ދިރޭތަކެތީގެ ނަސްލު ރައްކާތެރިކުރުމުގެ މަޝްރޫޢުތައް ހިންގުމަށް ޔޫއެންޑީޕީއާ އެކު ސޮއިކޮށްފި

ދިރޭތަކެތީގެ ނަސްލު ރައްކާތެރިކުރުމާ ގުޅޭ މަޝްރޫޢުތަކެއް ކުރިއަށް ގެންދިއުމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއިން އދ. ގެ ތަރައްޤީއާ ބެހޭ ޖަމިއްޔާ (ޔޫއެންޑީޕީ) އާ އެކު އެއްބަސްވުމުގެ ސިޓީތަކެއްގައި މިއަދު ސޮއިކޮށްފިއެވެ.

އެ ވުޒާރާއިން ބުނީ މި އެއްބަސްވުންތަކުގެ ދަށުން ރާއްޖޭގެ ދިރޭތަކެތީގެ ނަސްލާ ގުޅޭ ޤައުމީ ސްޓްރެޓެޖީ އެންޑް އެކްޝަން ޕްލޭން މުރާޖަޢާކޮށް އަދާހަމަ ކުރުމުގެ މަސައްކަތް ހިންގުމަށް ރޭވިފައިވާ ކަމަށެވެ. އޭގެ އިތުރުން، ދިރޭތަކެތީގެ ނަސްލުތައް ހިމާޔަތްކުރުމާ ބެހޭ ބައިނަލްއަޤުވާމީ މުޢާހަދާއަށް ރާއްޖެއިން ހުށަހެޅުން ލާޒިމުވާ ހަތް ވަނަ ޤައުމީ ރިޕޯޓު އެކުލަވައިލުމުގެ މަސައްކަތް ވެސް މި މަޝްރޫޢުގެ ތެރެއިން ކުރިއަށް ގެންދާނެ ކަމަށެވެ.

މި މަޝްރޫޢުތައް މެދުވެރިކޮށް، ރާއްޖޭގައި ދިރޭތަކެތީގެ ނަސްލު ދެމެހެއްޓެނިވި ގޮތެއްގައި ރައްކާތެރިކުރުމަށް ބޭނުންވާ ފައިސާ ހޯދުމާ ގުޅޭ ޚާއްޞަ ޕްލޭނެއް އެކުލަވައިލުމަށް ވެސް ވަނީ ނިންމައިފައެވެ.

ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ މާލީ އެހީގައި ހިންގުމަށް ހަމަޖެހިފައިވާ މި މަޝްރޫޢުތަކުގެ ސަބަބުން ރާއްޖޭގެ ނާޒުކު ތިމާވެށި ރައްކާތެރިކުރުމާއި ދިރޭތަކެތީގެ ނަސްލުތައް ދެމެހެއްޓުމަށް ޤައުމީ ފެންވަރުގައި ކުރެވޭ މަސައްކަތް ހަރުދަނާވެގެންދާނެ ކަމަށް ބެލެވެއެވެ. ނަމަވެސް މި މަޝްރޫޢުތަކާ ގުޅޭ އިތުރު ތަފްޞީލެއް އެ ވުޒާރާއިން އަދި ހާމަކޮށްފައެއް ނުވެއެވެ.