ޕެންޝަން ފައިސާއިން ޙައްޖަށް ދެވޭ ޢުމުރުގެ ހުރަސް ނައްތާލައިފި

ޕެންޝަނާ ބެހޭ ޤާނޫނަށް ގެނައި ހަ ވަނަ އިޞްލާޙާ އެކު، ޢުމުރުގެ އެއްވެސް ހުރަހެއް ނެތި ޕެންޝަން ސޭވިންގްސް އެކައުންޓުން ފަރުޟު ޙައްޖަށް ފައިސާ ދެއްކޭ ގޮތަށް ޤަވާއިދު ބަދަލުކޮށް ގެޒެޓުކޮށްފިއެވެ.

މީގެ ކުރިން ޕެންޝަން އެކައުންޓުން ޙައްޖަށް ފައިސާ ދެއްކެނީ ޢުމުރުން 65 އަހަރު ނުފުރޭ ފަރާތްތަކަށް އެކަންޏެވެ. ޖާގަ ލިބޭއިރު 65 އަހަރު ފުރިފައިވާ ނަމަ އެ ފުރުޞަތު ގެއްލެއެވެ. އައު ޤަވާއިދުގައި އެ ޝަރުޠު އުވާލައި، ޝަރުޠު ހަމަވާ ކޮންމެ މީހަކަށް ވެސް އެ ފައިސާ ބޭނުންކުރެވޭ ގޮތް ވަނީ ހަމަޖައްސައިފައެވެ.

މި ބަދަލުގެ އެންމެ ބޮޑު ފައިދާއެއް ކުރާނީ ދޮށީ ޢުމުރުގެ ފަރާތްތަކަށާއި ވަޒީފާއިން މުސްކުޅިކޮށްފައިވާ މީހުންނަށެވެ. އެ ފަރާތްތަކަށް ދެން ދަރީންގެ އެހީއަށް ބަރޯސާ ނުވެ، ޚިދުމަތުގައި ހުރެ އެއްކުރި ފައިސާއިން ފަރުޟު ޙައްޖު އަދާކުރެވޭނެއެވެ. ޙައްޖު ކޯޕަރޭޝަނާ ފައިސާ ޙަވާލުކުރެވެންދެން އެ ފައިސާ އިންވެސްޓްކުރެވި ނަފާ އިތުރުވާ ގޮތަށް ނިޒާމު ވަނީ ރޭވިފައެވެ.

މީގެ އިތުރުން ޙައްޖު ކިއުގައި ތިން އަހަރަށް ވުރެ ގިނަ ދުވަހު މަޑުކޮށްފައިވާ، ޢުމުރުން 70 އަހަރުން މަތީގެ ފަރާތްތަކަށް ޚާއްޞަ އިސްކަމެއް ދީގެން ފުރުޞަތު ދިނުމަށް ވެސް ވަނީ ނިންމައިފައެވެ. މި ބަދަލުތައް ގެނެސްފައި ވަނީ އިސްލާމީ ކަންތައްތަކާ ބެހޭ މިނިސްޓްރީއާއި ޕެންޝަން އޮފީހާއި ޙައްޖު ކޯޕަރޭޝަން ގުޅިގެންނެވެ.