މާލޭ ވިޔަފާރި ބަނދަރު ޒަމާނީކުރުމުގެ މަޝްރޫޢުގެ އަދާހަމަ ވަޒީރު ސަޢީދު ހިއްސާކުރައްވައިފި

ރާއްޖޭގެ މައި ވިޔަފާރި ބަނދަރު ޒަމާނީ ފެންވަރަށް ބަދަލުކުރުމުގެ މަޝްރޫޢާ ގުޅޭ އެންމެ ފަހުގެ މަޢުލޫމާތު އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސަޢީދު މިއަދު ހިއްސާކުރައްވައިފިއެވެ.

އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވީ ރާއްޖޭގެ ވިޔަފާރިއާއި އިޤްތިޞާދީ ކުރިއެރުމާ އެންމެ ބޮޑަށް ގުޅިލާމެހިފައިވާ އެއް މަޝްރޫޢަކީ މާލޭ ވިޔަފާރި ބަނދަރުގެ ޙާލަތު ރަނގަޅުކޮށް މިއަދުގެ އިޤްތިޞާދީ ޙަޤީޤަތާ އެއްހަމައަށް ގެނައުން ކަމަށެވެ. އެ ބަނދަރު މެދުވެރިކޮށް ހިނގާ ވިޔަފާރީގެ ކާރުބާރު ހަލުވިކޮށް ފަސޭހަކުރުމުގެ މުހިންމުކަން ވެސް ވަޒީރު ފާހަގަކުރެއްވިއެވެ.

ވަޒީރު ސަޢީދު ވިދާޅުވި ގޮތުގައި ބަނދަރު ޒަމާނީކުރުމުގެ ވިސްނުމަކީ އެތައް އަހަރެއް ކުރީއްސުރެ ކަމާ ބެހޭ އިދާރާތަކުން ގެންގުޅެމުން އައި ޚިޔާލެއް ކަމަށެވެ. އެހެންނަމަވެސް ދިގު މުއްދަތެއް ފާއިތުވެ ދިޔައިރު ވެސް މައި ބަނދަރަށް މާ ބޮޑު ބަދަލެއް ނައިސް ފެނިފައި ހުރީ ކުދިކުދި ކުރިއެރުންތައް ކަމަށް ވިދާޅުވިއެވެ. އެ ޙާލަތު ނިމުމަކަށް ގެންނެވުމަށް ރައީސް ޑރ. މުޙައްމަދު މުޢިއްޒު އިސް ނަންގަވައި ޢަމަލީ މަސައްކަތްޕުޅު ފައްޓަވާފައިވާ ކަމަށް ވެސް ވަޒީރު ވިދާޅުވިއެވެ.

ދުނިޔޭގެ އިޤްތިޞާދީ ގޮންޖެހުންތަކުގެ ތެރޭގައި ޤައުމު ނިކަމެތިވާން ދޫކޮށްލައިގެން ތިބެވެން ނެތްކަން ރައީސް ސާބިތުކޮށްދެއްވަމުން ގެންދަވާ ކަމަށާއި ހުރަސްތައް ގިރާކުރައްވައި އިޙްލާސްތެރި މަސައްކަތްޕުޅުން ޤައުމު އެ ޙާލަތުން މިންޖުކޮށްދެއްވުމަކީ ވެރިއެއްގެ ޒިންމާކަން ރައީސް ކަށަވަރުކޮށްދެއްވަމުން ގެންދަވާ ކަމަށް ވެސް ވަޒީރު ސަޢީދު ވިދާޅުވިއެވެ.

މާލޭ ވިޔަފާރި ބަނދަރު ތަރައްޤީކުރުމުގެ މަޝްރޫޢަކީ ސަރުކާރުން މިހާރު ހިންގަމުން ގެންދާ ބޮޑެތި އިޤްތިޞާދީ މަޝްރޫޢުތަކުގެ ތެރެއިން ފާހަގަކޮށްލެވޭ މަޝްރޫޢެކެވެ.