މާލޭގެ ބިން ބޭނުންކުރާނެ ގޮތުގެ ޕްލޭނަށް ރައްޔިތުންގެ ޚިޔާލު ހޯދުމަށް ކައުންސިލުން ނިކުންނަނީ

މާލޭގެ ބިން ބޭނުންކުރާނެ ގޮތުގެ ޕްލޭނަށް ބަދަލުތައް ގެނައުމުގެ މަސައްކަތުގެ ތެރެއިން ކޮންމެ އަވަށެއްގެ ރައްޔިތުންނާ ވަކިވަކީން ބައްދަލުކޮށް މަޝްވަރާ ކުރުމަށް މާލެ ސިޓީ ކައުންސިލުން ނިންމައިފިއެވެ.

"ރީތިންކް މާލެ" އާބަން ސްޓެރެޓެޖީ އާއި ލޯކަލް ޑިވެލޮޕްމަންޓް ޕްލޭނުގެ އޮނިގަނޑާ އެއްގޮތަށް ލޭންޑް ޔޫސް ޕްލޭނަށް ބަދަލު ގެނައުމުގެ މަސައްކަތް ފެށިފައިވާ ކަމަށް އެ ކައުންސިލުން މިއަދު ކުރި އިއުލާނެއްގައި ބުނެފައިވެއެވެ. މި މަސައްކަތުގެ ދަށުން ފުރަތަމަ ބައްދަލުކުރާނީ ގަލޮޅުގެ ރައްޔިތުންނާ ކަމަށާއި އެ ބައްދަލުވުން ބާއްވާނީ އަންނަ ހޮނިހިރު ދުވަހުގެ ރޭ 8:30 ގައި ގަލޮޅު މަދަރުސާގައި ކަމަށް ކައުންސިލުން ބުނެފައިވެއެވެ. ވިލިމާލޭގެ ރައްޔިތުންނަށް ވެސް އެ ބައްދަލުވުމުގައި ބައިވެރިވުމަށް ކައުންސިލުން ވަނީ ދައުވަތު ދީފައެވެ.

ރައީސް ޑރ. މުޙައްމަދު މުޢިއްޒު މާލޭގެ މޭޔަރުކަމުގައި ހުންނެވި ދުވަސްވަރު ލޭންޑް ޔޫސް ޕްލޭނެއް އެކުލަވައިލައި ޕްލޭނިން މިނިސްޓްރީއަށް ހުށަހެޅި ނަމަވެސް އެ ޕްލޭން ފާސްނުވެ އޮތީ ހުއްޓިފައެވެ.

ރައްޔިތުންނާ ބައްދަލުކުރުމުގެ މި ނިންމުން އައިސްފައި ވަނީ ލާމަރުކަޒީ ޤާނޫނުން ލާޒިމުކުރާ ރައްޔިތުންގެ ބައްދަލުވުންތަކަށް މި އަހަރު 1.1 މިލިއަން ރުފިޔާ ޚަރަދުކުރިކަން ހާމަވެ ޢާއްމުންގެ ފާޑުކިޔުން އަމާޒުވެފައިވާ ދަނޑިވަޅެއްގައެވެ. މައުލޫމާތު ހޯދައި ލިބިގަތުމުގެ ޤާނޫނުގެ ދަށުން އަޙުމަދު އައިހަމް ކިޔާ ފަރާތަކުން މިދިޔަ މަހުގެ 20 ވަނަ ދުވަހު ހޯދި ލިޔެކިޔުންތަކުން ދައްކާ ގޮތުގައި ފެބްރުއަރީ މަހު ބޭއްވި ރައްޔިތުންގެ ބައްދަލުވުމަށް އެކަނި ވެސް 567839 ރުފިޔާ ހޭދަކޮށްފައިވެއެވެ.

މޭޔަރު އާޒިމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ 2023 ވަނަ އަހަރުގެ ދެ ބައްދަލުވުމަކަށް 2050520 ރުފިޔާ ޚަރަދުވި ކަމަށާއި ނަމަވެސް މިހާރު އެ ޚަރަދު ވަރަށް ބޮޑަށް ކުޑަކޮށްފައިވާ ކަމަށެވެ. ކައުންސިލުން ދެން ބާއްވާ ބައްދަލުވުންތައް ރޭވިފައި ވަނީ ކޮން ތާރީޚުތަކެއްގައި ކަމެއް އަދި ހާމަކޮށްފައެއް ނުވެއެވެ.