ޓްރެފިކް ޤަވާއިދާ ތަކުރާރުކޮށް ޚިލާފުވާ ފަރާތްތަކަށް ހަރުކަށި ފިޔަވަޅު އަޅާނެ ކަމުގެ އިންޒާރު ދީފި

މަގުމަތީގެ ޤާނޫނުތަކާއި ޤަވާއިދުތަކާ ތަކުރާރުކޮށް ޚިލާފުވާ ފަރާތްތަކާ މެދު ޚާއްޞަ ފިޔަވަޅުތަކެއް އެޅުމަށް ނިންމައި، ކަމާ ގުޅޭ އިދާރާތަކަށް އެކަން އަންގަވާފައިވާ ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

މަގުމަތީގެ ސަލާމަތާ ގުޅޭ ގޮތުން ސީޕީ ދެއްވި މެސެޖުގައި ވިދާޅުވީ ޓްރެފިކް އުސޫލުތަކަށް ބޯނުލަނބާ މަދު ބައެއްގެ ޢަމަލުތަކުގެ ސަބަބުން ގިނަ ބައެއްގެ ޙައްޤުތައް ގެއްލި، ނުރައްކާތެރި ހާދިސާތައް ހިނގަމުންދާ ކަމަށެވެ. އެ ފަދަ ޢަމަލުތައް ހުއްޓުވައި، މަގުތަކަކީ އެންމެންނަށް ރައްކާތެރި ތަނަކަށް ހެދުމަކީ މި ފިޔަވަޅުތައް އެޅުމުގެ މަޤުޞަދު ކަމަށް ވެސް ސީޕީ ވިދާޅުވިއެވެ.

މި ފިޔަވަޅުތައް ތަންފީޒުކުރާނީ ކަމާ ގުޅުން ހުރި އިދާރާތައް ގުޅިގެން ކަމަށާއި، މާލެ ސަރަޙައްދުގެ އިތުރުން އަތޮޅުތެރޭގައި ވެސް މިފަދައިން ޢަމަލުކުރާނެ ކަމަށް ސީޕީ ވިދާޅުވިއެވެ. އަދި ފުލުހުން ކުރާ މި މަސައްކަތަށް ހުރިހާ ފަރާތްތަކުން އެއްބާރުލުން ދެއްވުމަށް ވެސް އެމަނިކުފާނު ވަނީ އިލްތިމާސްކުރައްވައިފައެވެ.

ސީޕީ މި އިޢުލާނު ކުރެއްވީ ފަހަކަށް އައިސް މާލެ ސަރަޙައްދުގައި ހިނގި ޓްރެފިކް ހާދިސާތަކެއްގައި ބައެއް ފަރާތްތަކަށް ބޮޑެތި އަނިޔާ ލިބި، ފުރާނައަށް ގެއްލުންވި ހާދިސާތަކެއް ހިނގާފައިވާ ދަނޑިވަޅެއްގައެވެ.