ދެ އަހަރަށް ފަހު ދަގަނޑޭ ދަނޑަށް ނުކުތް މެޗުގައި ނިއު ބޮޑު މޮޅެއް ހޯދައިފި

އަނިޔާގައި ދެ އަހަރަށް ވުރެ ގިނަ ދުވަސް ހޭދަކުރުމަށް ފަހު ޢަލީ އަޝްފާޤް (ދަގަނޑޭ) އެނބުރި ކުޅެން ނުކުތް މެޗުގައި ދިރާގު ދިވެހި ލީގުގައި ބުރު ސްޕޯޓްސް 3-0 އިން ބަލިކޮށް ނިއު ރޭޑިއަންޓުން މޮޅުވެއްޖެއެވެ.

ގަލޮޅު ދަނޑުގައި މިރޭ ކުޅުނު މި މެޗުގެ ފުރަތަމަ ލަނޑު 25 ވަނަ މިނެޓުގައި ކާމިޔާބުކުރީ ހަސަން ރާއިފް އަހުމަދު (ހަންނަ) އެވެ. ކެޕްޓަން ޢަލީ ފާސިރު (ސެންޓޭ) އޭރިއާ ތެރެއިން ފޮނުވައިލި ބޯޅައެއް ހަންނަ ގޯލުގެ ތެރެއަށް ފޮނުވައިލީ ބުރުގެ ގޯލްކީޕަރު ހަސަން ޢަލީފް އިބްރާހީމަށް އެއްވެސް ޗާންސެއް ނުލިބޭ ގޮތަށެވެ. ދެވަނަ ހާފް ފެށިތާ ކުޑައިރުކޮޅެއް ފަހުން 53 ވަނަ މިނެޓުގައި ސެންޓޭ ސްކޯ ދެ ގޯލަށް ބަދަލުކޮށްލީ ބުރުގެ ޑިފެންޑަރުންނަށް ބޯޅަ ދިފާޢުނުކުރެވި އޭރިއާ ރޮނގުމައްޗަށް ވެއްޓުނު ބޯޅައެއް ގޯލުގެ ތިރީ ކަނަށް ފޮނުވައިލައިގެންނެވެ. ސެންޓޭ ބްރޭސް ފުރިހަމަކޮށް ތިންވަނަ ގޯލް ކާމިޔާބުކުރީ 58 ވަނަ މިނެޓުގައެވެ.

ދަގަނޑޭ ދަނޑަށް ނުކުތީ 80 ވަނަ މިނެޓުގައެވެ. އޭނާ ގަލޮޅު ދަނޑުގައި އެންމެ ފަހުން ކުޅެފައިވަނީ 2023 ވަނަ އަހަރުގެ އެޕްރީލް މަހު ސުޕަ ޔުނައިޓެޑް ސްޕޯޓްސް (ސަސް) އަށެވެ. އެ ފަހަރު ޕްރެޒިޑެންޓްސް ކަޕް މެޗެއްގައި ކުޅެނިކޮށް ކަކުލަށް އިތުރު އަނިޔާއެއް ލިބި ކުޅުމާ ދުރަށް ދާން ޖެހުނީއެވެ.

ގާތްގަނޑަކަށް ހަ އަހަރު ކުރީއްސުރެ ކަކުލަށް ލިބެމުން ދިޔަ އަނިޔާއަށް ފަރުވާ ހޯދުމަށް މިދިޔަ އަހަރުގެ ސެޕްޓެމްބަރުގައި އިންޑިއާގައި އޭސީއެލް އޮޕަރޭޝަނެއް ކުރުމަށް ފަހު ދަގަނޑޭ ބައެއް ފުޓްސަލް މުބާރާތްތަކުގައި ކުޅެ ދެ އަހަރުގެ ކޮންޓްރެކްޓެއްގައި ނިއުއާ ގުޅުނެވެ. ދިރާގު ޕްރިމިއާ ލީގުގެ ފުރަތަމަ ދެ މެޗުގައި ބެންޗުގައި އިނުމަށް ފަހު ސާޖަރީ ނުކޮށް ފިޓްވެވޭތޯ ނިއު އިން ކުރި މަސައްކަތް ކާމިޔާބު ނުވުމުން މެނިސްކަސް އޮޕަރޭޝަނެއް ކުރީއެވެ. ދަގަނޑޭގެ ކަކުލުގެ އަނިޔާ ބޮޑުވީ 2022 ވަނަ އަހަރުގެ ކުރީކޮޅު ވެލެންސިއާ އަށް ސީޒަން ހުޅުވި މެޗުގައި ކުޅުމަށް ފަހުގައެވެ. އޭގެ ކުރިން 2021 ވަނަ އަހަރު މާލޭގައި ބޭއްވި ސާފް ޗެމްޕިއަންޝިޕުގައި ވެސް ޤައުމީ ޓީމަށް ކުޅުނީ ވޭނާ އެކުގައެވެ.

މި މޮޅާ އެކު ނިއު 23 ޕޮއިންޓާ އެކު ތާވަލުގެ ތިންވަނައަށް ޖެހިލި އިރު ކުރީގައި އޮތީ 34 ޕޮއިންޓާ އެކު މާޒިޔާއެވެ. ދެވަނައިގައި 28 ޕޮއިންޓް ހޯދައިގެން އޮޑި ސްޕޯޓްސް އޮތް އިރު ބަލިވި ބުރު 20 ޕޮއިންޓާ އެކު ހަތަރުވަނައިގައި އޮތެވެ. ކުރީގައި ތިން ފަހަރެއްގެ މަތިން ނިއު އަށް ކުޅެ ގިނަ ކާމިޔާބީތަކެއް ހާސިލުކޮށްފައިވާ 40 އަހަރުގެ ދަގަނޑޭ މިހާރު ގުނަމުން ދަނީ ކެރިއަރުގެ ފަހު ދުވަސްތަކެވެ.