ސިޑްސް ވިޔަފާރި ފޯރަމް މާލޭގައި މިއަދު ފަށައިފި

ތަރައްޤީވަމުން އަންނަ ކުދި ޖަޒީރާ ޤައުމުތަކުގެ އިޤްތިޞާދީ ގޮންޖެހުންތަކާ ގުޅޭ ގޮތުން ޚިޔާލު ބަދަލުކޮށް ތަޖުރިބާ ޙިއްސާކުރުމަށް ބާއްވާ ސިޑްސް ގްލޯބަލް ބިޒްނަސް ނެޓްވޯކް ފޯރަމް ބާސެލޯސް ނަސަންދުރާ މާލެ ހޮޓެލްގައި މިއަދު ފަށައިފިއެވެ.

މި މަހުގެ 23 އިން 25 އަށް ކުރިއަށް ގެންދާ މި ފޯރަމަކީ ކުދި ޖަޒީރާ ޤައުމުތަކުގެ ވިޔަފާރިތަކާއި މަދަނީ ޖަމްޢިއްޔާތަކާއި އެހީ ފޯރުކޮށްދޭ ޤައުމުތަކާއި ދިރާސާވެރިން ފަދަ ތަފާތު ދާއިރާތަކުގެ ފަރާތްތައް އެއް ތަނަކަށް ގެނެސް އެ ޤައުމުތަކުގެ ތަރައްޤީގެ މަސައްކަތްތަކުގައި އެ ފަރާތްތަކުގެ ޙިއްސާ ފުޅާކުރުމަށް ކޮންމެ ދެ އަހަރަކުން ބާއްވާ ފޯރަމެކެވެ. މި އަހަރުގެ ފޯރަމްގައި 30 އަށް ވުރެ ގިނަ ޤައުމުން ސަރުކާރު ތަމްސީލުކުރާ ފަރާތްތަކާއި ކުދި އަދި މެދުފަންތީގެ ވިޔަފާރިތަކާއި އިންވެސްޓަރުންނާއި ޢިލްމީ ފަރާތްތައް ހިމެނޭހެން 200 އަށް ވުރެ ގިނަ ބައިވެރީން ބައިވެރިވުމަށް ވަނީ ހަމަޖެހިފައެވެ.

ފޯރަމްގައި ފަސް ޕެނަލް މަޝްވަރާއާއި ކުދި އަދި މެދުފަންތީގެ ވިޔަފާރިތަކުގެ މާކެޓްޕްލޭސްއަކާއި އިންވެސްޓްމަންޓު ޝޯކޭސްތައް ހިމެނެއެވެ. އެ މާކެޓްޕްލޭސްގައި ކުދި ޖަޒީރާ ޤައުމުތަކުގެ ވިޔަފާރިތަކާއި ސަރުކާރުތަކާއި އެހީދޭ ފަރާތްތަކުގެ ތެރެއިން 15 ބައިވެރިންގެ މަސައްކަތްތަކާއި އުފެއްދުންތައް ދައްކައިލުމަށް ވަނީ ހަމަޖެހިފައެވެ. މީގެ އިތުރުން ނެޓްވޯކިން ފުރުޞަތުތައް ވެސް ލިބިގެންދާނެ ކަމަށް ސަރުކާރުން ވިދާޅުވެއެވެ.

މި ފޯރަމް ރާއްޖޭގައި ބާއްވާ ސަބަބެއް ކަމަށް ސަރުކާރުން ވިދާޅުވީ 2024 ވަނަ އަހަރު އެންޓީގާ އެންޑް ބާބިއުޑާގައި ބޭއްވި ސިޑްސްގެ ހަތަރު ވަނަ ބައިނަލްއަޤުވާމީ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސް ނަންގަވައި ކުދި ޖަޒީރާ ޤައުމުތަކުގެ ގުޅުން ބަދަހިކޮށް ތަރައްޤީއަށް ބޭނުންވާ މާލީ ވަޞީލަތް ހޯދުމަށް ބާރު އެޅުއްވުމުގެ ނަތީޖާ ކަމަށެވެ. އެ ބައްދަލުވުމުގައި ރައީސް ވަނީ ނާއިބު ރައީސްގެ ހައިސިއްޔަތުން ޕްލޭނަރީ ސެޝަންތައް ޗެއާ ކުރައްވައި ޕެނަލްތަކުގައި ބައިވެރިވެވަޑައިގެން ފޯރަމްގެ ހަވާސާގައި ހައި-ލެވަލް އިވެންޓުތައް ބާއްވަވައިފައެވެ. އަދި ޕްރިޕެރޭޓަރީ ކޮމިޓީގެ ކޯ-ޗެއާ ކުރެއްވީ ވެސް ރާއްޖެއިންނެވެ.

މި ފޯރަމް ބާއްވާ ނިޒާމަށް 10 އަހަރު ފުރޭ މި ދަނޑިވަޅާ ދިމާކޮށް 2024 ވަނަ އަހަރުގެ ބައްދަލުވުމުގައި ފާސްކުރި ކުދި ޖަޒީރާ ޤައުމުތަކުގެ 10 އަހަރުގެ ތަރައްޤީގެ ތަޞައްވުރު "އެންޓީގާ އެންޑް ބާބިއުޑާ އެޖެންޑާ ފޯ ސްމޯލް އައިލެންޑް ޑިވެލޮޕިން ސްޓޭޓްސް (އަބާސް)" ފާސްކުރި ފަހުން ބާއްވާ ފޯރަމް ސިލްސިލާގެ ފުރަތަމަ ފޯރަމެއްގެ ގޮތުގައި މި ފޯރަމް ވެސް ފާހަގަކޮށްލެވެއެވެ. ސަރުކާރުން ވިދާޅުވާ ގޮތުގައި ކުދި ޖަޒީރާ ޤައުމުތަކަށް ކުރިމަތިވާ ނާޒުކު މައްސަލަތައް ދުނިޔޭގެ ސަމާލުކަމަށް ގެނައުމުގައި ރާއްޖެ ޒަމާނުއްސުރެ އަދާކޮށްފައިވާ ދައުރު މި ފޯރަމާ އެކު އަލުން ވަރުގަދަވެ އެ ދާއިރާގައި ބައިނަލްއަޤުވާމީ ފެންވަރުގައި ބަސްވިކޭ ޤައުމެއްގެ ގޮތުގައި ރާއްޖެ ފެނިގެންދާނެ ކަމަށެވެ.

މި ފޯރަމް ކުރިއަށް ދާނީ މި މަހުގެ 25 ވަނަ ދުވަހުގެ ނިޔަލަށެވެ.