މަރުވުމުން ސަލާމަތްވެ އަބަދަށް ދިރިހުރުމަށް މަސައްކަތްކުރި މީހާއަށް ނާދިރު ބައްޔެއް؛ އިބްރަތަކަށް ފުދޭ

ދިގު އުމުރަކަށް އެދި އަދި މަރުވުމުން ސަލާމަތްވެ އަބަދަށް ދިރިހުރުމުގެ އުއްމީދުގައި، އޭނާގެ ސިއްހަތަށްޓަކައި މިލިއަނުން ހަރަދުކުރަމުންދާ މަޝްހޫރު ބްރަޔަން ޖޯންސަންގެ ވާހަކައަށް މުޅި ދުނިޔޭގެ ސަމާލުކަމަށް ހުއްޓިފައި ވާތާ އަހަރުތަކެއްވީ އެވެ.

ނަމަވެސް މިއަދު އޭނާއާ ބެހޭ ގޮތުން ދައްކަނީ އެކަމަށް އޭނާ ކުރަމުންދާ ކާމިޔާބު މަސައްކަތުގެ ވާހަކަ އެއް ނޫނެވެ. މިއަދުގެ ހޫނު ހަބަރަކީ އޭނާގެ އެ މަސައްކަތުގެ އަގެއް ނެތް ކަމުގެ ވާހަކަ އެވެ. އެއީ އެއްވެސް ފައިދާއެއް ނެތް މަސައްކަތެއް ކަމުގެ ވާހަކަ އެވެ. އަދި ފިތުރާ މުޅިން ދެކޮޅު, އެއްވެސް އަސާސެއް ނެތް ކަމެއް ކަމުގެ ވާހަކަ އެވެ.

މި ވާހަކަތައް އަޅުގަނޑުމެންގެ ދިވެހީންނަށް ހަނދާންކޮށްދިނީ ފޭސްބުކުގައި ތަފާތު އެކި ޕޯސްޓްތައް ހިއްސާކުރަމުންދާ ހަސަން ސައީދު އެވެ.

ދިގު އުމުރަކަށް އެދި އަދި މަރުވުމުން ސަލާމަތްވެ އަބަދަށް ދިރިހުރުމުގެ އުއްމީދުގައި، އޭނާގެ ސިއްހަތަށްޓަކައި މިލިއަނުން ހަރަދުކުރަމުންދާ މަޝްހޫރު ބްރަޔަން ޖޯންސަން އަށް މިއަދު ވަނީ ވަރަށް ނާދިރު "އޮޓޯއިމިއުން" ބައްޔެއް ކަމަށްވާ "އޮޓޯއިމިއުން ގެސްޓްރޯއެންޓްރައިޓިސް" (AIG) ޖެހިފަ އެވެ. އެންމެ ފަހުން ހުދު, އޭނާ އަމިއްލައަށް އެކަން ވަނީ އިއުލާނުކޮށްފަ އެވެ.

ސައީދުގެ ޕޯސްޓްގައިވާ ގޮތުން މި ބަލީގެ ސަބަބުން ހަށިގަނޑުގެ ދިފާއީ ނިޒާމުން ބަނޑުގެ ފަށަލައަށް މަޑުމަޑުން ހަމަލާދީ، ހަށިގަނޑުން އަޔަން (ދަގަނޑު) އާއި ވިޓަމިން ބީ12 މަދުކޮށްލަ އެވެ. މީގެ ސަބަބުން ގިނަ ދުވަސްވުމުން ބަނޑުގެ ކެންސަރަށް މަގުފަހިވުމުގެ ނުރައްކާ އޮވެ އެވެ.

ޖޯންސަން ބުނި ގޮތުގައި، އޭނާގެ ސިއްހީ ހާލަތު އަބަދުވެސް ވަރަށް ގާތުން ބަލަމުން ދިޔައީ ބަލަމުންނެވެ. ނަމަވެސް، ވޭތުވެދިޔަ 10 އަހަރު ދުވަހު މި ބަލި ހުރީ ހަށިގަނޑުގައި ފޮރުވިފަ އެވެ. މި ބަލި ދެނެގަނެވުނީ ވަރަށް ފުންކޮށް ކުރެވުނު ޓެސްޓުތަކަކަށް ފަހުގަ އެވެ. މީގެ އިތުރުން، މި ބައްޔަށް އަދި މިހާތަނަށް ފަރުވާއެއް ހޯދިފައި ނުވެ އެވެ. މިހާރު ކުރެވެނީ ހަމައެކަނި ބަލީގެ އުނދަގޫތައް ކޮންޓްރޯލް ކުރުމުގެ ފަރުވާތައް ކަމަށް ވެސް އޭނާ ބުންޏެވެ.

ޖޯންސަން އަކީ އޭނާގެ ސިއްހަތަށްޓަކައި އާދަޔާ ހިލާފު ސަމާލުކަމެއްދޭ އެމެރިކާގެ މިލިއަނަރެކެވެ. އަހަރަކު ދެ މިލިއަން ޑޮލަރު ހޭދަކޮށްގެން، އެންމެ މޮޅު ޑޮކްޓަރުންގެ ޓީމަކާއެކު ހަށިގަނޑުގެ ހުރިހާ ގުނަވަނެއްގެ މަސައްކަތްތައް ގަވާއިދުން ޗެކްކޮށް، އެންމެ ފައިދާހުރި ކާނާ ބޭނުންކޮށް، އަދި ކަސްރަތު ކުރަމުން ދިޔަ އެވެ.

