ޤާނޫނީ ހޭލުންތެރިކަމުގެ ޚާއްޞަ ކެންޕޭނެއް އޭޖީ އޮފީހުން ފަށައިފި

ރައްޔިތުންނަށް ޤާނޫނީ ޙައްޤުތަކާއި ޒިންމާތައް އޮޅުންފިލުވައިދިނުމުގެ ގޮތުން "އެނގުމަކީ ބާރެއް" ގެ ނަމުގައި ބަންޑާރަ ނައިބުގެ އޮފީހުން އިސްނަގައިގެން ކެންޕޭނެއް މިދިޔަ ހުކުރުދުވަހު ފަށައިފިއެވެ.

ޔޫއެންޑީޕީ މޯލްޑިވްސްއާ ގުޅިގެން ހިންގާ މި ޕްރޮގްރާމް ކުރިއަށް ގެންދަނީ ޔޫރަޕިއަން ޔޫނިއަންގެ މާލީ އެހީތެރިކަމާއެކު "އެއިމް ޕްރޮޖެކްޓް" ގެ ދަށުންނެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން އެ އޮފީހުން ބުނީ ޤާނޫނީ ގޮތުން ރައްޔިތުން ބާރުވެރިކުރުވައި ދިރިއުޅުމުގެ ތަފާތު ކަންކަމުގައި އިތުބާރާއެކު ނިންމުންތައް ނިންމޭ ފެންވަރަށް ރައްޔިތުން ގެންދިއުމަކީ މި ކެންޕޭންގެ އެންމެ ބޮޑު އެއް އަމާޒު ކަމަށެވެ.

މިހާރު އެއް އަހަރު ދުވަހަށް ރޭވިފައި އޮތް ނަމަވެސް ފަންޑިން ލިބޭ މިންވަރަކުން މުއްދަތު ދިގުކުރުމުގެ ވިސްނުން ގެންގުޅޭ ކަމަށް ވެސް ހާމަކުރެއްވިއެވެ.

"އަޅުގަނޑުމެންގެ އަމާޒަކީ ވީހާވެސް ބޮޑަށް އާއްމުން ހޭލުންތެރިކުރުން. މީސްމީޑިއާ އާއި މީޑިއާ އަށް ވަރަށް ބޮޑަށް އެބަ ފޯކަސްކުރަން. ވީޑިއޯތައް މެދުވެރިކޮށް ވެސް މައުލޫމާތު ފޯރުކޮށްދެން. އަދި މޯބައިލްކޮށް މައުލޫމާތު ފޯރުކޮށްދެވޭނެ." ބަންޑާރަނައިބުގެ އޮފީހުން ވިދާޅުވިއެވެ.

މި ކެންޕޭންގެ ތެރެއިން ރަށްރަށަށް ޒިޔާރަތްކޮށް ސީދާ ރައްޔިތުންނާ ބައްދަލުކޮށް މަޢުލޫމާތު ދިނުމާއި ރާއްޖޭގެ އެކި ހިސާބުތަކުގެ ސްކޫލް ދަރިވަރުންނަށް ޚާއްޞަ ހަރަކާތްތައް ހިންގުމަށް ވެސް ވަނީ ރާވައިފައެވެ. ޤާނޫނީ ނިޒާމަށް ރައްޔިތުންގެ އިތުބާރު އިތުރުކުރުމާއި ޤާނޫނުގެ ސިޔާދަތު ނެގެހެއްޓުމަކީ ބަންޑާރަ ނައިބުގެ އޮފީހުން ޚާއްޞަ އިސްކަމެއް ދީގެން ކުރިއަށް ގެންދާ މަސައްކަތެކެވެ.