ރާއްޖެއަށް އެންމެ ގިނައިން ޒިޔާރަތްކުރަނީ ޒުވާން އުމުރުފުރާގެ އަންހެން ފަތުރުވެރިން

ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާ ގޮތުގައި މި އަހަރު ރާއްޖެއަށް އައި 1.3 މިލިޔަން ފަތުރުވެރިންގެ ތެރެއިން އެންމެ ބޮޑު ނިސްބަތެއް ހިއްސާކުރަނީ 25 އަހަރާއި 34 އަހަރާ ދެމެދުގެ އަންހެނުންކަން ހާމަވެއްޖެއެވެ.

އެ ވުޒާރާގެ ހަފުތާ ރިޕޯޓުން ފެންނަ ގޮތުގައި 65 އަހަރުން މަތީގެ އުމުރުފުރާ ފިޔަވައި ދެން ހުރި ކޮންމެ އުމުރުފުރާއެއްގައި ވެސް ފިރިހެނުންނަށް ވުރެ ގިނައީ އަންހެން ފަތުރުވެރިންނެވެ. ޖުމުލަ ފަތުރުވެރިންގެ %14 އަކީ 25 އަހަރާއި 34 އަހަރާ ދެމެދުގެ އަންހެނުން ކަމަށް ވާއިރު %11.8 ހިއްސާ ކުރަނީ 35 އަހަރާއި 44 އަހަރާ ދެމެދުގެ އަންހެނުންނެވެ. ތިންވަނައަށް އެންމެ ގިނައީ 14 އަހަރުން ދަށުގެ އަންހެން ފަތުރުވެރިންނެވެ.

ޤައުމުތަކަށް ބަލާ އިރު ލިސްޓުގެ ކުރީގައި އޮތީ ޗައިނާއެވެ. ދެވަނައިގައި ރަޝިއާ އޮތް އިރު މި ދެ ޤައުމުން ވެސް ދެ ލައްކައަށް ވުރެ ގިނަ ފަތުރުވެރިން ރާއްޖެ އައިސްފައިވެއެވެ. ތިންވަނައިގައި އޮތް އިނގިރޭސިވިލާތުން ލައްކައަކަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.

މި އަހަރު ރާއްޖެ އައި 1.3 މިލިޔަން ފަތުރުވެރިންނަކީ މިދިޔަ އަހަރުގެ އެ މުއްދަތުގެ 1.4 މިލިޔަނާ އަޅާބަލާ އިރު %3 ދަށް ޢަދަދެކެވެ. އެހެން ނަމަވެސް ފަހަކަށް އައިސް ޢަދަދުތައް މައްޗަށް ޖެހެމުން ދާ ކަމަށް ތަފާސްހިސާބުތަކުން ދައްކައެވެ.

މި މަހުގެ މިހާތަނަށް ވެސް ލައްކައަކަށް ވުރެ ގިނަ ފަތުރުވެރިން އައިސްފައިވާ އިރު މިއީ މިދިޔަ އަހަރުގެ އޮގަސްޓު މަހުގެ އެ މުއްދަތާ އަޅާބަލާ އިރު %2.6 އިތުރު ޢަދަދެކެވެ.