ރިޝްމީވެސް ފާހަގަކުރީ ވަތަނީ ހިދުމަތުގެ ޕްރޮގްރާމުން ދަރިފުޅަށް އައި ހެޔޮ ބަދަލު

"ދިވެހި ވަޠަނީ ޚިދުމަތުގެ ޕްރޮގްރާމް" މިއީ ސަރުކާރަކުން ޤައުމީ ލެވެލްގައި ކުރިއަށް ގެންދަންފެށި ޕްރޮގްރާމްގެ ތެރެއިން ރައްޔިތުންގެ ބައިވެރިވުން އެންމެބޮޑަށް ލިބުނު އެއް ޕްރޮގްރާމެވެ. އަދި ސިޔާސީ ނުވެ ރައްޔިތުން އެ ޕްރޮގްރާމެއްގެ ވާހަކަ ދައްކާ ހަމައެކަނި ޕްރޮގްރާމްވެސް މެއެވެ. ގިނަބަޔަކު އިއްތިފާގުވާ ގޮތުގައި ސަރުކާރަކުން މިފަދަ ޕްރޮގްރާމެއް ފެށުން މާބޮޑަށް ލަސްވެސް ވެއްޖެއެވެ. އެމީހުން އެހެން އެ ބުނަނީ ސަބަބެއް ނެތިއެއްވެސް ނޫނެވެ. ކުރިއާ ހިލާފަށް ބޮޑެތިވަމުން އަންނަ ކުދިންގެ ދިރިއުޅުމުގެ ވައްޓަފާޅި މާބޮޑަށްވެސް ބަދަލުވީއެވެ. ބޮޑެތިވަމުން އަންނަ ކުދިން އަމަލީ މައިދާނަށް ނިކުންނަން ބަލާއިރު، މަސައްކަތުގެ ވެއްޓަށް ތައްޔާރުވެފައި ނެތުމަކީ މިއަދު ބެލެނިވެރިންގެ އިތުރުން ވަޒީފާ ދޭ ފަރާތްތަކުގެވެސް މިއަދު އޮތް ވަރަށްބޮޑު ކަންބޮޑުވުމެކެވެ.

ކޮންމެއަކަސް މިއަދު މިވަނީ ވަތަނީ ހިދުމަތުގެ ފަންނީ ޕްރޮގްރާމުގެ ފުރަތަމަ ބެޗްގެ ދަރިވަރުން ދަސްވެނިވިފައެވެ. ހަރުދަނާ ޒުވާން ޖީލަކަށް މި ޕްރޮގްރާމްގެ މުހިންމުކަން ކިތަންމެހާވެސް ބޮޑުަކަމަށް ދަރިވަރުންގެ ބެލެނިވެރިންގެ ޝުއޫރުތަކަށް ބަލާލުމުން ކިތަންމެހާވެސް ރަނގަޅަކަށް ފާހަގަވިއެވެ. ޕްރޮގްރާމްގައި ބައިވެރިވި ދަރިވަރުންގެ ބެލެނިވެރިން ވަނީ ވަތަނީ ހިދުމަތުގެ ޕްރޮގްރާމުން އެމީހުންގެ ދަރިންގެ ދިރިއުޅުމަށް އައި ހެޔޮ ބަދަލުތައް މިޑިއާތަކާ ހިއްސާކޮށްފައެވެ.

މީގެ ތެރެއިން އެއް ބެލެނިވެރިއަކީ މަޝްހޫރު އެކްޓްރެސް އާއިޝަތު ރިޝްމީ އެވެ. ރިޝްމީ ވަނީ ވަތަނީ ހިދުމަތުގެ ޕްރޮގްރާމުން އޭނާގެ ހުރި ހަމައެކަނި ދަރިފުޅު ޒެލްގެ ދިރިއުޅުމަށް އައި ބަދަލުތައް ހިއްސާކޮށްފައެވެ. އެގޮތުން އެންމެ ފުރަތަމަ ވާހަކަ ފަށަމުން ރިސްމީ ބުނީ، ދަރިފުޅަކީ އަބަދުވެސް ބަސްއަހާ ކުއްޖެއް ކަމަށާއި، ނަމަވެސް މި ޕްރޮގްރާމާއެކު ހަމަގައިމުވެސް ދަރިފުޅު ޒިންމާދާރުވެގެން ހިނގައްޖެ ކަމަށެވެ. އެގޮތުން އަމިއްލަ ނަފްސަށް އޮންނަ އިތުބާރާއެކު ކަންކަން ކުރަން ދަސްވެގެން ހިނގައްޖެކަމަށް ރިޝްމީ ފާހަގަކުރިއެވެ.

