އެމްއާރުއައި އާއި ސީޓީ ސްކޭނާއި ކެތްލެބްގެ ޚިދުމަތް އަތޮޅުތެރެއަށް ފުޅާކުރުމުގެ މަސައްކަތް ބާރަށް ކުރިއަށްދޭ

އަތޮޅުތެރޭގެ ހޮސްޕިޓަލްތަކުގައި އެމްއާރުއައި އާއި ސީޓީ ސްކޭން އަދި ކެތްލެބް ފަދަ ޚާއްޞަ ޚިދުމަތްތައް ޤާއިމުކުރުމުގެ މަސައްކަތް އެދެވޭ ގޮތެއްގައި ކުރިއަށްދާ ކަމަށް ޞިއްޙަތާ ބެހޭ ވަޒީރު ޑރ. ގީލާ ޢަލީ މިއަދު ވިދާޅުވެއްޖެއެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، ރައްޔިތުންނަށް އަމިއްލަ ސަރަޙައްދުން ފެންވަރު ރަނގަޅު ފަރުވާ ލިބޭނެ މަގު ފަހިކުރުމަށް ބޮޑެތި މަސައްކަތްތަކެއް ކުރެވެމުންދާ ކަމަށެވެ. ރޭޑިއޮލޮޖީގެ ދާއިރާއިން ލިބިފައިވާ ކުރިއެރުންތަކަށް އިޝާރާތްކުރައްވައި ވަޒީރު ވިދާޅުވީ، ރ. އުނގޫފާރު ރީޖަނަލް ހޮސްޕިޓަލުގައި މިހާރު އެމްއާރުއައިގެ ޚިދުމަތް ފެށިފައިވާ ކަމަށެވެ. އަދި ގދ. ތިނަދޫ ޑރ. ޢަބްދުއްސަމަދު މެމޯރިއަލް ހޮސްޕިޓަލާއި ލ. ގަން ރީޖަނަލް ހޮސްޕިޓަލާއި ފުވައްމުލަކު ހޮސްޕިޓަލުގައި އެ ޚިދުމަތް ފެށުމުގެ މަސައްކަތް ބާރަށް ކުރިއަށްދާ ކަމަށް ވިދާޅުވިއެވެ.

ސީޓީ ސްކޭނަށް ބަލާއިރު ފުވައްމުލަކު ހޮސްޕިޓަލުގައި އެ ޚިދުމަތް ފެށިފައިވާއިރު، ހއ. ދިއްދޫ، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ، ލ. ފޮނަދޫ އަދި ތ. ވޭމަންޑޫގައި އެ ޚިދުމަތް ޤާއިމުކުރުމުގެ މަސައްކަތް ދަނީ ކުރިއަށެވެ. ބ. އަތޮޅު ހޮސްޕިޓަލާއި ފުވައްމުލަކު ހޮސްޕިޓަލުގައި މެމޯގްރަފީގެ ޚިދުމަތް ޤާއިމުކޮށްފައިވާއިރު، ހަތަރު ޞިއްޙީ މަރުކަޒެއްގައި އެކްސްރޭގެ ޚިދުމަތް ފެށި، އިތުރު 16 މަރުކަޒެއްގައި އެ މަސައްކަތް ކުރިއަށްދާ ކަމަށާއި 17 ޞިއްޙީ މަރުކަޒެއްގައި އަލްޓްރާ ސައުންޑް ސްކޭންގެ އިންތިޒާމު ހަމަޖައްސާފައިވާ ކަމަށް ވަޒީރު ވިދާޅުވިއެވެ.

ރާއްޖޭގެ ކޮންމެ ރަށެއްގައި ލެބޯޓްރީގެ ޚިދުމަތް ދިނުމުގެ ސިޔާސަތުގެ ދަށުން 76 ރަށެއްގައި ޕޮއިންޓް އޮފް ކެއަރ ޓެސްޓިންގެ އުސޫލުން ޚިދުމަތް ދެމުންދާއިރު، 22 ރަށެއްގައި ފިޒިކަލް ލެބޯޓްރީ ޤާއިމުކޮށް، އިތުރު 52 ރަށެއްގައި ލެބޯޓްރީ ހެދުމުގެ ޢަމަލީ މަސައްކަތް ކުރިއަށްދާ ކަމަށް ވަޒީރު ވިދާޅުވިއެވެ. މީގެ އިތުރުން ކުޅުދުއްފުށީ ރީޖަނަލް ހޮސްޕިޓަލުގައި އޯޑިއޮމެޓްރީގެ ޚިދުމަތް ޤާއިމުކޮށް، 11 ރަށެއްގައި އަލަށް ޑައިލިސިސްގެ ޚިދުމަތް ފެށި، ދެ ހޮސްޕިޓަލެއްގައި ޑައިލިސިސް އެނދު އިތުރުކޮށްފައިވެއެވެ. އައްޑޫ އިކުއިޓޯރިއަލް ހޮސްޕިޓަލުގައި ކެތްލެބްގެ ޚިދުމަތް ފެށިފައިވާއިރު، ނ. އަތޮޅު ހޮސްޕިޓަލުގައި އައިސީޔޫގެ ޚިދުމަތް ފެށުމާއި، ކުޅުދުއްފުއްޓާއި އައްޑޫގައި އައިކެއާއާ ގުޅިގެން އައިނު ހެއްދުމުގެ ޚިދުމަތް ފުޅާކުރުމާއި، ދެ ހޮސްޕިޓަލެއްގައި އަލަށް ޑެންޓަލް ޚިދުމަތް ފެށި 12 ހޮސްޕިޓަލެއްގައި ޑެންޓަލް ޗެއާ ޤާއިމުކުރުމާއި، އއ. އަތޮޅު، ގއ. އަތޮޅު، ތިނަދޫ، ފުވައްމުލައް އަދި އައްޑޫގައި ހައިޕަރބެރިކް ޗެމްބަރުގެ ޚިދުމަތް ޤާއިމުކުރުން ފާހަގަކޮށްލެވެއެވެ.

ވަޒީރު ވިދާޅުވީ ސަރުކާރުގެ އަމާޒަކީ ޞިއްޙީ ވިއުގަ ވަރުގަދަކޮށް، ފަރުވާ ހޯދުމަށް މާލެއަށް ބަރޯސާވާން ޖެހޭ މިންވަރު ކުޑަކުރުން ކަމަށެވެ.