ބެޒޯސްގެ ހިއްސާ އޮންނަ 1982 ހޯލްޑިންގްސް އިން ލިވަޕޫލްގެ ހިއްސާ ގަނެފި

އެމޭޒަންގެ ބާނީ ޖެފް ބެޒޯސް ހިއްސާވާ 1982 ހޯލްޑިންގްސް ކިޔާ ކުންފުންޏަކުން އިނގިރޭސި ޕްރިމިއާ ލީގުގެ ކްލަބް ލިވަޕޫލްގެ ތިންބައިކުޅަ އެއްބައިގެ ހިއްސާ ގަތުމަށް އެއްބަސްވެފައިވާ ކަމަށް އެ ކްލަބު ހިންގާ ފެންވޭ ސްޕޯޓްސް ގްރޫޕުން ހާމަކޮށްފިއެވެ.

ދުނިޔޭގެ ހަތަރުވަނައަށް އެންމެ މުއްސަނދި މީހާގެ ގޮތުގައި ފާހަގަކުރެވޭ ބެޒޯސްގެ އިތުރުން 1982 ހޯލްޑިންގްސްގެ ޕާޓްނަރުންގެ ތެރޭގައި ހިމެނެނީ އިންޑިއާ ދަރިކޮޅުގެ އިނގިރޭސި މިލިއަނަރ އަމިތް ބަޓިއާ އާއި ފޭސްބުކްގެ ކޯ ފައުންޑާ އެޑުއާޑޯ ސަވެރިންއެވެ. ފެންވޭ ސްޕޯޓްސް ގްރޫޕުން ނެރުނު ބަޔާނުގައި ބުނެފައިވާ ގޮތުން އެ ކުންފުނީގެ ހިއްސާ 1982 ހޯލްޑިންގްސް އަށް ވިއްކައިލުމުގެ މަސައްކަތް މިހާރު ކުރިއަށް އެބަ ދެއެވެ.

ރިޕޯޓުތައް ބުނާ ގޮތުގައި ލިވަޕޫލްގެ ބޯޑުގައި ބެޒޯސް ނީންނާނެއެވެ. ނަމަވެސް ބަޓިއާ ކްލަބުގެ ވައިސް ޗެއާމަންގެ މަޤާމަށް އައްޔަންކުރެވޭނެއެވެ. މަޝްހޫރު ބިލިއަނަރ ލަކްޝްމީ މިއްޓަލްގެ ދަނބި ދަރިއެއް ކަމުގައިވާ ބަޓިއާ އަކީ ޕްރިމިއާ ލީގުގެ ކްލަބް ކުއީންސް ޕާކް ރޭންޖާސްގެ ޑިރެކްޓަރު އަދި ކޯ އޯނަރެއްގެ ގޮތުގައި 18 އަހަރު މަސައްކަތްކޮށްފައިވާ ފަރާތެކެވެ.

މި ހިއްސާ ބަދަލުވުމާ ގުޅިގެން މިހާރު ކުރިއަށްދާ ޓްރާންސްފާ ބާޒާރަށް އެއްވެސް ބަދަލެއް ނާންނާނެ ކަމަށާއި ބޮޑު ހޭދައެއްކޮށް އިތުރު ކުޅުންތެރިން ގެނައުމުގެ ރޭވުމެއް ނެތް ކަމަށް ކްލަބުން ބުނެފައިވެއެވެ.

މިވަގުތު ގަނެފައިވަނީ ކުޑަ ހިއްސާއެއް ނަމަވެސް ކުރިއަށް އޮތް ތަނުގައި ހިއްސާ އިތުރުކުރުމުގެ ފުރުޞަތު 1982 ހޯލްޑިންގްސް އަށް ލިބިފައިވާ ކަމަށް ރިޕޯޓުތައް ބުނެއެވެ. އެހެންކަމުން ކައިރި މުސްތަޤުބަލެއްގައި ލިވަޕޫލްގެ މެޖޯރިޓީ ހިއްސާ އެ ކުންފުނީގެ ބާރުގެ ދަށަށް ދިއުމުގެ ފުރުޞަތު އޮތެވެ.