އެމްޑީޕީ ކޮންގްރެސްއަށް މެމްބަރުން އަންނަނީ އަމިއްލަ ޚަރަދުގައި ކަމަށް ޝިފާޒު ވިދާޅުވެއްޖެ

މާދަމާ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްގައި ބައިވެރިވުމަށް އަތޮޅުތެރެއިން މާލެ އަންނަ މެމްބަރުންގެ އެންމެހައި ޚަރަދެއް ކުރަނީ އެ މެމްބަރުން އަމިއްލައަށް ކަމަށް އެ ޕާޓީގެ ޑެޕިއުޓީ ޗެއާޕާސަން މުޙައްމަދު ޝިފާޒު ވިދާޅުވެއްޖެއެވެ.

ކޮންގްރެސްގެ ތައްޔާރީތަކާ ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން ޝިފާޒު ވިދާޅުވީ ދަތުރު ޓިކެޓާއި ހުރުމާއި ކެއުމާއި ޔުނިފޯމް ހިމެނޭ ގޮތަށް ހުރިހާ ޚަރަދެއް ހަމަޖައްސަނީ މެމްބަރުން އަމިއްލައަށް ކަމަށެވެ. ފައިސާގެ ބާރުގައި ނޫން ކަމަށާއި، ޕާޓީގެ ރޫޙުގައި ހިލޭ ސާބަހަށް މަސައްކަތްކުރާ މެމްބަރުންގެ ހިތްވަރުން ކޮންގްރެސް ކުރިއަށް ގެންދަނީ ކަމަށް އޭނާ ވިދާޅުވިއެވެ.

ކޮންގްރެސް ބާއްވާނެ ތަނެއް ހޯދުމަށް ސޯޝަލް ސެންޓަރާއި ސްކޫލް ހޯލުތަކާއި ސެންޓްރަލް ޕާކު ފަދަ ތަންތަނަށް ހުށަހެޅި ނަމަވެސް އެއިން އެއްވެސް ތަނެއް ނުލިބުނު ކަމަށް ޝިފާޒު ވިދާޅުވިއެވެ. ޖާގައިގެ ދަތިކަން ކުރިމަތިވި ނަމަވެސް، އެ ނޫން ގޮތެއް ނެތިގެން މާލޭ ސިޓީ ހޯލުގައި ކޮންގްރެސް ކުރިއަށް ގެންދަން ނިންމީ ކަމަށް އޭނާ ވިދާޅުވިއެވެ.

"އެބޭފުޅުން ކޮންގްރެސްއަށް ވަޑައިގަންނަވާނީ އަމިއްލަ ޚަރަދުގައި. އެބޭފުޅުން ތިއްބަވާނީ އަމިއްލަ ޚަރަދުގައި. އެބޭފުޅުން ކެއިންބުއިމުގެ ކަންކަން އަމިއްލަ ޚަރަދުގައި. އެބޭފުޅުންގެ ޔުނިފޯމަކީ އެބޭފުޅުންގެ އަމިއްލަ ޚަރަދު. އަޅުގަނޑުމެން ޓައިއެއް ގަނެނުދެން ބޮލުގައި އަޅާނޭ ބުރުގާއެއް ގަނެއެއް ނުދެން،" ޝިފާޒު ވިދާޅުވިއެވެ.

އެމްޑީޕީއަކީ ވަރުގަދަ ޢަޒުމެއްގައި ހަރަކާތްތެރިވާ ކެރޭ މެމްބަރުންތަކެއް ހިމެނޭ ޕާޓީއެއް ކަމަށާއި، ޕާޓީގެ ކޮންމެ ހަރަކާތެއްގައި ވެސް މެމްބަރުން ޕާޓީވަންތަކަމުގެ ނަމޫނާ ދައްކަމުން ގެންދާ ކަމަށް ޝިފާޒު ވިދާޅުވިއެވެ. މި ކޮންގްރެސް ތިން ދުވަހުގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ އިރު، އެންމެ ފަހުގެ ތައްޔާރީތައް މިހާރު ކުރިއަށްދާ ކަމަށް އެ ޕާޓީން ބުނެފައިވެއެވެ.