ޓްރެފިކް ޤަވާޢިދު މުގުރާ ފަރާތްތަކާ މެދު އެންމެ ހަރުކަށި ފިޔަވަޅު އެޅުމަށް ސީޕީ އަންގަވައިފި

މަގުމަތީގެ ސަލާމަތާ ގުޅޭ ޤާނޫނުތައް ތަކުރާރުކޮށް އުވައިލާ ފަރާތްތަކާ ދެކޮޅަށް ޤާނޫނީ ގޮތުން އެޅެން ހުރި އެންމެ ވަރުގަދަ ފިޔަވަޅުތައް އެޅުމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ފުލުހުންގެ ބަހާތަކަށާއި ކަމާ ގުޅުން ހުރި މުއައްސަސާތަކަށް ރޭ އަންގަވައިފިއެވެ.

ސީޕީ ނެރުއްވި ޚާއްޞަ މެސެޖުގައި ވިދާޅުވެފައިވާ ގޮތުގައި، މަގުމަތީގެ ރައްކާތެރިކަން ކަށަވަރުކުރުމުގެ ގޮތުން ޤަވާޢިދާ އެއްގޮތަށް ޢަމަލުނުކުރާ ފަރާތްތަކާ މެދު މިހާރުން ފެށިގެން ޚާއްޞަ ފިޔަވަޅުތަކެއް އެޅުމަށް ނިންމަވާފައިވެއެވެ. މި އެންގެވުން ތަންފީޒުކުރާނީ ފުލުހުންގެ ތަފާތު ޑިޕާޓްމަންޓްތައް ގުޅިގެން "އެންމެ މަތީ ދަރަޖައިގައި" ކަމަށް ވެސް އެމަނިކުފާނު ވިދާޅުވެފައިވެއެވެ.

ގްރޭޓަރ މާލެ ސަރަޙައްދުގެ އިތުރުން އަތޮޅުތެރޭގެ ރަށްރަށުގައި ވެސް މި މަސައްކަތް އެއް މިންގަނޑެއްގައި ކުރިއަށް ގެންދަވާނެ ކަމަށް ސީޕީ ވިދާޅުވެފައިވެއެވެ. އެމަނިކުފާނު ވަނީ މިކަމުގައި ރައްޔިތުންގެ ފުރިހަމަ އެއްބާރުލުން ދެއްވުމަށް ވެސް އެދިވަޑައިގެންފައެވެ.

"މި ފިޔަވަޅުތަކުގެ މައިގަނޑު މަޤްޞަދަކީ އެންމެހައި ރައްޔިތުންނަށް މަގުމަތީގެ އަމާންކަމާއި ރައްކާތެރިކަން ކަށަވަރުކޮށްދިނުމާއި މަދު ބައެއްގެ ޒިންމާދާރުކަން ކުޑަ އަމަލުތަކުގެ ސަބަބުން ތަކުރާރުކޮށް ހިނގަމުންދާ ނުރައްކާތެރި ހާދިސާތައް ހުއްޓުވުމަށްޓަކައި އެޅެންހުރި އެންމެ ހަރުކަށި ފިޔަވަޅުތައް އެޅުމެވެ" ސީޕީގެ މެސެޖުގައި ފާހަގަކުރައްވާފައިވެއެވެ.

ސީޕީ މި އެންގެވުން ނެރުއްވާފައި މިވަނީ ފަހަކަށް އައިސް މާލެ ސަރަޙައްދުގައި ހިނގާ އެކްސިޑެންޓްތައް ވަރަށް ބޮޑަށް އިތުރުވެ، އެފަދަ ހާދިސާތަކުގައި ދެ މީހަކާއި ކުޑަކުއްޖެއް ނިޔާވެފައިވާ ދަނޑިވަޅެއްގައެވެ.