ތިން ވަޒީރަކާ ސުވާލުކުރެވޭ "އަހާ" ފޯރަމްގެ އަށް ވަނަ ބައި މިރޭ ބާއްވަނީ

ސަރުކާރުގެ ތިން ވަޒީރަކު ބައިވެރިވެވަޑައިގަންނަވާ "އަހާ" ފޯރަމްގެ އަށް ވަނަ ބައި މިރޭ ސަލްޓަން ޕާކުގައި ބޭއްވުމަށް ހަމަޖެހިފައިވާ ކަމަށް ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ.

މިރޭ 21:00 ގައި ސަލްޓަން ޕާކުގެ އިވެންޓް އޭރިއާގައި ފެށުމަށް ތާވަލުކޮށްފައިވާ މި ފޯރަމް ދެ ގަޑިއިރަށް ކުރިއަށް ގެންދިއުމަށް ވަނީ ރާވައިފައެވެ. މި ފޯރަމްގައި ބައިވެރިވެވަޑައިގަންނަވާ ވަޒީރުންނަކީ އިޤުތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދާއި، ދިފާޢީ އަދި ވަތަނީ ޚިދުމަތާ ބެހޭ ވަޒީރު ޙަސަން ރަޝީދާއި، ބަންޑާރަނައިބު އަޙްމަދު އުޝާމެވެ.

ފޯރަމް ކުރިއަށްދާ ތަނަށް ގޮސް ސީދާ ސުވާލު ހުށަހެޅުމުގެ ފުރުޞަތު ލިބުމުގެ އިތުރުން، ފޭސްބުކް، އެކްސް އަދި ޕީއެސްއެމް އެއަރ އެޕް މެދުވެރިކޮށް އޮންލައިންކޮށް ވެސް ވަޒީރުންނާ ސުވާލު ހުށަހެޅޭނެއެވެ. ރާއްޖޭގެ ކޮންމެ ރަށެއްގައި ހުރި މީހަކަށް ވެސް އެ ވަޒީރެއްގެ ދާއިރާއާ ގުޅުން ހުރި ކޮންމެ ސުވާލެއް ހުށަހެޅޭ ގޮތަށް މި ފޯރަމް ވަނީ ހުޅުވައިލައިފައެވެ.

ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ކުރިއަށް ގެންދާ "އަހާ" ސިލްސިލާ ފޯރަމްތައް ފެށީ 2024 ވަނަ އަހަރުގެ ޖެނުއަރީގައެވެ. ސަރުކާރުގެ ވުޒާރާތަކުން ކުރަމުންދާ މަސައްކަތްތައް ތަފްޞީލުކޮށް ރައްޔިތުންނަށް ހާމަކޮށްދީ، ރައްޔިތުންގެ ކަންބޮޑުވުންތަކަށް ޖަވާބުދާރީވުމަކީ އެ ފޯރަމްގެ މައިގަނޑު މަޤުޞަދެވެ. މިހާތަނަށް މި ސިލްސިލާގެ ހަތް ފޯރަމެއް ވަނީ ބާއްވައިފައެވެ.