ނުރައްކާތެރިކޮށް ދުއްވާ ފަރާތްތައް ޕްރޮފައިލްކޮށް ފިޔަވަޅު އެޅުމުގެ މަސައްކަތް ފުލުހުން ފަށައިފި

މަގުމަތީގައި އާންމުންނަށް ބިރުވެރިކަން ލިބޭ ގޮތަށް ނުރައްކާތެރިކޮށް އުޅަނދު ދުއްވާ ފަރާތްތައް ދެނެގަނެ އެ ފަރާތްތަކާ މެދު ހަރުކަށި ފިޔަވަޅު އެޅުމުގެ ޚާއްޞަ މަސައްކަތެއް ދިވެހި ފުލުހުންގެ ޚިދުމަތުން މިއަދު ފަށައިފިއެވެ.

ފުލުހުން މިއަދު ނެރުނު ނޫސް ބަޔާނުގައިވާ ގޮތުން، ނުރައްކާތެރި ގޮތްގޮތަށް ދުއްވާ ފަރާތްތައް ޕްރޮފައިލްކުރުމުގެ މަސައްކަތް މިހާރު ކުރިއަށް އެބަދެއެވެ. އެ ބަޔާނުގައި ބުނެފައިވާ ގޮތުގައި ފުރަތަމަ ފިޔަވަޅެއްގެ ގޮތުން އެ ފަރާތްތައް ފުލުހަށް ހާޒިރުކޮށް ނަސޭހަތްތެރިވާނެއެވެ. އެހެން ނަމަވެސް އެ ޢަމަލުތައް ތަކުރާރުކޮށްފި ނަމަ ޓްރެފިކް ޤާނޫނުގެ ދަށުން ޖޫރިމަނާ ކުރުމާ އެކު، އިތުރު އިންޒާރަކާ ނުލައި ޖިނާއީ ތަޙުޤީޤު ހިންގާނެ ކަމަށެވެ.

މި މަސައްކަތުގެ ދަށުން ޚާއްޞަ ސަމާލުކަމެއް ދީގެން ފިޔަވަޅު އެޅުމަށް ކަނޑައަޅާފައިވާ ކަންކަމުގެ ތެރޭގައި ޒިގްޒެގްކޮށް ދުއްވުމާއި، ސައިލެންސަރު އަޑުގަދަވާ ގޮތަށް އުޅަނދަށް ބަދަލު ގެނެސްގެން ދުއްވުމާއި، ހަރު ބިންމަތީގައި ގާނަމުން ދުއްވުމާއި، ދުވެލިމަތައަށް މަޑުނުކޮށް ބާރު ސްޕީޑުގައި ދުއްވުމާއި، ހުއްދަ ނެތި ރޭސް ޖެހުމާއި ހުނަރު ދެއްކުމާއި، ނުރައްކާތެރިކޮށް އޯވަޓޭކް ކުރުމާއި، މަސްތުގެ ޙާލަތުގައި ދުއްވުމާއި، ފުލުހުން ހުއްޓުވުމުން ފިލުން ހިމެނެއެވެ.

ފުލުހުންގެ ބަޔާނުގައި އިތުރަށް ބުނެފައިވާ ގޮތުގައި ނުރައްކާތެރިކޮށް ދުއްވި އުޅަނދުގެ ޑްރައިވަރުގެ އިތުރުން، އެ އުޅަނދުގެ ވެރިފަރާތާ މެދުގައި ވެސް ފިޔަވަޅު އެޅޭނެއެވެ. އެ ގޮތުން އެ ފަދަ އުޅަނދުތައް 30 ދުވަހަށް ފުލުހުންގެ ބެލުމުގެ ދަށަށް ގެންދާނެ ކަމަށާއި، ކަނޑައެޅިފައިވާ މުއްދަތުގައި ވެރިފަރާތުން ހަވާލު ނުވެއްޖެ ނަމަ އޮންނަ އުސޫލުގެ ދަށުން އެ އުޅަނދުތައް ނައްތައިލާނެ ކަމަށެވެ. އަދި ސަރުކާރުގެ މުއައްސަސާތަކާއި ކުންފުނިތަކުގެ ބައެއް މުވައްޒަފުން މި ފަދަ ޢަމަލުތަކުގައި ބައިވެރިވާކަން ފާހަގަވެފައިވާތީ، އެ ފަރާތްތަކާ މެދު އިދާރީ ފިޔަވަޅު އެޅުމަށް ކަމާ ގުޅޭ މުއައްސަސާތަކާ މަޢުލޫމާތު ހިއްސާކުރަމުންދާ ކަމަށް ވެސް އެ ބަޔާނުގައިވެއެވެ.

މީގެ އިތުރުން، މި ޢަމަލުތައް ތަކުރާރުކުރާ ފަރާތްތަކުގެ ވަނަވަރު އާންމުކުރަމުން ގެންދާނެ ކަމަށާއި، އާންމުން ހިއްސާކުރާ ފޮޓޯ އާއި ވީޑިއޯ ފަދަ ހެކީގެ ޞައްޙަކަން ކަށަވަރުކުރުމަށް ފަހު ޤާނޫނީ ފިޔަވަޅު އެޅުމަށް ބޭނުންކުރާނެ ކަމަށް ފުލުހުން ބުނެފައިވެއެވެ. ފުލުހުން ވަނީ މި ކަންކަމުގައި އާންމު ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް ޝުކުރު އަދާކޮށްފައެވެ.