ނަފްސާނީ އެހީގެ ހެލްޕްލައިނަށް ދެ އަހަރު ތެރޭ 23،679 ކޯލް ލިބިއްޖެ

ނަފްސާނީ އެހީތެރިކަމަށް ޚާއްޞަ ޤައުމީ ހެލްޕްލައިން "1677" އަށް 2024 ވަނަ އަހަރުން ފެށިގެން މިހާތަނަށް ޖުމްލަ 23،679 ކޯލް ލިބިފައިވާ ކަމަށް ޞިއްޙީ ވުޒާރާއިން ހާމަކޮށްފިއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޞިއްޙީ ވަޒީރު ގީލާ ޢަލީ ހިއްސާކުރެއްވި ތަފާސްހިސާބުތަކަށް ބަލާއިރު، 2024 ވަނަ އަހަރު އެ ހެލްޕްލައިނަށް ލިބުނީ 2،576 ކޯލެވެ. އެ ޢަދަދު 2025 ގައި 10،821 އަށް މައްޗަށް ދިޔައިރު، 2026 ވަނަ އަހަރުގެ މިހާތަނަށް 10،282 ކޯލް ލިބިފައިވެއެވެ.

ނަފްސާނީ ބަލިތަކަށް ފަރުވާ ދިނުމާ ގުޅޭ ގޮތުން ވަޒީރު ވިދާޅުވީ "މަރުކަޒީ ފަރުވާގެ ނިޒާމުގެ ތެރެއިން 201 މީހަކު ފަރުވާ ފުރިހަމަކޮށް ޢާއިލާތަކާ ހަވާލުކުރެވިފައިވާ" ކަމަށެވެ. އޭގެ އިތުރުން 64 މީހަކަށް ފަރުވާ ދީ އެ ފަރާތްތައް އަލުން މުޖުތަމަޢުގެ ޙަރަކާތްތަކުގައި ބައިވެރިކުރުމުގެ މަސައްކަތް ކުރިއަށްދާ ކަމަށް ވެސް ވިދާޅުވިއެވެ. ޖަމިއްޔާތަކާ ގުޅިގެން ބަލިމީހުންގެ ގެތަކަށް ޒިޔާރަތްކޮށް ފަރުވާ ފޯރުކޮށްދޭ ޚިދުމަތެއް ވެސް ތަޢާރަފުކޮށްފައިވާ ކަމަށް ވަޒީރު ވިދާޅުވިއެވެ.

ކުރިއަށް ރާވާފައިވާ މަޝްރޫޢުތަކާ ބެހޭ ގޮތުން ގީލާ ވިދާޅުވީ ކުޑަކުދިންނަށް ޚާއްޞަ ނަފްސާނީ ފަރުވާގެ ނިޒާމެއް ބިނާކުރުމުގެ މަސައްކަތް ހިނގަމުންދާ ކަމަށެވެ. ބޭސް ލިބުމުގެ ދަތިކަން ޙައްލުކުރުމަށް ނުވަ ރަށެއްގައި ޚިދުމަތް ފެށުމަށް ތައްޔާރީތައް ވަމުންދާ ކަމަށާއި، 80 އެނދުގެ ސައިކިއެޓްރިކް އިމަޖެންސީ ޚިދުމަތެއް ފެށުމާއި ޖިންސަށް ޚާއްޞަ ރީހެބިލިޓޭޝަން ޚިދުމަތް ފުޅާކުރުމާއި އަންހެނުންނަށް ޚާއްޞަ ނަފްސާނީ ބަލިމީހުން ބަލަހައްޓާ މަރުކަޒެއް ޤާއިމުކުރުމަށް ނިންމާފައިވާ ކަމަށް ވެސް ވިދާޅުވިއެވެ.

މީހުން ބިނާކުރުމުގެ ދާއިރާއިން ހޯދާފައިވާ ކާމިޔާބީތަކަށް އަލިއަޅުއްވައިލައްވަމުން ވަޒީރު ވިދާޅުވީ އެމްއެޗްޖީއޭޕީ ޕްރޮގްރާމުން 193 މީހުން އަދި ސައިކޮލޮޖިކަލް ފަސްޓްއެއިޑް (ޕީއެފްއޭ) ޕްރޮގްރާމުން 164 މީހުން ތަމްރީނުކޮށްފައިވާ ކަމަށެވެ. މެންޓަލް ހެލްތު ލިޓްރަސީ ޕްރޮގްރާމް މެދުވެރިކޮށް 512 މީހަކު ހޭލުންތެރިކޮށްފައިވާ ކަމަށް ވެސް ވިދާޅުވިއެވެ.