ދުނިޔޭގެ އެންމެ މަގުބޫލު ވީޑިއޯ ޕްލެޓްފޯމް ކަމަށްވާ ޔޫޓިއުބުން، ފުރާވަރުގެ ކުދިން "ޝޯޓްސް" ބަލާ ވަގުތު ކޮންޓްރޯލް ކުރުމަށް ނުވަތަ މުޅިން ބްލޮކް ކުރުމުގެ ފުރުސަތު ބެލެނިވެރިންނަށް ދީފިއެވެ.

ޔޫޓިޔުބުން ބުނިގޮތުން މި ބަދަލަކީ ކުޑަކުދިންނާއި ފުރާވަރުގެ ކުދިން ހުއްޓުމެއް ނެތި ވީޑިއޯ ބެލުމުގެ ސަބަބުން ކުރާ ނޭދެވޭ އަސަރުތަކާ މެދު ބެލެނިވެރިންނާއި ގާނޫނު ހަދާ މަޖިލިސްތަކުން ފާޅުކުރަމުންދާ ކަންބޮޑުވުންތަކަށް އިޖާބަދިނުމުގެ ގޮތުން ގެނައި ބަދަލެކެވެ.

އާ ކޮންޓްރޯލްތަކުން ބެލެނިވެރިންނަށް ލިބޭ ފުރުސަތުތައް:

ޔޫޓިއުބްގެ މައި ކުންފުނި ގޫގުލްގެ "ފެމިލީ ލިންކް" މެދުވެރިކޮށް މިހާރު ބެލެނިވެރިންނަށް އަންނަނިވި ކަންކަން ކުރެވޭނެއެވެ:

* ދުވާލަކު ޝޯޓްސް ބެލޭނެ ވަގުތެއް ކަނޑައެޅުން.

* ޝޯޓްސް ބެލޭ ވަގުތު ސުމަކަށް ހަދައި، އެ ފީޗާ މުޅިން ބްލޮކް ކުރުން.

* ނިދާ ވަގުތު ހަނދާންކޮށްދޭ "ބެޑްޓައިމް ރިމައިންޑާ" އަދި ބްރޭކް ނެގުމަށް ބާރުއަޅާ އެލާޓްތައް ސެޓްކުރުން.

* އެއް އެކައުންޓަކުން ބޭނުންކުރާ އެކި ޑިވައިސްތައް އެއްފަހަރާ މޮނިޓަރ ކުރުން.

ޔޫޓިއުބުން ބުނާ ގޮތުގައި މި ވަސީލަތްތަކުގެ މަގުސަދަކީ ކުދިންނަށް ޓެކްނޮލޮޖީއާ ރައްޓެހި، ދުޅަހެޔޮ އާދަތަކެއް ދަސްކޮށްދިނުމެވެ. އަދި ފުރާވަރުގެ ކުދިންނަށް ވީޑިއޯ ރެކޮމެންޑް ކުރާއިރު، އުނގެނުމާއި، ހުނަރުވެރިކަމާއި، އިންސްޕިރޭޝަން ލިބޭ ފަދަ ކޮންޓެންޓަށް މިހާރު އިސްކަންދޭނެ ކަމަށްވެސް އެ ކުންފުނިން ބުނެއެވެ.

ކޮންޓްރޯލްތައް ސެޓްކުރާނެ ގޮތް:

ބެލެނިވެރިން މި ފީޗާ ބޭނުންކުރުމަށްޓަކައި، ކުއްޖާގެ އެކައުންޓަކީ ބެލެނިވެރިން ސުޕަވައިޒްކުރާ އެކައުންޓަކަށް ވާންޖެހެއެވެ.

ކޮންޓްރޯލް ސެޓްކުރުމަށްޓަކައި:

• "ގޫގުލް ފެމިލީ ލިންކް" އެޕް ހުޅުވާލުމަށްފަހު ކުއްޖާގެ ޕްރޮފައިލަށް ވަންނާށެވެ.

• "ކޮންޓްރޯލްސް" އަށް ގޮސް "ޔޫޓިއުބް" އިޚްތިޔާރު ކުރާށެވެ.

• "ސްކްރީން ޓައިމް" ނުވަތަ "ޝޯޓްސް ސެޓިންގްސް" އަށް ގޮސް ބޭނުންވާ ވަގުތެއް ކަނޑައަޅާށެވެ.

ކަނޑައެޅިފައިވާ ވަގުތު ހަމަވުމުން ޝޯޓްސް ފީޑް ލޮކްވާނެއެވެ. ނަމަވެސް، ވަކިން ބްލޮކް ނުކުރާ ނަމަ ޔޫޓިއުބްގެ އާންމު ދިގު ވީޑިއޯތައް ބެލުމުގެ ފުރުސަތު އޮންނާނެއެވެ. މި ސެޓިންގްސްތަކަކީ ކުދިން އަމިއްލައަށް ބަދަލުނުކުރެވޭނެ ގޮތަށް ފަރުމާކޮށްފައިވާ ސެކިއުރިޓީ ފީޗާތަކެކެވެ.

މީގެ އިތުރުންވެސް، އޮޓޯޕްލޭ ނިއްވާލުމާއި، ކުދިން ބަލާފައިވާ ތަކެތީގެ ހިސްޓްރީ ބެލުމުގެ ފުރުސަތު ބެލެނިވެރިންނަށް ލިބިގެންވެއެވެ.

މި ބަދަލަކީ ސޯޝަލް މީޑިއާގެ ދެވިހިފާ ފަދަ ކުރު ވީޑިއޯތަކުން ކުދިން ރައްކާތެރިކުރުމަށް އެޅުނު މުހިންމު ފިޔަވަޅެއްގެ ގޮތުގައި މާހިރުން ސިފަކުރެއެވެ.