ށ. ފީވަކު ކައުންސިލުން އެޅި ގެސްޓްހައުސް 20 އަހަރަށް ކުއްޔަށް ދީފި

ދައުލަތުގެ ގްރާންޓުން ޚަރަދު ކުޑަކޮށް ރައްކާކުރި ފައިސާއިން ށ. ފީވަކުގައި ކައުންސިލުން ތަރައްޤީކުރި ގެސްޓްހައުސް، 20 އަހަރުގެ މުއްދަތަށް ހިންގުމަށް އަމިއްލަ ފަރާތަކާ ހަވާލުކޮށްފިއެވެ.

އެ ތަން ހިންގުމާ ހަވާލުވެފައިވަނީ ބަލްމާ ސަންސެޓް ރެސްޓޯރެންޓެވެ. މި އެއްބަސްވުމުގެ ދަށުން ކައުންސިލަށް މަހަކު 22,500 ރުފިޔާގެ ކުއްޔެއް ލިބޭނެއެވެ. އާމްދަނީ ހޯދޭނެ އިތުރު ވަސީލަތެއް ނެތް ކައުންސިލަކަށް މިއީ ބޮޑު މާލީ ކުރިއެރުމެއް ކަމަށް އެ ކައުންސިލުން ފާހަގަކޮށްފައިވެއެވެ.

ފީވަކު ކައުންސިލްގެ އިދާރާގައި ބޭއްވި ރަސްމިއްޔާތެއްގައި ކައުންސިލްގެ ފަރާތުން އެއްބަސްވުމުގައި ސޮއިކުރެއްވީ ކައުންސިލްގެ ރައީސް ޢަލީ ރަޝީދު ޙަސަނެވެ. ބަލްމާ ސަންސެޓް ރެސްޓޯރެންޓްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު މުޖުތަބާއެވެ. ޢަލީ ރަޝީދު ވިދާޅުވީ، ގެސްޓްހައުސް އެޅުމުގެ މައިގަނޑު މަޤުޞަދަކީ ފީވަކުގައި ލޯކަލް ޓޫރިޒަމް ފުޅާކުރުމާ އެކު، އެކި ބޭނުންތަކުގައި ރަށަށް ޒިޔާރަތްކުރާ ފަރާތްތަކަށާއި ފަތުރުވެރިންނަށް ތިބެވޭނެ ފަސޭހަ އިންތިޒާމެއް ހަމަޖެއްސުން ކަމަށެވެ. މި މަސައްކަތަކީ ދައުލަތުގެ ގްރާންޓުން އިސްރާފު ކުޑަކޮށް ސަލާމަތްކުރި ފައިސާއިން ކުރެވުނު މުހިންމު އިންވެސްޓްމަންޓެއް ކަމަށް ވެސް އޭނާ ފާހަގަކުރެއްވިއެވެ.

"މިތަން ކުއްޔަށް ދީގެން ކައުންސިލަށް ލިބޭ އާމްދަނީ ބޭނުންކުރާނީ ރަށުގެ ތަރައްޤީއަށާއި ރައްޔިތުންގެ ލާބައަށް ކުރެވޭ އެކި ކަންކަމަށް،" ޢަލީ ރަޝީދު ވިދާޅުވިއެވެ.

ލޯކަލް ޓޫރިޒަމަށް މަގުފަހިކުރުމުގެ ގޮތުން ފީވަކު ކައުންސިލުން ކުރިން ވެސް ވަނީ ބަނދަރު ހިޔާއަކާއި ފެންވަރު ރަނގަޅު ރެސްޓޯރެންޓެއް އެ ރަށުގައި ޤާއިމުކޮށްފައެވެ.