އެމްޑަބްލިޔުއެސްސީން ކަނޑުއަޑީގައި ފެން ޕްލާންޓެއް ޤާއިމުކުރުމުގެ މަސައްކަތް ފަށަނީ

ނޯވޭގެ ކުންފުންޏަކާ ގުޅިގެން ކަނޑުގެ 500 މީޓަރު އަޑީގައި ފެން އުފައްދާ ނިޒާމެއް ޤާއިމުކޮށް އަންނަ އަހަރުގެ މެދުތެރޭގައި ޢަމަލީ މަސައްކަތް ފެށުމަށް ތައްޔާރުވަމުންދާ ކަމަށް މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ)ގެ މެނޭޖިން ޑިރެކްޓަރު ޙުސައިން ފަހުމީ ވިދާޅުވެއްޖެއެވެ.

ދިވެހިރާއްޖޭގެ އަޑާއި ޓީވީއެމް ގުޅިގެން ގެނެސްދޭ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން ފަހުމީ ވިދާޅުވީ ރާއްޖޭގެ ފެނުގެ ޚިދުމަތް ފުޅާކޮށް ހަރުދަނާ ކުރުމަށް ރާވާފައިވާ ބޮޑެތި މަޝްރޫޢުތަކުގެ ތެރެއިން އެންމެ ފާހަގަކޮށްލެވޭ މަޝްރޫޢަކީ ކަނޑުއަޑީގެ ފެން ޕްލާންޓުގެ މަޝްރޫޢު ކަމަށެވެ. މި ދާއިރާއިން ފާހަގަކޮށްލެވޭ ކާމިޔާބީތައް ހޯދާފައިވާ ނޯވޭގެ ތަޖުރިބާކާރު ކުންފުންޏަކާ އެކު އެއްބަސްވުމުގައި ސޮއިކޮށް ފީސިބިލިޓީ ދިރާސާއާއި ޓެކްނިކަލް އަދި ތިމާވެށީގެ ދިރާސާތައް މިހާރު ކުރިއަށްދާ ކަމަށް ފަހުމީ ވިދާޅުވިއެވެ.

"އެންމެ ފުރަތަމަ މި ހަދަނީ ފައިނޭސަލް ފީސިބިލިޓީ ކިހާ ބޮޑު އިންވެސްޓުމަންޓެއްތޯ ދާނީ. މީގައި އެބަހުރި ވަރަށް ބޮޑު އެޑްވާންޓޭޖް ތަކެއް. އެނަރޖީ އެފިޝިއަންޓުވުމާއި ރިޖެކްޓު ވޯޓަރ ކަނޑަށް ދޫކުރުމަށް ފަސޭހަވުމާއި 500 މީޓަރު އަޑިން ލިބޭ ލޮނަކީ ވަރަށް ސާފުލޮނެއް. ބޯހޯލުން ނަގާ ލޮނަށްވުރެއް ސާފުވާނެ. އޯރގަނިކް މެޓަލް މަދު މީގެ ސަބަބުން އެފިޝިއެންސީ އިތުރުވުމާއި އަދި ޚަރަދު ކުޑަވާނެ." ފަހުމީ ވިދާޅުވިއެވެ.

ފެން ޕްލާންޓް ބެހެއްޓުމަށް ބޭނުންވާ ބިން ހޯދުމުގައި މިހާރުވެސް ބޮޑެތި ދަތިތަކާ ކުރިމަތިވާ ކަން ފާހަގަކުރައްވައި ފަހުމީ ވިދާޅުވީ ކަނޑުގެ އަޑީގައި ފެން އުފެއްދޭނެ ގޮތް ހެދިއްޖެނަމަ ރާއްޖެ ފަދަ ޖަޒީރާ ޤައުމަކަށް އެއީ ވަރަށް ބޮޑު ކުރިއެރުމެއް ކަމަށެވެ. ނޯވޭގައި މި ނިޒާމު ކާމިޔާބު ކަމާ އެކު ހިނގަމުންދާތީ އެ ތަޖުރިބާ ދެނެގަތުމަށް އެމްޑަބްލިޔުއެސްސީގެ ޓެކްނިކަލް ޓީމެއް ނޯވޭއަށް ފޮނުވުމަށް ވެސް ހަމަޖެހިފައިވާ ކަމަށް ފަހުމީ ވިދާޅުވިއެވެ.

މީގެ އިތުރުން ތިލަމާލެ ބުރިޖާ ގުޅުވައިގެން މާލެއާއި ހުޅުމާލެއަށް ފެން ފޯރުކޮށްދިނުމަށް ހޮޅި އެޅުމުގެ މަޝްރޫޢެއް ވެސް ރާވާފައިވާ ކަމަށް ފަހުމީ ވިދާޅުވިއެވެ. ތިލަފުށި ނުވަތަ ގުޅީފަޅުގައި ފެން ރައްކާކުރާ ނިޒާމެއް ބިނާކޮށް އެ ތަނުން މާލެއާއި ހުޅުމާލެއަށް ފެން ފޮނުވުމަށް ރާވާފައިވާ ކަމަށާއި ބުރިޖުގެ މަސައްކަތް ނިމެންވާއިރަށް އެ މަޝްރޫޢު ފެށުމާ ގުޅޭ ގޮތުން ސަރުކާރާ އެކު މަޝްވަރާ ކުރަމުންދާ ކަމަށް ވެސް އެ ކުންފުނީގެ މެނޭޖިން ޑިރެކްޓަރު ވިދާޅުވިއެވެ. މި ދެ މަޝްރޫޢަކީ ވެސް ބޮޑު ހޭދައެއް ހިނގާނެ ބިޔަ މަޝްރޫޢުތައް ކަމަށް ފަހުމީ ސިފަކުރެއްވިއެވެ.