ރަސްމާލެ ވޯޓާ ފްރޮންޓު މަޝްރޫޢާ ގުޅޭ ޚާއްޞަ ދިރާސާއެއް ކުރުމަށް ސަލަފުން ނިންމައިފި

ރަސްމާލޭގައި ހިންގުމަށް އިޢުލާނުކޮށްފައިވާ "މޯލްޑިވްސް ވޯޓާ ފްރޮންޓު އެންޑް މެރީނާ" މަޝްރޫޢާމެދު ކަންބޮޑުވުންތަކެއް ހުރި ކަމަށް ފެންނާތީ އެ މަޝްރޫޢު ދިރާސާކުރުމަށް ޖަމިއްޔަތުއް ސަލަފުން މިއަދު ނިންމައިފިއެވެ.

އެ ޖަމިއްޔާގެ ތަރުޖަމާނު އައްޝައިޚް ޙަސަން މޫސާ ފިކުރީ ވިދާޅުވީ ސަރުކާރުގެ ކަމާ ބެހޭ ފަރާތްތަކާ ބައްދަލުކޮށް އަދި އެ ނޫން ގޮތްގޮތުން ވެސް މަޢުލޫމާތު ސާފުކުރާނެ ކަމަށެވެ. މި ދިރާސާގެ މަސައްކަތް ކުރިއަށް ގެންދާ ވާހަކަ ރައްޔިތުންގެ ސަމާލުކަމަށްޓަކައި ހާމަކޮށްފައިވާ ކަމަށް ވެސް އެ ޖަމިއްޔާއިން ބުނެފައިވެއެވެ.

މި މަޝްރޫޢާ ގުޅޭ ގޮތުން ތަފާތު ވާހަކަތައް ދެކެވެމުން އާދެއެވެ. އެ މަޝްރޫޢަކީ ރާއްޖޭގެ ބިމުގެ ބޮޑު ބައެއް ބޭރުގެ ފަރާތަކަށް ވިއްކައިލުން ކަމަށާއި، އެ ކުންފުންޏާ އެކު ވެފައިވާ އެއްބަސްވުމުގެ ސަބަބުން ރާއްޖެއަށް ބޮޑު ގެއްލުމެއް ވާނެ ކަމަށް އިދިކޮޅު ސިޔާސީ ލީޑަރުން ވިދާޅުވެއެވެ. ރަސްމާލެއިން އެ ކުންފުންޏަށް ދީފައިވާ ބިން ދެން ދުވަހަކު ވެސް ދިވެހީންގެ މިލްކަކަށް ނުވާނެ ކަމަށް ވެސް އެ ބޭފުޅުން ވިދާޅުވެއެވެ.

ނަމަވެސް ސަރުކާރުން އެ ވާހަކަތައް ދޮގުކޮށް ބުނެފައިވަނީ ރަސްމާލެ ބިމުން އެންމެ އިންޗިއެއް ވެސް ވިއްކައިލާފައި ނުވާނެ ކަމަށެވެ. ބިން ކުއްޔަށް ދީފައިވަނީ ޢާންމު އުސޫލުން ކަމަށާއި، މި މަޝްރޫޢުގައި ރައްޔިތުންނަށް އޮތީ ފައިދާ ކަމަށް ވެސް ސަރުކާރުން ބުނެފައިވެއެވެ.