ނަމަވެސް، މި ހުރިހާ މަސައްކަތަކާއި ހަރަދަކަށް ފަހުވެސް އޭނާގެ ހަށިގަނޑަށް ބަލިޖެހުން ހުއްޓުވޭ ގޮތެއް ނުވިއެވެ. އަދި އެންމެ މޮޅު ޓެކްނޮލޮޖީ ބޭނުންކުރި އިރުވެސް ޑޮކްޓަރުންނަށް މި ބަލި ހުރިކަން ކުރިން ދެނެގަނެވޭ ގޮތެއް ނުވިއެވެ.

"އެހެނީ މިކަމުން ރެކިގަނެވޭނެ ހަމަ އެކަކުވެސް ނެތީމަ އެވެ. އެއީ މަރެވެ. އަޅުގަނޑުމެން އެ އެއްޗަކަށް ބިރުން ފިލަން މިދުވާ މަރެވެ. ވަގުތު ޖެހުމުން ދާންވީއެވެ. ގެންދެވެން އޮތީ ހަމަ އެކަނި ކުރި އަމަލުތަކެވެ," ސައީދުގެ އިބްރަތްތެރި ޕޯސްޓް ނިންމާލަމުން ލިޔެފައިވެ އެވެ.

މިއީ އަހަރެމެން ކޮންމެ މީހަކަށް ފުން އިބްރަތެއް ލިއްބައިދޭ ފިލާވަޅެކެވެ. "ކުއްލި ފަރުވާ ދިނަސް, މަރުގެ ހައްލެއް ނެތެވެ". މިއީ މުސްލިމުންގެ ހަގީގީ އަގީދާ އެވެ. ސަބަބުތަކުގައި ހިފުމަކީ ނެތް ކަމެއް ނޫނެވެ. އަދި ކިޔެއް ހެއްޔެވެ. އެއީ ކުރަން ވެސް ޖެހޭ ކަމެކެވެ. ދީނުގައި އޮތީ އެގޮތެވެ.

ނަމަވެސް ހަގީގަތާއި ދުރަކަށް ނުދެވޭނެ އެވެ. މާތްރަސްކަލާންގެ ނިޔާފުޅަކީ ކޮންމެ އެއްޗަކަށް ނިމުން އައުމެވެ. ދުނިޔެއަށް އައި ކޮންމެ ނަފްސެއް މަރުގެ ރަހަ ދެކޭނެ އެވެ. ދާއިމަށް ދެމިވޮޑިގެން ވަނީ ވެރިއިލާހެވެ. ކިތަންމެ ޒަމާނީ އުކުޅުތަކާއި ވަސީލަތްތައް ހޯދައިގަނެވުނު ނަމަވެސް މަރުން ސަލާމަތްވެ ދާއިމަށް މި ދުނިޔޭގައި ދެމި ހުރެވޭނެ ގޮތެއް ނޯންނާނެ އެވެ. އެއީ ހުރިހާ އިންސާނުން މަރުވެ ދާނެ އެވެ. ދުނިޔެއާ ދުނިޔޭގައިވާހާ އެއްޗެއް ހަލާކުވެ ނެތިދާނެ އެވެ. މި ދުނިޔެވެސް އެފަދައިން ނެތި ދެ އެވެ. އެކަން ފަސްކުރެވިފައިވަނީ މާތް ރަސްކަލާންގެ އަމުރުފުޅު އެކަމަށް އޮތް ވަގުތާއި ހަމައަށެވެ.

ގުދުރަތީ މި ސުންނަތަށް ގޮންޖަހާ, ތިމަންނާ މި ހުރީ ދުވަހަކު ބަލިވުމެއް ނެތް, އަމުދުން މަރުވުމެއް ނެތް ފަރުވާއެއް ހޯދަން ނިިކުމެއޭ ބުނުމަކީ މޮޔަ ބުނުމެކެވެ. ކުފުރުގެ ބުނުމެކެވެ. މާތްރަސްކަލާންގެއަށް އިމާންވާ މީހުންނާއި އީމާންނުވާ މީހުންވެސް ގަބޫލުކުރާ އެންމެ ބޮޑު ހަގީގަތަކީ މަރެވެ. އެކަކަށްވެސް އޭނާ މަރުވާނީ ކޮންތާކު, ކިހިނެތް, ކޮން އިރަކު ކަމެއް ނޭންގޭނެ އެވެ.

މަރުވުމުން ސަލާމަތްވެ އަބަދަށް ދިރިހުރުމަށް މަސައްކަތްކުރި ބްރަޔަން ޖޯންސަންގެ ވާހަކަ އިބްރަތަކަށް ފުދެ އެވެ. އިންސާނާގެ ބަލިކަށި ކަމާއި ނިކަމެތި ކަމުގެ މިސާލަކަށް ވެސް އެކަން ފުދެ އެވެ.