ފެނުގެ ކެމިކަލް ނަން ނުރައްކާތެރި މާއްދާއެއް ކަމަށް ދައްކައި ދޮގު މައުލޫމާތު ނުފެތުރުމަށް އެމްއެފްޑީއޭއިން އިލްތިމާސްކޮށްފި

ބަންދުކޮށްގެން ވިއްކާ ބޯފެނުގައި ނުރައްކާތެރި ކެމިކަލެއް އެކުލެވޭ ކަމަށް ބުނެ މީސްމީޑިއާގައި ފެތުރެމުންދާ ވާހަކަތައް ދޮގުކޮށް، އެފަދަ ދޮގު މައުލޫމާތު ނުފެތުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސްކޮށްފިއެވެ.

މީސްމީޑިއާ ޕޭޖަކުން ކުރި ޕޯސްޓެއްގައި ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) ގެ ރިޕޯޓަކާ ހަވާލާދޭ ކަމަށް ބުނެ، ރާއްޖޭގެ ގިނަ ވޯޓާ ޕްލާންޓްތަކާއި ތާޒާ އަދި ބޮނަކުއާ ފަދަ ބްރޭންޑްތަކުގެ ފެނުގައި "ޑައިހައިޑްރޮޖެން މޮނޮކްސައިޑް" ނަމަކަށް ކިޔާ ނުރައްކާތެރި މާއްދާއެއް ހިމެނޭ ކަމަށް ލިޔެފައިވެއެވެ. އެ ޕޯސްޓުގައި މި މާއްދާގެ ސަބަބުން ވިހަވުމުގެ އަލާމާތްތައް ފެންނަ ކަމަށް ވެސް ބުނެފައިވެއެވެ.

ނަމަވެސް ސައިންޓިފިކް ގޮތުން ބަލާއިރު "ޑައިހައިޑްރޮޖެން މޮނޮކްސައިޑް" އަކީ އާދައިގެ ފެނަށް ކިޔާ ކެމިކަލް ނަމެވެ. ފެނުގެ ކެމިކަލް ފޯމިއުލާ ކަމުގައިވާ އެޗް2އޯ ރަމްޒުކޮށްދެނީ ހައިޑްރޮޖެންގެ ދެ އެޓަމާއި އޮކްސިޖެންގެ އެއް އެޓަމް ހިމެނޭ މޮލިކިއުލެކެވެ. "ޑައި" އިން ދޭހަކޮށްދެނީ ދޭއް ކަމަށާއި "މޮނޯ" އިން ދޭހަކޮށްދެނީ އެކެއް ކަމަށް ވާތީ، މިއީ ފެނުގެ ސައިންޓިފިކް ނަމެވެ.

އެމްއެފްޑީއޭއިން ބުނީ ބަންދުކޮށްފައި ހުންނަ ފެނުގައި މި މާއްދާ ހިމެނޭ ކަމަށް ބުނެ ބިރުވެރިކަން އުފެއްދުމަކީ ވަރަށް ބޮޑު އޮޅުވައިލުމެއް ކަމަށެވެ. އާންމު ޞިއްޙަތަކީ މަޖަލަކަށް ހަދަންޖެހޭ ކަމެއް ނޫން ކަމަށާއި، މަޖަލަކަށް ހެދި ނަމަވެސް އަސާސެއް ނެތް ވާހަކަ އުފައްދައި ނުފެތުރުމަށް އެ އޮތޯރިޓީން ވަނީ އިލްތިމާސްކޮށްފައެވެ.

ޞިއްޙަތާ ގުޅުން ހުރި މައުލޫމާތު ހޯދުމުގައި އިތުބާރު ހިފޭ ރަސްމީ މަސްދަރުތަކަށް ބަރޯސާވުމަށް ވެސް އެމްއެފްޑީއޭއިން ވަނީ އާންމުންނަށް ނަސޭހަތްތެރިވެފައެވެ.