މާލެ މާރުކޭޓް ކޮމްޕްލެކްސް އެޅުމަށް އެއް މަހެއްގެ ތެރޭ ބިން ހުސްކުރަނީ

މާލޭގެ ހުރިހާ މާރުކޭޓެއް އެއް ތަނަކަށް ޖަމާކޮށް ހިންގުމަށް ބިނާކުރާ މާރުކޭޓް ކޮމްޕްލެކްސްގެ ޢަމަލީ މަސައްކަތް ފެށުމަށްޓަކައި މިހާރު އެ ބިމުގައި ހިންގާ ގޮޅިތަކުގެ ވެރީންނަށް ވަގުތީ ތަނެއް ހޯދައިދީ އެއް މަސް ދުވަހުގެ ތެރޭގައި ބިން ހުސްކުރުމުގެ މަސައްކަތް ފަށައިފިއެވެ.

މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ ސްޓޭޓް މިނިސްޓަރު މުއްޠަލިބް ޕީއެސްއެމް ނިއުސްއަށް މަޢުލޫމާތު ދެއްވަމުން ވިދާޅުވީ ވަގުތީ މާރުކޭޓެއް ޤާއިމުކުރުމަށް ކުރީގެ އެސްޓީއޯ ހުރި ތަނާއި ތައިސޭކޮށި ބެލެމުންދާ ކަމަށެވެ. މި މަޝްރޫޢު ޓްރަސްޓެންގ މޯލްޑިވްސް ޕްރައިވެޓް ލިމިޓެޑާ ހަވާލުކުރީ މި އަހަރުގެ މާރިޗު މަހުގައެވެ.

ނަމަވެސް ފަސް މަސް ފާއިތުވީ އިރު ވެސް މާލެ ސިޓީ ކައުންސިލުން ބިން ހަވާލުނުކުރުމުގެ ސަބަބުން ޢަމަލީ މަސައްކަތް ފެށޭ ގޮތް ނުވެ އޮތް ކަމަށް ސަރުކާރުގެ ކަމާ ގުޅޭ ވުޒާރާތަކުން ހާމަކޮށްފައިވެއެވެ.

126.4 މިލިޔަން ރުފިޔާ ޚަރަދުކޮށްގެން ބިނާކުރާ މި ކޮމްޕްލެކްސް ތަރައްޤީކުރަނީ ހަ ފަންގިފިލާއަށް 15,525 އަކަފޫޓުގެ ބިމެއްގައެވެ. ހުރިހާ ފަންގިފިލާ ހިމެނޭ ގޮތަށް އިމާރާތުގެ ޖާގަ 95,000 އަކަފޫޓަށްވުރެ ބޮޑުވާ އިރު އެ ތަނުގައި މަސް މާރުކޭޓާއި ދަތުރުވެރިންގެ މާރުކޭޓާއި ލޯކަލް މާރުކޭޓް ހިންގައި ޖުމްލަ 455 ގޮޅި ދޫކުރާނެއެވެ. ބޭސްމަންޓުގައި 400 ސައިކަލަށް ޕާކު ކުރެވޭ ޖާގަ ހެދުމުގެ އިތުރުން އެންމެ މަތީ ފަންގިފިލާ ބޭނުންކުރާނީ ފުޑް ކޯޓެއްގެ ގޮތުގައެވެ.

ސަރުކާރުގެ އަމާޒަކީ އެއް އަހަރާ އަށް މަހުގެ ތެރޭގައި މި މަޝްރޫޢު ނިންމުމެވެ. ބާޒާރުމަތީ ސަރަޙައްދު ޒަމާނީ ފެންވަރަށް ތަރައްޤީކުރުމުގެ ތެރެއިން މިހާރު ވެސް އެ ސަރަޙައްދުގެ މަގުތައް ހެދުމާއި ބަނދަރަށް ބޮޑެތި ބަދަލުތައް ގެނެސްފައިވެއެވެ.