ދުވަހަކުވެސް ދުރުގައެއް ނުބަހައްޓަން. ދުވަހަކުވެސް ފެމިލީއާ ދުރުގައެއް ނުވެސް ގެންގުޅެން. ތަނަކަށް ސްލީޕް އޯވާއަކަށްވެސް ނުފޮނުވަން. ވަރަށް ހާސްވި ދުވަސްކޮޅެއް މިދިޔައީ. އެންމެފުރަތަމަ މާފިލާފުށީގައި ހޭދަކުރި ތިންމަސްދުވަހުގެ ތެރެއިން އެއްމަސް ދިޔައީ އަތަށް ފޯނުވެސް ނުލިބި. އެއްމަސްދުވަސް ކޮންޓެކްޓުވެސް ނުވެ ދިޔައީ. އެއީ ވަރަށް އުނދަގޫ ދުވަސްތަކެއް. އެހެން ނަމަވެސް މި ބަދަލު އެމީހުންނަށް ގެންނަން، ޕްރޮގްރާމް އެގޮތަށް ކުރިއަށްގެންދަންޖެހޭ

އާއިޝަތު ރިޝްމީ: ވަތަނީ ހިދުމަތުގެ ޕްރޮގްރާމުގެ ދަރިވަރެއްގެ ބެލެނިވެރިއެއް

ރިޝްމީގެ އާއިލާއިން ވަނީ "ދިވެހި ވަޠަނީ ޚިދުމަތުގެ ޕްރޮގްރާމް" ގެ ސަބަބުން އެމީހުންގެ ދަރިފުޅުގެ ދިރިއުޅުމަށް އައި ހެޔޮ ބަދަލު ވަރަށްބޮޑަށް ފާހަގަކޮށް ޕްރޮގްރާމްގެ މުހިންމުކަން ފާހަގަކޮށްފައެވެ.

ރިޝްމީގެ އިތުރުން ވަތަނީ ހިދުމަތުގެ ޕްރޮގްރާމްގައި ބައިވެރިވި ހުރިހާ ބެލެނިވެރިންގެވެސް ޝުއޫރުތައް ހުރީ އެބީދައިންނެވެ. ބެލެނިވެރިން ފާހަގަކުރާ ގޮތުގައި މިއީ ދިރިއުޅުމުގައި މާބޮޑު ސީރިއަސްކަމެއްނެތި އުޅެމުންދިޔަ ކުދިންގެ ދިރިއުޅުން ހަމަމަގަށް އަޅުވައިދިން ޕްރޮގްރާމެކެވެ. މި ޕްރޮގްރާމުން ބައިވެރިންނަށް އެމީހުންނަކީ ޤައުމަށް ކިހާ މުހިންމު ބައެއްކަން އަންގައިދިނެވެ. ދީނީ ސިފަތަކާއި ޤައުމީ ރޫހު ކުދިންގެ ގައިގައި އަށަގަންނުވައިދިނެވެ. އެހެން މީހުންނަށް އިހުތިރާމްކުރަން ދަސްކޮށްދީ ދިރިއުޅުމުގެ ހަގީގަތްތަކާ ކުރިމަތިލުމަށާއި، އަމަލީ މައިދާނުގައި ކެރިގެން ސާބިތުކަމާއެކު ކުރިއަށްދާނޭގޮތް ދަސްކޮށްދިނެވެ.