ކެމިކަލް ވިއްކުމުގެ ހުއްދަ ނެގުމަށް ދީފައިވާ މުއްދަތު އެއް މަހަށް އިތުރުކޮށްފި

ނުރައްކާތެރި ކެމިކަލް ވިއްކުމުގެ ހުއްދަ ހޯދުމާއި ކެމިކަލް ރައްކާކުރާ ތަންތަން ރަޖިސްޓަރީ ކުރުމަށް ކުރިން ދީފައިވާ މުއްދަތު ހަމަވުމާ ގުޅިގެން، ޑިފެންސް ވުޒާރާއިން މިއަދު އެ މުއްދަތު އިތުރު އެއް މަހަށް ދިގުކޮށްދީފިއެވެ.

އެ ވުޒާރާއިން މިއަދު ނެރުނު އިޢުލާނުގައި ބުނެފައިވާ ގޮތުގައި، ކުރީގެ މުއްދަތު ހަމަވިއިރު ކެމިކަލް ވިއްކާ ފިހާރަތައް ރަޖިސްޓަރީކޮށް ހުއްދައަށް ހުށަހެޅި ފަރާތްތަކުގެ ޢަދަދު ނިސްބަތުން ވަރަށް މަދެވެ. އެހެންވެ، ކެމިކަލް ވިއްކާ ފަރާތްތަކުން ހުއްދަ ނެގުމަށާއި ކެމިކަލް ރައްކާކުރާ ނުވަތަ ބަހައްޓާ ތަންތަން މަކުޑި ޕޯޓަލް މެދުވެރިކޮށް ރަޖިސްޓަރީ ކުރުމުގެ ފުރުޞަތު މިއަދުން ފެށިގެން އެއް މަހަށް ހުޅުވައިލާފައިވެއެވެ.

ޑިފެންސް ވުޒާރާއިން ވަނީ، އަލަށް ދިން މުއްދަތުގެ ތެރޭގައި ރަޖިސްޓަރީ ނުކޮށް ކެމިކަލް ވިއްކާ ފަރާތްތަކާ މެދު ފިޔަވަޅު އަޅާނެ ކަމުގެ އިންޒާރު ދީފައެވެ. ނުރައްކާތެރި ކެމިކަލާ ބެހޭ ގަވާއިދު 2019 (ގަވާއިދު ނަންބަރު 2019/R-1057) ގެ ދަށުން ފިޔަވަޅު އެޅުމުގެ އިތުރުން، ހުއްދަ ނުނަގާ ފަރާތްތަކަށް ކުރިއަށް އޮތް ތަނުގައި ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ ނުދޭނެ ކަމަށް ވެސް އެ ވުޒާރާއިން ހާމަކޮށްފައިވެއެވެ.