާޓީގެ އިސް މަޤާމެއްގައި ހުންނަވައިގެން އެތެރޭގެ އިންތިޚާބެއްގައި ވާދަކުރެއްވުމަކީ ގަބޫލުފުޅު ކުރައްވާ ކަމެއް ނޫން ކަމަށެވެ.

"ޕާޓީގެ ރައީސްކަމުގައި އަޅުގަނޑު ހޭދަކުރި ދުވަސްތަކުގައި މަސައްކަތްކޮށްފައި ވާނީ މިދެންނެވި އުސޫލުން. އެހެންކަމުން އެމްޑީޕީގެ ރިޔާސީ ޕްރައިމަރީގައި ވާދަކުރާނެކަން އިއުލާނުކުރުމާ އެކު މިއަދުން ފެށިގެން ފެށިގެން ޕާޓީގެ ރައީސްކަމުން އަޅުގަނޑު އިސްތިއުފާދީފިން" ޝާހިދު ވިދާޅުވިއެވެ.

ޝާހިދުގެ ސިޔާސީ ޙަޔާތްޕުޅު ފެއްޓެވީ ކުރީގެ ރައީސް މައުމޫނު ޢަބްދުލްޤައްޔޫމުގެ އަރިހުގައެވެ. ރައީސް މައުމޫނުގެ ވެރިކަމުގައި އަދި ކުރީގެ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ވެސް ޚާރިޖީ ވަޒީރުކަން ކުރައްވާފައިވާ ޝާހިދު ރައީސް މައުމޫނު އުފެއްދެވި ދިވެހި ރައްޔިތުންގެ ޕާޓީ (ޑީއާރުޕީ)ގައި ވެސް އިސްކޮށް ޙަރަކާތްތެރިވެވަޑައިގެންފައިވެއެވެ.