ހާމިދުގެ ދެކަނބަލުންނަށް ހާއްސަ ދުވަހެއް: ފިއްލަދޫ ރައީސަށް ހުވާލައިދެއްވީ އަނބިކަނބަލުން

މިއަދަކީ ދިވެހި ލާމަރުކަޒީ ތާރީހުގައި ހާއްސަ ދުވަހެކެެވެ. ރަށްރަށާއި ސިޓީތަކުގެ ކައުންސިލްތަކުގެ ފަސްވަނަ ދައުރު ފެށުނު ދުވަހެވެ. ކައުންސިލްތަކުގެ ރައީސުންނާއި މެންބަރުންނާއި ސިޓީތަކުގެ މޭޔަރުންނާއި މެންބަރުން ވަނީ މަގާމުގެ ހުވާ ކުރައްވާ ދައުރު ފައްޓަވާފަ އެވެ. އަދި ރަށްރަށާއި ސިޓީތަކުގެ އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ މެންބަރުން ވަނީ އިގްރާރުވެފަ އެވެ.

އެހެން ކަމުން އަލަށް އިންތިހާބުވީ ކައުންސިލްތަކުގެ ރައީސުންނާއި މެންބަރުންނާއި ސިޓީތަކުގެ މޭޔަރުންނާއި މެންބަރުންނާއި ރަށްރަށާއި ސިޓީތަކުގެ އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ މެންބަރުންނަށް މިއަދަކީ ހާއްސަ ދުވަހެެކެވެ.

މި ދުވަސް އެންމެ ހާއްސަވީ އެއް ބޭފުޅަކީ ހއ. ފިއްލަދޫ ކައުންސިލްގެ ރައީސް މުހައްމަދު ހާމިދަށެވެ. އެއީ މަގާމުގެ ހުވާކުރެއްވުމުގެ ދަރުބާރަށް ހާޒިރުވީއިރު މަގާމުގެ ހުވާލައިދެއްވަން ހުންނެވީ އަނބިކަނބަލުން, އައިޝަތު ފަރީދާއަށް ވުމުންނެވެ.

އައިޝަތު ފަރީދާއަކީ ފިއްލަދޫ ކޯޓްގެ އިސް މެޖިސްޓްރޭޓެވެ. އޭނާ އެ މަގާމާ ހަވާލުވެވަޑަައިގެންނެވީ އޮކްޓޫބަރު 2025 ގަ އެވެ.

މިއީ ރާއްޖޭގެ ތާރީހުގައި ރަށެއް ނުވަތަ ގައުމުގެ އިސް މަގާމަކަށް ވަޑައިގެންނެވި ބޭފުޅަކަށް އޭނާގެ އަނބިކަނބަލުން ހުވާލައިދެއްވި ފުރަތަމަ ފަހަރެވެ. އެހެން ކަމުން މިކަން ވެގެން މިދިޔައީ ވަރަށް ތާރީހީ ކަމަކަށެވެ.

ހާމިދުއާ ފަރީދާ ވަނީ ޝަރީއާ އެންޑް ލޯ އިން ޑިގްރީ ހާސިލުކުރައްވާފަ އެވެ.

މި ފަހަރު ފިއްލަދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ހުރިހާ މެންބަރުންނަކީ ވެސް ޕީއެންސީގެ މެންބަރުންނެވެ. މިއީ ފިއްލަދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ހުރިހާ ގޮނޑިއެއް އެއް ޕާޓީއަކަށް ލިބުނު ފުރަތަމަ ފަހަރެވެ.