މަގުމަތީ ބުޅަލުގެ އާބާދީ ކޮންޓްރޯލުކުރުމަށް "ބައޯކަލޯ" މަޝްރޫޢު ހުޅުމާލޭގައި އިފްތިތާހުކޮށްފި

މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި ޢާންމު ސަރަޙައްދުތަކުގެ ސާފުތާހިރުކަން ދެމެހެއްޓުމަށް "ޕްރޮޖެކްޓް ބައޯކަލޯ" ގެ ނަމުގައި ޤައުމީ ފެންވަރުގެ މަޝްރޫޢެއް މިއަދު ހުޅުމާލޭގައި އިފްތިތާހުކޮށްފިއެވެ.

މި މަޝްރޫޢު ކުރިއަށް ގެންދަނީ މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އާއި ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކާއި އިޖުތިމާޢީ ޖަމިއްޔާތައް އަދި ކަމާ ގުޅޭ އެހެން ފަރާތްތައް ގުޅިގެންނެވެ. "ބައޯކަލޯ" އެ ނަމަކީ ދިވެހި ފޯކްލޯގައި ބިރުވެރިކަމާ ގުޅުވައިގެން ބޭނުންކުރާ ނަމެއް ނަމަވެސް، މި މަޝްރޫޢުގެ ތެރެއިން އެ ނަމަށް އައު މާނައެއް ދީ، އޯގާތެރިކަމާއި ޒިންމާދާރުކަމާއި ރައްކާތެރިކަމުގެ ރަމްޒެއްގެ ގޮތުގައި ވަނީ ބޭނުންކޮށްފައެވެ.

ހުޅުމާލޭގައި ފުރަތަމަ މަރުޙަލާގެ ގޮތުގައި ޕައިލެޓް މަޝްރޫޢެއް ހިންގާއިރު، އެ މަޝްރޫޢުގެ ދަށުން "ޓްރެޕް-ނިއުޓާ-ރިޓާން" (ޓީއެންއާރު) ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމުގެ މަސައްކަތް ކުރިއަށް ގެންދާނެއެވެ. އޭގެ އިތުރުން ވެޓެރިނަރީ ފަރުވާ ދިނުމާއި، ޒިންމާދާރުކަމާ އެކު ކާނާ ދިނުމާއި، ބުޅާ އެޑޮޕްޓުކުރުމަށް ބާރުއެޅުމާއި، މަގުމަތީގެ ސަލާމަތްތެރިކަމާ ގުޅޭ ހޭލުންތެރިކަން އިތުރުކުރުމުގެ ހަރަކާތްތައް ވެސް ހިމެނެއެވެ.

މި މަޝްރޫޢުގެ މައިގަނޑު އަމާޒަކީ ބުޅަލުގެ ވެލްފެއާ އާއި ސާފުތާހިރުކަމާއި ޢާންމުންގެ ހޭލުންތެރިކަން އިތުރުކުރުމުގެ އިތުރުން، އިންސާނީ އުސޫލުތަކުގެ ތެރެއިން މަގުމަތީ ބުޅަލުގެ އާބާދީ ކޮންޓްރޯލުކޮށް، ބުޅަލާއި އިންސާނުން އެކުވެރިކަމާ އެކު ދިރިއުޅެވޭނެ މާޙައުލެއް ޤާއިމުކުރުން ކަމަށް އެ ވުޒާރާއިން ބުނެފައިވެއެވެ. ޕައިލެޓް މަރުޙަލާ ކާމިޔާބު ވެއްޖެ ނަމަ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުމަކީ ވެސް މި މަޝްރޫޢުގެ މަޤުޞަދެއް ކަމަށް އެ ވުޒާރާއިން ބުނެފައިވެއެވެ.