ޗައިނާގެ ޤައުމީ ދުވަހު ރައީސް މުޢިއްޒު ތަހުނިޔާ ވިދާޅުވެ ގުޅުން ބަދަހިކުރައްވާނެ ކަމުގެ ޔަޤީންކަން ދެއްވައިފި

ޗައިނާގެ 77 ވަނަ ޤައުމީ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ޤައުމުގެ ރައީސް ޝީ ޖިންޕިންގ އަށާއި ސަރުކާރަށާއި ރައްޔިތުންނަށް ތަހުނިޔާ ވިދާޅުވެ، ދެ ޤައުމުގެ ގުޅުން އިތުރަށް ހަރުދަނާ ކުރައްވާނެ ކަމުގެ ޔަޤީންކަން ދެއްވައިފިއެވެ.

ރައީސް މުޢިއްޒު އެކްސް މެދުވެރިކުރައްވައި ފޮނުއްވި މެސެޖުގައި ވިދާޅުވެފައިވަނީ ޗައިނާއަކީ ރާއްޖޭގެ ތަރައްޤީގެ ދަތުރުގައި ދެމިއޮތް ވަރުގަދަ ބައިވެރިއެއް ކަމަށެވެ. އެ ގުޅުމުގެ ސަބަބުން ދިވެހި ރައްޔިތުންނަށް ފައިދާހުރި މުހިންމު ފުރުޞަތުތަކެއް ފަހިވަމުންދާ ކަމަށް ވެސް އެ މެސެޖުގައި ފާހަގަކުރައްވާފައިވެއެވެ.

ރައީސް ސިފަކުރައްވާފައިވާ ގޮތުގައި ދެ ޤައުމުގެ ދެމެދުގައި އޮތީ އިތުބާރާއި އިޙްތިރާމާއި ތަރައްޤީއާއި ފާގަތިކަމަށް ގެންގުޅޭ އެއްގޮތް ވިސްނުމެއްގެ މައްޗަށް ބިނާވެފައިވާ ފުން އަދި ދެމެހެއްޓެނިވި އެކުވެރިކަމެކެވެ.

ކުރިއަށް އޮތް ތަނުގައި ދެ ޤައުމުގެ ދެމެދުގައި ޤާއިމުކޮށްފައިވާ "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އިތުރަށް ބަދަހިކޮށް އާ ހަރުފަތްތަކަކަށް ގެންދެވުމަށް ރާއްޖެއިން އަބަދުވެސް މަސައްކަތް ކުރައްވާނެ ކަމުގެ ޔަޤީންކަން ވެސް ރައީސް ދެއްވާފައިވެއެވެ.

ރައީސް މުޢިއްޒު އެ މެސެޖު ނިންމަވައިލައްވާފައިވަނީ ދެ ޤައުމުގެ ރައްޔިތުންގެ މެދުގައި އޮތް އެކުވެރިކަން އިތުރަށް ވަރުގަދަވެ، ޗައިނާއަށް ކުރިއެރުމާއި ފާގަތިކަން އެދިވަޑައިގަންނަވަމުންނެވެ.