ނުރައްކާތެރިކޮށް ދުއްވާ މީހުން ޕްރޮފައިލްކޮށް ޖިނާއީ ތަހުގީގު ހިންގުމަށް ފުލުހުން ނިންމައިފި

ޢާންމުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި އުޅަނދު ދުއްވާ ފަރާތްތައް ދެނެގަނެ، އެ މީހުންގެ މަޢުލޫމާތު ޕްރޮފައިލްކުރުމުގެ ޚާއްޞަ މަސައްކަތެއް ފަށައިފައިވާ ކަމަށް ފުލުހުން ބުނެފިއެވެ.

ފުލުހުން ނެރުނު ބަޔާނުގައިވާ ގޮތުން، ނުރައްކާތެރިކޮށް ދުއްވާ ފަރާތްތައް ފުލުހުންގެ ޚިދުމަތަށް ހާޒިރުކޮށް ނަސޭހަތްތެރިވާނެއެވެ. އެ ޢަމަލުތައް ތަކުރާރުކުރާ ނަމަ، ޓްރެފިކް ޤާނޫނާއި ގަވާއިދުތަކުގެ ދަށުން ކުރަމުން އައި ޖޫރިމަނާގެ އިތުރުން، އިތުރު އިންޒާރަކާ ނުލައި ޖިނާއީ ތަހުގީގު ހިންގާނެ ކަމަށް އެ ބަޔާނުގައި ބުނެފައިވެއެވެ.

ޚާއްޞަ ސަމާލުކަމެއް ދީގެން ފިޔަވަޅު އެޅުމަށް ހަމަޖެހިފައިވާ ކަންތައްތަކުގެ ތެރޭގައި ޒިގްޒެގްކޮށް ދުއްވުމާއި، ސައިލެންސަރު އަޑުގަދަކުރުމާއި، ހަރު ބިންމަތީގައި ގާނަމުން ދުއްވުމާއި، ދުވެލިމަތަތަކަށް މަޑުނުކޮށް ބާރު ސްޕީޑުގައި ދުއްވުމާއި، ހުއްދަ ނެތި ރޭސް ޖެހުމާއި ހުނަރު ދެއްކުމާއި، ނުރައްކާތެރިކޮށް އޯވަޓޭކުކުރުމާއި، މަސްތުގެ ހާލަތުގައި ދުއްވުމާއި، ފުލުހުން މަޑުކުރަން އެންގުމުން ފިލުން ހިމެނެއެވެ.

ނުރައްކާތެރިކޮށް ދުއްވާ އުޅަނދުތައް ހޯދައި، ދުއްވި ފަރާތުގެ އިތުރުން އުޅަނދުގެ ވެރިފަރާތާ މެދުވެސް ފިޔަވަޅު އަޅާނެ ކަމަށް ފުލުހުން ބުނެފައިވެއެވެ. އެ ގޮތުން އުޅަނދުތައް 30 ދުވަހުގެ މުއްދަތަށް ފުލުހުންގެ ބެލުމުގެ ދަށަށް ގެންނާނެ ކަމަށާއި، ކަނޑައެޅިފައިވާ މުއްދަތުގައި ވެރިފަރާތުން ހަވާލުނުވާ އުޅަނދުތައް އޮންނަ އުސޫލުގެ ދަށުން ނައްތައިލާނެ ކަމަށް ވެސް ބުނެފައިވެއެވެ.

މި ފަދަ ޢަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ބައިވެރިވާކަން ފާހަގަކުރެވިފައިވާތީ، އެ ފަރާތްތަކާ މެދު އިދާރީ ފިޔަވަޅު އެޅުމަށް ކަމާ ގުޅޭ މުއައްސަސާތަކަށް މަޢުލޫމާތު ހިއްސާކުރަމުންދާ ކަމަށް ފުލުހުން ބުނެފައިވެއެވެ. އަދި މި ޢަމަލުތައް ތަކުރާރުކުރާ ފަރާތްތަކުގެ ވަނަވަރު ޢާންމުކުރާނެ ކަމަށާއި، ޢާންމުން ހިއްސާކުރާ ފޮޓޯއާއި ވީޑިއޯގެ ސައްހަކަން ކަށަވަރުކުރުމަށް ފަހު ޤާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދާނެ ކަމަށް ވެސް ފުލުހުން ބުނެފައިވެއެވެ.