ވޯލްޑް ޓްރެވެލް އެވޯޑްސްގެ ފަސް އެވޯޑެއް ރާއްޖެއިން ކާމިޔާބުކޮށްފި

ދުނިޔޭގެ ފަތުރުވެރިކަމުގެ ދުވަހާ ގުޅިގެން ކްރޮސް ރޯޑްސްގައި ބޭއްވި ވޯލްޑް ޓްރެވެލް އެވޯޑްސްގެ ސަރަޙައްދީ ގާލާ ހަފްލާގައި ރާއްޖެއިން ފަސް އެވޯޑެއް ހާސިލުކޮށްފިއެވެ.

އެ ހަފްލާގައި ރާއްޖެއަށް ލިބުނު އެންމެ ފާހަގަކޮށްލެވޭ ކާމިޔާބީ އަކީ ޖެހިޖެހިގެން ހަތް ވަނަ ފަހަރަށް އިންޑިއަން އޯޝަންސް ލީޑިން ޑެސްޓިނޭޝަންގެ ލަޤަބު ހޯދުމެވެ. އެއާ އެކު ޑައިވް ޑެސްޓިނޭޝަނާއި ގްރީން ޑެސްޓިނޭޝަނާއި ހަނީމޫން ޑެސްޓިނޭޝަންގެ ދާއިރާއިން ވެސް އިންޑިއާ ކަނޑުގެ އެންމެ ކުރި ރާއްޖެއިން ހޯދައިފައިވެއެވެ. ފަސް ވަނަ އެވޯޑުގެ ގޮތުގައި ވިޒިޓް މޯލްޑިވްސް ކޯޕަރޭޝަނަށް އިންޑިއަން އޯޝަންސް ލީޑިން ޓޫރިސްޓް ބޯޑުގެ އެވޯޑު ލިބިފައިވެއެވެ.

ވިޒިޓް މޯލްޑިވްސް ކޯޕަރޭޝަނުން ހާމަކޮށްފައިވާ ގޮތުގައި ރާއްޖޭގެ 15 އަށް ވުރެ ގިނަ ފަތުރުވެރިކަމުގެ ބްރޭންޑަކުން ވެސް ތަފާތު ދާއިރާތަކުން އެވޯޑު ކާމިޔާބުކޮށްފައިވެއެވެ. ރިސޯޓާއި ލަގްޒަރީ ހޮސްޕިޓޭލިޓީ އާއި އެވިއޭޝަނާއި ޑައިވިންގެ އިތުރުން އާއިލީ އަދި ހަނީމޫން ދަތުރާއި ޕްރައިވެޓް އައިލެންޑް ތަޖުރިބާ އާއި ސުޕާ ޔޮޓް ފަތުރުވެރިކަމާއި ޒިންމާދާރު ފަތުރުވެރިކަމުގެ ދާއިރާ އެ ބްރޭންޑުތަކުގެ ތެރޭގައި ހިމެނެއެވެ.

ފަތުރުވެރިކަމާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ޝަރަފުވެރިކޮށްދެއްވި މި ގާލާ ހަފްލާގައި 40 އަށް ވުރެ ގިނަ ޤައުމެއްގެ ފަތުރުވެރިކަމުގެ ދާއިރާގެ އިސް ފަރާތްތައް ބައިވެރިވެފައިވެއެވެ. އޭގެ ތެރޭގައި ޓޫރިސްޓް ބޯޑުތަކާއި ހޮޓާ ރިސޯޓުތަކާއި އެއާލައިންތަކާއި ފަތުރުވެރިކަމުގެ މީޑިއާތައް ހިމެނެއެވެ.

ރާއްޖެއިން ވަނީ 2020 ވަނަ އަހަރުން 2025 ވަނަ އަހަރާ ހަމައަށް ޖެހިޖެހިގެން ހަ އަހަރު ދުނިޔޭގެ ލީޑިން ޑެސްޓިނޭޝަންގެ މަޤާމު ދަމަހައްޓައިފައެވެ. 1993 ވަނަ އަހަރުން ފެށިގެން ބާއްވަމުން އަންނަ ވޯލްޑް ޓްރެވެލް އެވޯޑްސް އަކީ ފަތުރުވެރިކަމާއި ދަތުރުފަތުރުގެ ސިނާޢަތުގައި ދެވޭ އެންމެ ޝަރަފުވެރި އެވޯޑެވެ.