ރަސްމާލެ އެއްބަސްވުން ޤާނޫނުއަސާސީއާ ޚިލާފު ކަމަށް ކަނޑައަޅައިދިނުމަށް ސުޕްރީމް ކޯޓަށް ހުށަހަޅައިފި

ފުށިދިއްގަރު ފަޅުން ހިއްކި ބިމުގެ 500 ހެކްޓަރު ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ސަރުކާރުން ވީ އެއްބަސްވުމަކީ ޤާނޫނުއަސާސީއާ ޚިލާފު ނިންމުމެއް ކަމަށް ކަނޑައަޅައިދިނުމަށް އެދި ޤާނޫނީ ވަކީލު އަލީ ހުސެއިން ސުޕްރީމް ކޯޓަށް މައްސަލައެއް ހުށަހަޅައިފިއެވެ.

އަލީ ހުސެއިން ހުށަހެޅި މައްސަލައިގައި ބުނެފައިވަނީ އެ ނިންމުން ޤާނޫނުއަސާސީގެ 250 ވަނަ މާއްދާއާ ފުށުއަރާ ކަމަށެވެ. އޭގެ އިތުރުން، އެ ތަންތަން ތިންވަނަ ފަރާތަކަށް ވިއްކި ނަމަވެސް ނުވަތަ ވާރުތައިން ލިބުނު ނަމަވެސް އާ ވެރިފަރާތަށް އިތުރު 99 އަހަރުގެ މުއްދަތެއް ލިބޭ ގޮތަށް އެއްބަސްވުމުގައި ހިމަނާފައިވާ ޝަރުތަކީ ޤާނޫނުއަސާސީގެ 251 ވަނަ މާއްދާގެ (ށ) އާ ތައާރުޒުވާ ކަމެއް ކަމަށް ވެސް އެ މައްސަލައިގައި ފާހަގަކޮށްފައިވެއެވެ.

ޤާނޫނުއަސާސީގެ 268 ވަނަ މާއްދާގައި ޤާނޫނުއަސާސީއާ ޚިލާފަށް ކުރާ ކޮންމެ ކަމަކީ ބާތިލު ކަމެއް ކަމަށް ބަޔާންކޮށްފައި އޮތް އޮތުމަށް ރިއާޔަތްކޮށް، އެ އެއްބަސްވުމާއި އެ އެއްބަސްވުން އެކުލަވައިލުމަށް ނިންމި ނިންމުން ބާތިލު ކަމަށް ކަނޑައަޅައިދިނުމަށް ވެސް އަލީ ހުސެއިން އެދިފައިވެއެވެ. ހަމައެއާ އެކު، ކޯޓުން ވަކި ގޮތެއް ނިންމެންދެން އެ އެއްބަސްވުމުގެ ދަށުން ހިނގާ ހުރިހާ މުއާމަލާތެއް މެދުކަނޑައިލުމުގެ ވަގުތީ އަމުރެއް ނެރެދިނުމަށް ވެސް އޭނާ ވަނީ އެދިފައެވެ.

ރަސްމާލޭގެ ބައެއް ތަރައްޤީކުރުމަށް ސަރުކާރުން ވަނީ އީގަލް ހިލްސްއާ އެކު އެއްބަސްވުމެއް ޤާއިމްކޮށްފައެވެ. ސަރުކާރުން ބުނެފައިވަނީ މިއީ ރިސޯޓެއް ދޫކުރާ ފަދައިން ދޫކުރި ތަނެއް ކަމަށާއި، މި އިންވެސްޓްމަންޓުގެ ސަބަބުން ރާއްޖެ ނުދެކޭ ފަދަ އާމްދަނީއެއް ލިބޭނެ ކަމަށެވެ.