ސިޔާމަށް ކުންފުނިތަކުން 6.6 މިލިއަން ޑޮލަރުގެ އާމްދަނީއެއް ލިބިފައިވާކަން ހާމަވެއްޖެ

ރައްޔިތުންގެ މަޖިލީހުން އާންމުކުރި މެންބަރުންގެ މާލީ ބަޔާންތަކުން ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދަށް އެއް އަހަރު ދުވަހުގެ ތެރޭގައި 6.6 މިލިއަން އެމެރިކާ ޑޮލަރާއި ފަސް މިލިއަނެއްހާ ދިވެހި ރުފިޔާ ލިބިފައިވާކަން ހާމަވެއްޖެއެވެ.

ވިހިވަނަ ރައްޔިތުންގެ މަޖިލީހުގެ މެންބަރުން ހުށަހެޅި ދެވަނަ އަހަރުގެ މާލީ ބަޔާންތައް އެ މަޖިލީހުގެ ވެބްސައިޓުގައި މިހާރު ވަނީ ޝާއިޢުކޮށްފައެވެ. މި ބަޔާންތަކުގައި ހިމެނެނީ 28 މެއި 2025 އިން 27 މެއި 2026 އާ ދެމެދުގެ މާލީ ތަފްސީލެވެ.

ފަތުރުވެރިކަމުގެ ގިނަ ވިޔަފާރިތަކެއް ހިންގަވާ ސިޔާމްގެ ބަޔާނަށް ބަލާއިރު، މަޖިލީހުގެ މެންބަރުކަމުގެ މުސާރައިގެ ގޮތުގައި 604,567 ރުފިޔާ ލިބިވަޑައިގެންފައިވެއެވެ. ސަންސިޔާމް ގްރޫޕް އޮފް ކޮމްޕެނީސް އިން އާމްދަނީގެ ގޮތުގައި 6,540,194 ޑޮލަރު ލިބިވަޑައިގެންފައިވާ އިރު، ބީއެމްއެލް އިން ހިއްސާގެ ފައިދާގެ ގޮތުގައި 1.3 މިލިއަން ރުފިޔާ ލިބިވަޑައިގެންފައިވެއެވެ. އޭގެ އިތުރުން ކުންފުނީގެ ޑިވިޑެންޑްގެ ގޮތުގައި 54,000 ޑޮލަރު ވެސް ލިބިވަޑައިގެންފައިވާ ކަމަށް އެ ބަޔާނުގައި ފާހަގަކޮށްފައިވެއެވެ.

ސިޔާމްގެ މާލީ ބަޔާނުގައި ބެންކު އެކައުންޓުތަކުގެ ތަފްސީލު ވެސް ހިމަނުއްވާފައިވެއެވެ. އެ ގޮތުން ރާއްޖޭގައި ހަތަރު އެކައުންޓާއި ސްރީ ލަންކާގައި ދެ އެކައުންޓާއި ޔޫއޭއީގައި ދެ އެކައުންޓު ހުރި އިރު، އެ އެކައުންޓުތަކުގެ ޖުމްލަ ބެލެންސްގެ ގޮތުގައި 33.6 މިލިއަން ރުފިޔާ އާއި 1.9 މިލިއަން ޑޮލަރު ހުރި ކަމަށް ބަޔާނުގައިވެއެވެ.

މެންބަރުންގެ މާލީ ބަޔާން ހާމަކުރުމަކީ ކޮންމެ އަހަރަކު ވެސް ރައްޔިތުންގެ މަޖިލީހުން ކުރަމުން އަންނަ ކަމެކެވެ.